ايهما افضل سكودا فليشيا ام سيات ابيزا

**islamagdi** · 09-09-2012 01:36 PM

السلام عليكم ورحمة الله وبركاته

الرجاء من اهل الخبرة اريد المقارنة بين سكودا فليشيا وسيات ابيزا
انا معايا في حدود 24 الى 28 الف
انا بسافر مسافة حوالي 90 كيلو وارجع تاني يوم

جزاكم الله خيرا

**meshoo_mk** · 21-09-2012 04:04 AM

نصيحة عن تجربة :
الفيليشيا عربية خشنة و بتسخن و اعطال مش بتخلص ,,يمكن ما يميزها عن الابيزا حاجتين:
قطع غيار ارخص , صالون و شنطة اوسع

لكن الابيزا اعتمادية افضل,, ثبات افضل
انا رأيي ابيزا افضل بكتيييير و ممكن تدخل معاها في المقارنة فيات بونتو
بس اهم حاجة تكشف علي العربية كويس قوي عشان العربيات دي لو حالتها مش كويسة هتتعبك اوي اوي

**kliken** · 21-09-2012 02:54 PM

الابيزا افضل بس المهم حاله كويسه علشان ما تعذبكش

**M_SALLAM** · 21-09-2012 07:46 PM

بالنسبالى فليشيا و اختلاف الرأى لا يفسد للود قضية و لو اتفقت الأراء لبارت السلع ..

**islamagdi** · 22-09-2012 04:49 PM

شكرا على مساعدتكم جميعا .. ربنا يبارك فيكم
انا كده شايف الاراء بنسبة 85 % ناحية الابيزا بالبحث هنا وفي اماكن تانية
لو دخلنا فيات بونتو في المقارنة ايه النتيجة؟؟؟؟

**benmatar** · 22-09-2012 06:23 PM

المشاركة الأصلية كتبت بواسطة m_sallam

بالنسبالى فليشيا و اختلاف الرأى لا يفسد للود قضية و لو اتفقت الأراء لبارت السلع ..

ركبت الإتنين واستخدمت الإيبيزا 92و 94 كتير وحاليا لازال معايا فيليشيا
سكودا فيليشيا هتتحمل ظروف السفر وتمتاز بثبات أعلى من سيات إيبيزا وصاج أمتن ووزنها أثقل، وعشان كده معدل تسارعها أقل من الإيبيزا والإيبيزا بتسحب عنها وأخف
قطع غيار فيليشيا الميكانيكية والعفشة أرخص بشكل ملحوظ عن الإيبيزا ومنتشرة
موتور الفيليشيا وعفشتها أخشن أيوة من الإيبيزا بس معمرة عنها
وتظبطه يشتغل معاك بنزين 80و 90و 92 إنما في الإيبيزا مش هتمشي كويس بالبنزين 80
الفيليشيا مش هتعطل منك لو بتراعي صيانتها عند متخصص سكودا وده اللي بيخلي ناس كتير تقولك عيوب كتير في الفيليشيا عشان بيتعاملو مع أي ميكانيكي إنما لو معاك خبير سكودا محدش غيره بيحط إيده فيها هتريحك كتير، ومش الفيليشيا بس كده وإنما البيجو والفولكس والرينو والفولفو وغيره، وبالنسبالي أحب العربية اللي بيكون لها متخصص
شنطة الفيليشيا أكبر وحجم الصالون للإتنين متقارب
قطع غيار الفيفوريت والفيليشيا واحد لجميع الموديلات عدا وش الأوكتافيا
حاول تلاقي فيليشيا حالتها كويسة وهتستحمل سفرك ومشاوريك الكتيرة وده عن تجربة

**islamagdi** · 23-09-2012 08:49 AM

والله يا جماعة انا بصراحة مستريح اكتر للفليشيا
وبحاول اني اتقبل الابيزا لاني شايف معظم الناس بتقول ابيزا
بس فعلا انا برده لسه مستريح اكتر للفليشيا

**أحمد جودة** · 25-09-2012 02:43 PM

الفليشيا بصراحة عربية إعتمادية أكتر من الابيزا

قطع الغيار متوفرة بالنسبة للفليشا أكتر
ثبات أكتر لصالح الفليشيا

المهم الحالة تكوم كويسة

أنا معايا فليشيا 96 بحالة ممتازة عفشة وموتور جديد إستيراد شاريها بـ 27 ألف

لما جيت أشتري بردة فكرت فى الابيزا بس لقيت سعرها أكتر من الفليشيا كتييييييير

علشان كدة اشتريت فليشيا

أتمنالك التوفيق