مبروك عليك الصني ......
اول عربيه ركبتها كانت فيات ريتمو موديل 84 وده كان سنه 1997 وكنت لسه فى الكليه ومطلعتش رخصه
كانت عربيه والدى جابهالى انا واخويا الاكبر منى بسنه رغم انه مبيسوقش عربيات على امل انه يتعلم السواقه ولسه متعلمش لحد دلوقتى
فضلت العربيه دى معانا لحد 2007 وانتقلت من اخويا ليا لاخونا الاصغر ورجعت لى تانى وبعدين اخويا الكبير واتباعت بشكل نهائى فى 2007
كانت فى فتره التسعينات الشباب كلها بتركب 128 و127 وريتمو وحاجات زى كده وظهرت الاكسيل وكانت حلم حياتى انى اركبها
وكانت قمه الترويش فى العربيات هى الفيميه او دهان الفوانيس بلون اصفر او شويه استيكرات وطبعا عده الصوت اللى هى ايكولايزر جنسن وسماعتين بيونير رق جلد (كانت ايام)
العربيه دى اتعلمت عليها السواقه انا واخواتى وبابا وعلمت مراتى عليها
اشتريناها شبه زيرو وبعناها مفيهاش حاجه من اللى اشتريناها بيها الا السقف والكبوت وكل الباقى اتغير حتى الدواخل
الصراحه استحملتنا او احنا استحملناها
فى الفتره دى كنت ركبت كل انواع العربيات اللى مشيت فى مصر
وغيرت سلك الدبرياج حوالى 200 مره
لدرجه انى كنت بعرف قبل ما يتقطع انه هيتقطع بكره
وكنت بركبه فى اى حته ضلمه مش محتاج نور
وعملنالها طقمين شمبر وعمره وغيرنا حوالى 50 فرده كاوتش وعملت مليون امريكانى وتخميسه
سافرت فتره قصيره الامارات واتحلت مشكلتى فى ان اخويا اخد العربيه وبقيت معنديش عربيه واقدر اشترى اللى انا عاوزه لانى كنت كل ما افكر اغيرها بابا يزعل ويقولى لاء دى عربيتنا من وانتم صغيرين وحرام والعربيه حلوه (عشرى قوى)
اول ما رجعت فكرت اشترى ايه قلت اشترى لانوس (على قد الفلوس اللى متوفره فى حدود 45 الف)
شفت عربيه اكسيل حمرا اوتوماتيك قلت بس هى دى واشتريتها
قعدت معايا حوالى 6 شهور وبعدين لقيت عربيه نوبيرا لقطه بس مانيوال اشتريتها موديل 2006 وفضلت معايا الاكسيل
الصراحه كرهت النوبيرا وفضلت راكب الاكسيل فتره لحد فى يوم اخويا الصغير وهو راجع من اسكندريه جابت فتيس طبعا اخويا الصغير من راكبى الالمانى بى ام وحاجات من اللى لتخش فى الحيطه موديلات التمانينات
قلبت الاكسيل مانيوال وسبحان الله اتباعت بعدها بكام يوم وانا زعلان جدا لانها احسن عربيه ارتحت فيها وفرحان انها مشيت لانى حسيت انها ممكن تقعد معايا العمر كله ومحدش راضى يشتريها
ركبت النوبيرا من اخر 2008 لحد اول 2011 كانت وحش الصراحه
تكييف جبار موتور جبار واسعه جدا وثبات ممتاز
مفيش فرامل مفيش عفشه
80 الف كيلو ببنزين 80
صرفت عليها مبلغ طائل من المال على الصيانه حوالى 2000 جنيه بين جلب مقصات ومره حساس شكمان وتيل وفلاتر وجوز مساعدين
كنت الصراحه كل فتره انزل افرتك 300 جنيه كده واقعد اشتم فى ام الكورى
مشكلتى الوحيده كانت المانيوال فقط لا غير
وبعتها الحمد لله فى 2011 على امل شراء سيراتو زيرو كاش
الصراحه صعبت عليا الفلوس وكنت فى يوم قاعد مع واحد صاحبى معاه صنى خليجى وكان بعد الثوره عندهم مشاكل ماديه صعبه لظروف العمل
واشتكى لى من الظروف وانه بيبيع الشقه و العربيه والناس بتخسف بيها الارض
قلت له انا ممكن اسلفك اى مبلغ لحد ما تفك زنقتك
قالى الزنقه هتستمر لفتره طويله لانه مستورد بضاعه ومحتاج فلوس للجمارك والبضاعه هتتركن للسنه الجايه فى المخازن
شفت العربيه واتفقنا على سعر عادل ليها والحمد لله اشتريتها وبقى مبسوط جدا وانا فرحت انى اشتريت اوتوماتيك يابانى (او كورى مش هتفرق)
اتصدمت فى العربيه كنبه ضيقه (كانت زفتى لما اتجوزت فى صنى 2001 وكنت فرحان ان ابن خالى مطلع الكرسيين قدام ومش مركب حد جنبه كنت فاكره عامل واجب)
العربيه واطيه وبتحك
استهلاك البنزين زى النوبيرا وممكن احسن (معرفش ده فى عربيتى ولا كلام استهلاك الصنى الزياده اشاعات)
ثبات معقول وان كانت النوبيرا تفوقها جدا فى الملفات (مكنتش اعرف اساسا ان فيه ملفات فى طريقى وانا راكب النوبيرا) اكتشفت الملفات بعد ما جبت الصنى
عملت لى مشكله مع الميكانيكى اللى بقيت اروح اغير الزيت بس عنده واغير تيل وافك العلايات واركبها (مبقاش فيه مشاكل الجلب والعفشه)
اخيرا مبحبش شكل الصنى ولا المصرى ولا الخليجى بس مش فارقه كتير انا اساسا مبغسلش العربيه علشان اشوف شكلها
لحد دلوقتى 20 الف كيلو ببنزين 80 (ومش عاوز حد يضرب)
ولسه لحد دلوقتى بجرب فى الصنى ممكن تعجبنى
كانت 504 وبعتها بسبب قطع الغيار المضروبه والغاليه وقعدت من 95 ل2009
وبعدها الصني بكل بساطه عشان المكيف والمتور القوي والسعر الممتاز وخدمة مابعد البيع
وهو ده اللي اي حد ممكن يكون بيحلم بيه في عربيه طبعا بعد الاسد 504
نفس الي حصل معايا
انا كان معايا لادا 2105 موديل 82
عربيه وحش روسي
قاسيه في المدن
قطه على الطرق
بجد صاج ولا اروع حديد في حديد يعني
انا زي احمد مصطفى كنت ببني عماره يعني اسمنت + شكاير رمل + زلط + جبس + عمال + سراميك
حمل كنت قالبها نص نقل
و الله حملت عليها اسياخ حديد تسليح ههههههههههههههههههههه
فركتها لحد خلاص مجابت اخرها كنت بطير بيها 120 و 130 كمان لحد ما جابت وش سليندر
غير و طير يا معلم بلا توقف لحد ما جابت ماتور بعديها ب 6 شهور
و بعد ما خلصت البنا للعماره قررت ابيعها و يارتني ما بعتها دلوقتي الصني بركنها في اول الشارع و بكمل الباقي مشي ههههههه طرق مدغدغه
الصيانه :
غيرت عفشه كامله ورا و قدام
غيرت ماتور
غيرت ديفرانس كامل بالكرونه
بطاريات + كاوتشات + كل الي نفسك فيه
الحمد لله جيبت الصني كنت محتار ما بين لانسر + صني + بيرسونا
حيره ما بعدها حيره لحد ما واحد كلمني و قالي في صني زيرو ماشيه 45 الف و موديل 2007 و سعر تمام و رخصه سنتين قولت خلاص الخيره فيما اختاره الله
و اهي معايا
و ربنا يكفيني شرها
الي قولك شكل قديم و تابلوه مش عارف حاجه عن الصني
ماتور جبار يكفي انه تاني اقوى ماتور ياباني بعد السيفيك
عاليه تستحمل بهدله عفشه قويه عيبها عمود الاتزان الخلفي لو كانت مقصين تبقى مافيهاش غلطه
العيوب مافيش قطع غيار استعمال خارج و قليل قوي قوي يعني كل حاجه من التوكيل و اجاره من التوكيل ده انا عاز اخير كاتيريه يمين للعجل كلمت التوكيل قال ايه ب 139 من غير ضريبه ليه دي ب 55 ياباني على ابوه ربنا يكفينا شر الذهاب للتوكيل و يجعلها عربيه العمر مش حغيرها الا لما توصل ل100 الف و بعدين عيني على الجيتا باذن الله
لسة فيه صقور كتيرة ماشتركتش :(((
أنا أول عربية ركبتها كانت عربية والدي رحمه الله وكانت 504 موديل 79 وكنا جايبينها من الزيرو (تخيلوا) كانت تحفة وكنت مظبطها إنذار وسنتر واللذي منه، وما عملتش طول عمرها غير نص عمرة فقط، وما كانتش رشة دواخل وكل قطع الغيار كنت بجيبها أصلية وكاوتش بريدجستون ياباني، وبعتها من 3 سنوات لما والدي توفاه الله علشان ما قدرش حد فينا أنا وأخويا نركبها، وقبل ما نبيعها كنت كايب لانوس 2004 وبصراحة عربية محترمة جدا وعمري ما اشتكيت منها ولا عملت معايا موقف وحش وكنت جايبها كسر زيرو وقعدت معايا لحد شهر 4 اللي فات اللي قررت فيها إني أركب زيرو، واختارت الصني لأسباب كثيرة، أولها وأهمها إني كان طول عمري عاوز أركب ياباني وأي حد من أصدقائي كان عاوز يشتري عربية كنت بنصحة بالصني، فطبعا جيبتها لمميزاتها اللي قالها الصقور في مداخلاتهم