الموضوع: مشكلة جامدة جدا جدا فى اللانسر 2001

يا جماعة أرجوكم أن تفيدونى فى مشكلتى والتى أعانى منها منذ أكثر من سنة ونصف .. أنا امتلك سيارة لانسر 2001 ضمان مصرية وعمله 100 ألف كيلو ولاحظت من سنة ونصف ان لما بعدى على مطب عين القطة أو على كسر فى الاسفلت بالاخص وانا كاسر الدريكسيون شمال أو وأنا ماشى مستقيم بسمع صوت خلف عدادات السرعة ذى حديد بيخبط فى حديد صوت .. والصوت ذى مثلا ما تقول تك تك تك تك بسرعة .. رحت توكيل مصرية أكثر من 25 مر فى الفترة دى قالوا ان الصوت فى كل اللانسر وهو بعلبة الدريكسيون بالاخص وانت كاسر شمال .. انا مش مقتنع أول خطوة عملتها كشفت على العفشة كلها وغيرت حاجات كثيرة فى التوكيل وصرفت حوالى 2500 جنيه ومفيش فايدة كشفت على التابلوه وكل ما يصدر صوت فى السيارة من الامام ومفيش فايدة غيرت قطمة الدريكسيون و بردو مافيش فايدة الصوت هو هو .. مهندس التوكيل خلع علبة الدريكسيون وشحمها وبالفعل الصوت تلاشى نهائيا لمدة اسبوعين وبعدين رجع تانى بنفس التون أى نفس تك تك تك حديد فى حديد بس تأكدت ان الصوت من علبة الدريكسيون لان الصوت راح لما اتشحمت العلبة.. غيرت العلبة والصوت راح لفترة قصيرة ثم رجع تانى غيرت العلبة لثالث مرة بس المرة دى كانت العلبة الاستيراد بايظة فعلا اخر ما زهقت وده طبعا على مدار السنة ونصف حتى الان رحت شارع شمبيلون وصلحولى علبتى الاساسية (غيرو المشرشر الداخلى للعلبة وبستم العلبة والالسيهات الداخلية للعلبة) علشان يحكموا أى بوش أو خبط حديد فى حديد وبالفعل تلاشى الصوت نهائيا ومر على ذلك 15 يوما حتى الان ولكنى اسمع الصوت عند نفس الظروف ولكنه مكتوك يعنى بوم بوم بوم مكتوك جدا ولا يأتى كثيرا مثل الاول وانا خايف ليرجع تانى نفس الصوت....... سؤالى لحضرتكم هل مهندس توكيل مصرية فى جسر السويس وأيضا رئيس توكيل مصرية بقليوب على حق واللانسر من 2001 حتى 2008 كلها فيها هذا الصوت بس بعض الناس لا تأخذ بالها.. ولا اللانسر مافيهاش العيب دى ولكن عربيتى فيها حاجة ماحدش من التوكيل ولا ال10 ميكانيكية و15 عفشجى اللى انا رحتلم مش قادر يعرفه ولا فى حاجة عندى متبوظ العلبة بسرعة جدا ولا فى ايه بالظبط أن طولت عليكم بس ارجو من أى حد عنده رد يرد عيا علشان ان زهقت جدا جدا جدا جدا فكم من الوقت والمصاريف ضيعتها فى هذا الموضوع علما بأن عربيتى فاريكة بالكامل وشبه الزيرو تماما وبتجرى على سرعة 180 كيلو وثابتة نوعا ما ولا تصدر أى أصوات غير المشكلة دى بس .... أسف على الاطالة

لقد حصل معى هذا الصوت مرة واحدة فقط كالتالى، كنت اسير على الكورنيش و عند عين القط ضغطت الفرامل بقوة نوعا ما مع كسر الدريكسيون شمال لتفادى تاكسى كان يريد قطع الطريق و سمعت هذا الصوت و لكن أرجعته للabs مثلا و فى جميع الاحوال لم أعر الموضوع اهتماما لانه لم يتكرر و لا يؤثر على توجيه أو أداء السيارة.

بالمناسبة سيارتى كولت 2007 و عامله 3000 كم فقط فغالبا هذا الصوت هو مجرد شىء فى تصميم الميتسوبيشى و يصدر فى ظروف خاصة (فرامل قوية نسبيا مع كسر الدريكسيون شمال).