الموضوع: فيفوريت 94 ولا اونو 49 برضو

السلام عليكم ورحمة الله وبركاتة

دلوقتى انا نويت ان شاء الله انى اجيب اونو تسعينات وكنت ناوى اخليها معايا فترة ستوك على ماتجيلى فلوس وبعد كدة اعدل فيها موتور بونتو 1100 او 1240 زى ما اعضاء المنتدى المحترمين نصحونى بية
لانى بصراحة بحب الجرى شوية وشايف ان الاونوالاستوك ال 1000 سى سى حتبقى خنيقة شوية.


المهم النهاردة لاقيت بالصدفة عربية سكودا فيفوريت مو94 حالتها العامة ممكن نقول جيد جدا سمكرة ودوكو وصالون وجنوط سبور ودة اللى شدنى ليها

والموتور على كلام صاحبها حالتة 90 % لسة ماجربتوش انا اتصلت بية بس
وعلى كلامة برضو فابريكة جوة طبعا
المهم المطلوب 20000 واكيد حيبقى فى كلام تانى ساعة الشراء ممكن تنزل الف او الف ونص كمان
المهم يا جماعة دورت على النت على مميزات وعيوب العربية دى او اسعار قطع غيارها للاسف المعلومات قليلة اوى عنها بس المعلومة اللى بتتكرر دايما ان ناس تقول فيها مشكلة سخونة وناس تقول لا عادى بس انت اهتم بالصيانة بتاعتها !!!

المهم حد عندة فكرة عن الفيفوريت دى
يعنى اعطالها المشهورة اية و اسعار قطع غيارها؟؟ عفشتها ناعمة ولا ناشفة قوية ولا بتبوظ كل شوية يعنى مميزات وعيوب العربية دى اية من الاخر

؟؟! وياترى هى افضل ولا استنى شوية واجيب اونو

بص يا باشا انا معايا فيفوريت
اقدر اقولك انها عربية متازة بمعنى الكلمة
اولا موضوع السخونية ده انا عالجته بكل بساطة
كل اللى عليك انك تركب مروحة كمان جنب الاصلية قدام الريدياتير ودى مش هتكلفك اى حاجة
لانك هتركب اى مروحة مش هتفرق غير فى المساحة
يعنى مروحة صغيرة شوية
بالنسبة للموتور فى اكتر من 5 ميكانيكية قالولى الموتور بتاعك خفيف ومش هيكمل شهر
والكلام ده كان من سنة ونص ولسة ماشية والحمد لله زى الفل وبتجيب 110 مستريح ولغاية 130 لو رايقة
يعنى مثلا على طرق السفر انا ببقى ماشى 120 طول السكة مستريح جدا
وده مه العلم انى بحط بنزين 80 وبسافر كل اسبوع حوالى 1000 كيلو
بالنسبة للسيور مش هتحس ب اى مشكلة لانك مش هتقابل اى سير غير سير الدينامو والتانى جنزير
بالنسبة للصاج احب اقولك انك هتركب دبابة
بالنسبة للعفشة انا مقابلتنيش اى مشكلة فى عفشة العربية من يوم ما جبتها ولا عمرى جبت سيرتها اصلا
كل مشكلتك ان شكل التابلوه مش ولا بد وبالنسبالى انا ركبت تابلوه فليشيا مكلفنى 400 بالتركيب
قطع غيارها لا تعتبر مشكله نهائيا خصوصا انك مش هتغير حاجة غير كل فين وفين
مشاكلها اللى ممكن تقابلك :
الكهرباء الخاصة بهذه السيارة مقرفة حبتين ودى اعتقد انها مشكلة تخصنى انا بس لانى غاوى لعب فى الكهربا
قاعدة الكربراتير بتبوظ كل سنة ودى تمنها 50 جنيه
بالنسبة لموضوع الصيانة اعتقد ان اى حد عايز يحافظ على عربيته بيغيرلها فلاتر وبوجيهات واللذى منه بصفة دورية
وفى مشط كده بتاع الاسبراتير الالكترونى ده بيبوظ فورا لو جت عليه مية
المشكلة الوحيدة فعلا فى العربية دى هى ان الشكمان ضعيف وبيتبهدل من المطبات الشديدة
واعتقد والله ان كل اللى بقوله ده ناتج عن استعمالى الشخصى يعنى مش وارد انك تتعرضله
ارجو انى اكون ساعدتك :)