الموضوع: تحمل طرق وسفر بكامل الحمولة اسكودا فليشيا ام سيات ابيزا

شكرا وياريت لو فى اراء اخرى وتفصيل فى موضوع العفشة والموتور ولو تجارب المالكين يكون افضل والف شكر مرة اخرى

السلام عليكم
معايا فيليشيا97، وعندي شوية معلومات عن الإيبيزا مع إبن خالي، وأخويا معه إكسيل هاتش باك (الثلاثة نفس الفئة). بصراحة بالنسبالي الفيليشيا أفضل علما بأن استخدامي السنوي يتعدى 60 ألف كيلو سنويا، بسافر كتير ومعظم الاستخدام طرق مفتوحة، يعني يوميا 60كم رايح جاي من وإلى الشغل طريق سريع. وساعات بدخل طرق شبه وعرة (غير ممهدة). موتور الفيليشيا محترم وحمال مجهودات شاقة بشرط إن قطع الغيار تكون أصلي والصيانات عند فني متخصص وشاطر في السكودا (بلاش توكيلات وبلاش ميكانيكي عشوائي) العربية عالية عن الأرض، وعفشتها ناشفة ومعدل سحبها معقول بس مش قوي عشان وزنها وصاجها متين، بس متكسفكش وفي السرعات العالية ثابتة، وبالنسبة لحكاية السخونية بفضل الله محصلتليش بس براجع على دروة التبريد دايما وبحافظ على الزيوت والفلاتر. أما الإيبيزا فهي سبور زياة يعني معدل التسارع أعلى شوية (الفارق مش كبير)، بس صاجها أضعف وعفشتها ناعمة عن الفيليشيا بس متتحملش بهدلة زي الفيليشيا. قطع غيار الفيليشيا أرخص من الإيبيزا وأغلى من الإكسيل، ومثال ذلك طقم دبرياج أصلي ألماني فيليشيا ماركة ساكس (محترم جدا) ثمنه 450ج. أما الإيبيزا الأصلي ثمنه 600ج. فوانيس الفيليشيا أرخص من الإيبيزا وكبالن الفيليشيا أرخص. كربراتير الفيليشيا معقد شوية بس لو ظبطه عند متخصص محترف هتلاقي توفير في البنزين أكثر من الإيبيزا بس مكنة الإيبيزا أنعم وأهدى، وده بسبب سير كاتينة الفيليشيا حديد ودي ميزة (ميتقطعش أبدا) وكاوتش في الإيبيزا. آسف للإطالة لعلي أكون أفدت حضرتك ولو بمعلومة. وبالتوفيق

الف شكر على الافادة وربنا يجزيكم كل خير ويحفظكم ومعلهش تعبناكم .الف شكر مرة تانية