الموضوع: ايه احسن زيت موتور للسيفيك

المشاركة الأصلية كتبت بواسطة hany63

استاذ حماده
ياريت تقول كنت بتحط ايه قبل كده و ايه الفرق بالضبط
وياترى ما خوفتش على الضمان؟

بص يا استاذ هانى هاقولك على حاجه
اولا انا قبل الهوندا كان معايا لانسر بومه و كنت بحطلها موبيل XHP 3000 و كان بيبقى كويس جدا بس لمده 1000 او 2000 كيلو بالكتير و بعدها شكرا
عشان كده من وقتها و انا اقتنعت ان الموبيل بقى سورى يعني زي الزفت

لما جبت الهوندا كانت عامله 32 الف كيلو و كان صاحبها بيغير الزيت فى التوكيل و الفواتير موجوده
عملت شويه سيرشات كده عشان اعرف بقى هاعمل ايه
مشكلبتى فى التوكيل فى مصنعيته بتكون غاليه جدا على الفاضي
يعني فى صيانه ال25 و صيانه ال30 واخدين 100 جنيه فى تغيير الزيت بس
المهم

رحت فى مره التوكيل و طلبت ملف الصيانه بتاع العربيات الدورى و لاقيتهم كاتبين انهم بيستعملوا موبيل 1 و الرقم بتاعه 0w40
و سعره حوالى 230 جنيه فى التوكيل طبعا بعد الضريبه يبقى 250 جنيه

مره من المرات كنت بحط بنزين و بعد ما خلصت نزلت على الراجل اللى بتاع الزيت فى البنزينه و عزمت عليه بسيجاره و قعدنا نتكلم على الزيت و الراجل كان فاهم الرقم و كله تمام و سألته على الرقم اللى موجود فى التوكيل ده
قالى ياباشا انا بقالى 15 سنه فى موبيل ماشفتش زيت تخليقى رقمه صفر اقل حاجه 5 و مفيش صفر

قلتله طيب اللى عندك اللى هو ال10 الاف رقمه كام ؟
جابلى الجركن و ورهونى و لقيته 5w40 هنا بقى بدأت اشك بصراحه فى الزيت اللى فى التوكيل
لان على حسب كلام الناس كلها و شركات الزيوت ان الزيت اللى اوله 0 ده اغلى من اللى اوله 5

طيب ال 10 اللى فى البنزينه ده بيتباع ب 270 جنيه و بتاع التوكيل ب 250 ازاى؟

نيجي بقى للاهم ان فى جدول الصيانه بتاع التوكيل بيحطوا الزيت ده اللى المفروض انه 10 الاف كيلو لكن بيتغير على 5000 مع كل مره صيانه و الجدول موجود عشان محدش يكدبنى بس

فبكده قلت لموبيل و زيت التوكيل شكرا و بدأت ادور بقى على الانواع الجديده

لقيت عندى 3 انواع
1- كاسترول
2- فالفولين
3- ليكوي مولى

ليا اخويا اصلا فى الامارات سألته على الكاسترول على اعتبار انه خليجي قالى مش حلو و مشاكله كتير جدا و ناس كتيره مش عاجبها

كمان قريت على المنتدى ان الناس بدأت تقلق منه
بالتالى استبعدت اول خيار

انا بطبعى بدور على المواقع بره كتير و لقيت اغلب مواقع البيع و الشرا عامله اعلانات كويسه للفالفولين
كلمت الشركه و رحت فعلا لمقرهم فى مصر الجديده و قابلت المهندس سامر و اتكلمت معاه
و الراجل بصراحه استاذ و فاهم كويس و عارف هو بيتكلم ازاى

حتى انا قلتله فى التوكيل بيقولوا انهم بيحطوا زيت كذا قالى استحاله يكون 0 ده غالى جدا

فبدأت استريح نفسيا شويه للفالفولين

اما ليكوي مولى بصراحه معرفتش اوصل لحاجه عنهم غير اللى على المنتدى هنا و تجارب الاعضاء ليس اكثر

فقررت انى طبعا اجرب فالفولين و الله المستعان

اما عن الضمان فأنا اسف الضمان اللى يشتغلنى و يحسسنى انه بيخدمنى و هو مبهدلنى اكيد و لا اعتبره اصلا ضمان
عشان كده غيرت الزيت بره للفالفولين و ضخحيت بالضمان فى جزئيه الزيت عشان خاطر العربيه كلها

عايز اقولك ان لو حسبنا صيانه ال40 على حسب الجدول قايلين انها هتتكلف 805 جنيه و بيتم فيها الاتى
و انا عملت صيانه ال40 ده و العربيه عامله 34 كيلو بس عشان اطمن اكتر و مش عايز اقولك انا منزل الزيت بتاع التوكيل اهوه على 4000 كيلو لانه متغير قبلها على 30 و الله و الله و الله الزيت نازل اسود و زباله و اسف فى اللفظ

صيانه ال40 فى التوكيل تشمل ما يلى
1- تغيير زيت
2- تغيير فلتر
3- تغيير فلتر هوا
4- ظبط زوايا للعجل

انا عملتهم بالترتيب كده بالسعر الاتى
1- الزيت ب 300 جنيه و واصلى لحد البيت
2- الفتلر ب 45 جنيه من التوكيل نفسه
3- فلتر الهوا ب 145 جنيه من التوكيل نفسه
4- ظبط الزوايا للعجل ب 25 جنيه فى بريدجستون
5- مصناعيه الميكانيكي 20 جنيه

يعني توتال كله 535 جنيه و غيرت لزيت انا واثق فيه و ضامنه

كمان للعلم توكيل هوندا بيغير زيت المواتير للمتوسيكلات دلوقتى فالفولين مش موبيل

ده الحكايه كلها و اى سؤال انا تحت امرك