الموضوع: سؤال صغير

المشاركة الأصلية كتبت بواسطة kareemz

أنا كنت عامل تقرير فى موضوع قبل كده .. و ده رأيى فى العربية و العربية بقالها معايا سنتين تقريبا.

العربية ممتازه ما شاء الله .. أولا شكل شبابى و الكبود عالى و صاجها تقيل .. أنا كان معايا سوزوكى سويفت كان أى حاجه تريح عليه الصاج يتطبق .. بجد الكورسا فرق شاسع .. كذا مره أتحك أجيب قطنه و ميه وترجع زى الأول .. يعنى الصاج مبيدخلش لجوه.

الموتور : السحب ممتاز جدا و موتورها ناعم و صوته قوى لما تقرص عليه .. و معمر و قطع غيارة كلها متوفرة و سعرها مناسب.

الاستهلاك: عادى بالنسبه لعربيه 1600 سى سى .. يعنى متوسط 200 كم/الصفيحه جوه البلد.

الكماليات: جميع الكماليات .. تكييف .. سنترلوك .. باور ستييرنج .. 4 زجاج كهرباء .. 4 وحدات رفع .. مرايات كهربا .. 2 مفتاح ريموت ايمبوليزر .. خاصية dead lock بتمنع فتح العربية من جوه لو مقفولة بالسنتر .. مفيدة جدا فى ظروف البلد دلوقتى.

النظام الصوتى: كاسيت و أربع سماعات بلو بونكت.

مساحات التخزين: ممتازة جدا .. أربع حامل أكواب .. باكيتات فى الابواب .. درج التابلوه واسع جدا و مضاء .. مساحات تحت الكاسيت و فى التابلوة.

الثبات: ممتاز بس مش زى الفيكترا طبعا .. جبت بيها 160 بس للأسف . بس واحد صاحبى جاب 210.

العفشه: ناشفه الى حد ما .. يمكن عشان يخلوا العربية ثابته .. و يمكن عشان العربيه كنزة شوية .. ويمكن عشان الكاوتش عندى ماكسس (ناشف شوية).

التكييف: ممتاز جدا .. ميفرقش حاجه عن الكورى سواء فى البروده أو فى سرعة الوصول لدرجة البرودة .. و لا يؤثر على سحب العربية.

أسعار قطع الغيار: كلها عاديه .. الفوانيس أسعارها بتدور حوالين 200 جنيه .. سير الكاتينه 60 جنيه .. سير الدينامو 90 جنيه .. بلية الكاتينة 185 جنيه .. الغالى فيها اسطوانة الدبرياج و الديسك ب 900 جنيه .. و البلية ب 850 جنيه تقريبا .. الرادياتير 700 جنية .. وش سلندر 2000 جنية .. طنابير 400 جنية .. تيل فرامل 170 جنية .. فى موضوع عن أسعار قطع الغيار لو تحب تراجعه.

مميزات أخرى: السنتر بيقفل عند سرعة 30 كم .. النور بيطفى بعد نص ساعة لو سيبتة منور .. مرايات فى الشماسات .. زجاج الابواب بيفتح 5 سم لما تفتح الباب .. فتح الشنطة و تنك البنزين كهربا .. التحكم فى ارتفاع كرسى السائق .. لمبات مفاتيح زجاج الابواب مضيئة.

العيوب: بتحتاج تغير اسطوانة و ديسك على فترات أقرب من العربيات التانيه .. يعنى حوالى 50 ألف كيلومتر .. و بيختلف حسب طريقة سواقتك .. أنا غيرت الاسطوانة و الديسك أول مرة عند 90 ألف كيلومتر.

مفيهاش لمبة تحذير لحزام الامان ولا لفتح الابواب أثناء القيادة ولا صوت انذار .. ممكن تشغل كمبروسر التكييف من غير ما تشغل المراوح (ممكن يعمل مشكلة لو سايب الكمبروسر شغال و مش واخد بالك).

البوهيه بتاعتها وحشة جدا لما تتساب فى الشمس .. واحد صاحبى معاه عربية كحلى زى عربيتى و مع انها أحدث الا انها جربانة جدا .. أنا دايما بغطى عربيتى لما أركنها فى الشمس عشان المشكلة دى .. و المشكلة دى موجودة فى معظم الأوبل.

العربيه كتقييم عام .. أنا شايفها من أحسن العربيات فى سعرها .. أنا قبل ما أجيبها كنت بفكر فى الكورى .. انما دلوقتى بجد صعب جدا ان انا انزل منها على حاجه كورى .. انت عارف الألمانى له شعور كده ان العربية مكتمة.

العربية صناعة برازيلى و كل قطع غيارها برازيلى.

يا رب أكون أفدتك و ربنا يوفقك لما فيه الخير.

كريم باشا انا مش عارف اشكرك ازاى .. الله ينور والله و جزاك الله كل خير ... شكرا جدا يا باشا
من الواضح انها عربية ممتازه تنصح بموديل معين ؟ 2003 او 2006 مثلا ؟ و شكرا جدا
و عربية حضرتك اللى فيها الكمليات ده كلها موديل كام ؟!

المشاركة الأصلية كتبت بواسطة n.a.j.d

الله ينور يا كريم كلامك سليم
بس حكايه البويه دي مش عيب ف الاوبل ومفيش منه بس طالما اي عربيه ح توقفها ف االشمس اكيد حيحصل كدا بلا شك

نجد باشاا ايه الاخبار عامل ايه ؟!

المشاركة الأصلية كتبت بواسطة mostafa-stabs

كريم باشا انا مش عارف اشكرك ازاى .. الله ينور والله و جزاك الله كل خير ... شكرا جدا يا باشا
من الواضح انها عربية ممتازه تنصح بموديل معين ؟ 2003 او 2006 مثلا ؟ و شكرا جدا
و عربية حضرتك اللى فيها الكمليات ده كلها موديل كام ؟!

العفو يا باشا .. جزانا و اياكم.

الكورسا السيدان من 2003 ل 2007 .. 99% منها بالكماليات اللى قلت لك عليها دى .. و ال 1% gl مافيهاش ساعة ولا ازاز كهربا ولا مرايات كهربا و الجرايد اللى على الأبوب سودا مش بلون العربية.

كلهم نفس الشكل .. فى فروق بسيطه بين موديلات 2003 و 2004 و الموديلات اللى بعد كده .. الاريال فى 2004 ورا فى 2005 قدام .. فى فروق بسيطة فى فرش الكبود من جوه و الفبر الاسود اللى على القوايم و الفبر اللى تحت المساحات .. حاجات مش ملحوظة.

ما دام كلها زى بعضها .. يبقى تدور على الحاله .. و على فكرة العربية دى فى منها كتير جدا نضيف و عامل كيلومتر قليل .. يمكن عشان راكب الأوروبى عادة بيكون استخدامه نضيف.

و ربنا يوفقك لما فيه الخير ان شاء الله.

متابع

المشاركة الأصلية كتبت بواسطة alnmr79

مدام حضرتك عايز حاجة فى الخمسينات ترشيحاتى عن تجربة لمعظم موديلات اوبل
1-اوبل فيكترا بى 1 موديل 97-99 1600 مانوال(مصرى-المانى)
2-اوبل استرا موديل 2003-2005 1600 اوتوماتيك(برازيلى)
3-اوبل كورسا 2003-2007 مانوال(برازيلى)
دول اللى تفكر فيهم بالترتيب من حيث (قلة الاعطال-توافر ورخص قطع الغيار-سعر اعادة البيع-المطلوب فى السوق-القوة والثبات على السرعات العالية -الوسع والحمولة)
الكلام دة من الاخر واعتقد 90% من العصابة هتوافقنى على الترشيحات

حضرتك كده حطيته فى حيرة اللى بيقول أشترى مرسيدس مستعملة ولا هيونداى زيرو .. أكيد الفيكترا أحسن من الأسترا و الأسترا أحسن من الكورسا .. انما أنا عن نفسى ممكن أشترى فيكترا تسعينات بدل كورسا زيرو لو عايش فى أوروبا .. انما فى مصر العربيات يتتبهدل بسرعة ... فدايما بفضل الأحدث.

المشاركة الأصلية كتبت بواسطة alnmr79

يا فندم لا حيرة والا حاجة علشان هو كدة كدة هيشترى مستعمل وانا رشحتله الافضل فالاحسن وكلهم تقريبا فى حدود بعض فى السعر بس اللى هيفرق حالة العربيات اللى موجودة امامه .
يعنى لو افترضنا ان التلات عربيات موجودين امامة وبنفس الحالة هيكون الافضل له الترشيحات بتاعتى اما لو واحدة فيهم هى اللى حالتها لقطة اكيد هيا اللى هتكون الافضل

شكرا جدا لرد حضرتك ... انا عارف ان الفكترا افضل طبعا ... بس الفكرة فى الموديل ... اقل حاجة يبقى 2003 و فعلا زى ما ا/كريم قال انا ملاحظ ان العربية فيها حلات نضيفة جدا زيرو .. اللى ماشيه 40 الف و بالكتير 70 ... و الله الموفق .... شكرا جدا لمشركتكم ...