أستفسار بخصوص الألنترا الجديدة 2012

**AshTurbo** · 19-11-2011 12:10 AM

رجالة هيونداي سلام عليكم وأسعد الله أوقاتكم ودايماً كده في أفضل صحة وحال ... الموضوع عندي من فترة بس محبتش أعمل موضوع ألا لما أتأكد وقولت أستنى صيانة ال 5000 وأسأل المهندس في التوكيل بس بصراحة أمبارح حصلت حاجة خلتني خايف أستنى ,,, الموضوع يتعلق بسخونة جامدة عندي في الألنترا كانت ظاهرة أوي بالذات لما أركن العربية وأفتح الباب ألاقي صهد طالع من تحت العربية والسايس بتاع الجراج أكتر من مرة يقولي على موضوع السخونة دي لدرجة أني أمبارح قولت أفتح الكابوت أشوف السخونة دي أيه حكايتها وبأفتح الكابوت وبأمسك الحديدة اللي بنسند بيها الكابوت لقيتها جمرة نار لدرجة أني رميتها على طول وفضلت فاتح الكابوت علشان أهويها ده غير أن الماتور خشن جداً وبحس أنها مكتومة فهل أوديها التوكيل في أقرب وقت ولا الحكاية دي ظهرت عند حد غيري وأن كنت أعتقد لأ لأن شوفت ألنترا تانية نفس بتاعتي ومفيهاش السخونية العالية دي فأيه نصايحكم ورأيكم في المشكلة دي خصوصاُ أني لما أشتريت العربية تاني يوم كنت ماشي ولقيت لمبة الحرارة نورت يادوب دقيقة ووقفت على طول وفتحت لقيت العربية كانت هتولع بأفتح الكابوت لقيت " الأفيز " بتاع خرطوم التبريد واصل لنص الخرطوم وهو مفروض مكانه في أول الخرطوم وبالتالي المياه كلها سربت لحد مالقربة فضت كلها مش عارف مفروض عربية زيرو متشيك عليها ومحطوط عليها علامة pdi ok ويبقى فيها خلل في دورة التبريد زي ده لولا أني أنتبهت كانت ضاعت العربية ..... مستني ردودكم .

**freeman207** · 19-11-2011 01:49 PM

بص على سائل التبريد اللى هو لون اخضر شوف مستواه وقولنا

**AshTurbo** · 19-11-2011 06:17 PM

المشاركة الأصلية كتبت بواسطة freeman207

بص على سائل التبريد اللى هو لون اخضر شوف مستواه وقولنا

سائل التبريد مستواه في آخر مكان تقدر تشوف منه مستوى المياه يعني موجود بس مستواه منخفض شوية .

**ashouhdy** · 19-11-2011 07:02 PM

اطلع على التوكيل

**adel1212** · 20-11-2011 11:57 AM

المشاركة الأصلية كتبت بواسطة ashouhdy

اطلع على التوكيل

+11111
تحياتى

**mido51eg** · 20-11-2011 12:58 PM

واضح ان اساس المشكلة لما لقيت الأفيز مفكوك وسائل التبريد اتسرب. وواضح كده ان فيه هواء دخل في دورة التبريد. اطلع على واحد بتاع ردياتيرات نضيف خليه يزود لك سائل التبريد وياخد الهواء من الدورة اذا كان فيها بلف لأخذ الهواء وبعد كده لازم تطلع على التوكيل.

**devil_storm** · 20-11-2011 01:43 PM

اطلع على التوكيل طبعا و تابع الحرارة وانت رايح, لو سخنت منك متمشيش بيها و اقطرها

**AshTurbo** · 20-11-2011 04:44 PM

لسة راجع من التوكيل حالاً بهدومي وقلت أقلكم حصل أيه .... مشوار من ميامي لحد النزهة وبسرعة عالية علشان أدخلهم بالعربية سخنة وطازة المهم قد تم ودخلت عليهم على طول وقلت للمهندس العربية بتسخن جامد وفي صهد بيجي من تحت العربية المهندس سأل سؤالين :

هل لمبة الحرارة نورت أو مؤشر الجرارة زاد عن النص ( المعدل الطبيعي ) الأجابة : لأ

هل سائل التبريد لما بتملاه بيقل على طول الأجابة : لأ

المهندس فتح الكابوت وقلتله شايف السخونة قالي حضرتك دي حاجة عادية في كل العربيات قولتله أيوه بس مش من مشوار بسيط قالي يافندم مفيش أي مشكلة قولتله مياه التبريد بتقل من غير مايفتح القربة بص من فوق قالي الميا مظبوطة وأعلى من علامة l قولتله يعني كده عادي قالي طبعاً وحضرتك تقلق لما تبقى أقل من l قولت أما أستغله في حاجة تاني قولتله العربية خشنة شوية دخل دور داس بنزين قالي الآر بي أم بتاع حضرتك 75 يعني أقل من 1 وده معناه أن العربية مظبوطة لو كان أعلى من 1 أو وصل 2 ممكن يبقى في مشكله في الحساس لكن كدة مظبوط .

أنا في عقل بالي : يعني ياربي جايب التاب لوب بتاعي ومعبيه أفلام وجيمزات علشان اللطعة اللي بتلطعها في التوكيل بال3 ساعات ومش كفاية مفيش واي فاي في الأستراحة .... طيب

المهندس سألني في أي أسفسار أو شكوى من العربية قولتله مفيش حد جالكم في أي مشاكل في الألنترا الجديدة رد وقالي حضرتك العربية دي مفيش حد أشتكى منها أطلاقاً ومتقلقش ..... ركب ودور وأخدها لفة في الصالة وعدلهالي وقالي شرفت يافندم قولتله أسم حضرتك أيه قالي أسمه باشمهندس هاني علشان لو حاجة حصلت في العربية تبقوا عارفين مين السبب هههههه وقالي تعالي صيانة ال5000 ومتنساش الصيانة الدورية للعربية .

**dr_sha2awa** · 23-11-2011 03:30 AM

بصراحه انا معايا النترا 2012 ومحستش باى حاجه من اللى انت بتقول عليها....
حاجه من الاتنين
اول حاجه ان انت تكون عندك مشكله فعلا وحاول تروح فرع تانى لغبور وتشوف هيقولولك ايه
الحاجه التانيه ان انت تكون(انا اسف) موسوس حبتين..وده طبيعى كلنا لما بنجيب عربيه جديده بنركز اوى مع كل حاجه فيها لدرجه تخلينا نطلع فيه عيوب....

-

الموضوع: أستفسار بخصوص الألنترا الجديدة 2012

LinkBack

أدوات الموضوع

عرض

-

-

-

-

المواضيع المتشابهه

هل أنت راضي عن أداء عربيتك الألنترا 2012 الجديدة

أستفسار هام بخصوص الصنى الجديدة

تجربة قيادة الألنترا الجديدة 2012 على وضع المانيوال

أستفسار بخصوص بيجو 206+ الجديدة

أستفسار بخصوص جيب رانجلر الجديدة !!

الكلمات الدلالية لهذا الموضوع

المفضلات

المفضلات

ضوابط المشاركة