السلام عليكم يا احلي شباب ..
الحمد لله استلمت عربيتي اللوجان ولونها فيرانى بعد انتظار رهيب و خناقات و مشاكل .. انا عايز منك تباركولي جامد جدا جدا و اسمع ضرب نار و المنتدى يحتفل 7 ليالي

الحمد لله استلمتها عروسه كل حاجه فيها زي الفل و تمام التمام بس للأسف في شويه حاجات نكدت عليا وعايز مساعدتكم ضروري جدا جدا

1- بعد 24 ساعه فقط حصل حادث اليم للكاوتش الشمال الخلفي سبب فتحه طولها 4 سم والكاوتش كدا راح بالسلامه وخد العين الحمد لله.. ها اضطر اجيب كاوتش جديد .. ممكم تقولوي اجيب كاوتش ايه ومنين و بكام.. انا في مدينه نصر .. ارجوكم ساعدونى في الحوار دا .. ضروري ضروري

2- في صديق قالي ان الكاوتش في الضمان كلمت خدمة العملاء قالولي لا مش فيه هل في بعض التوكيلات فيها الكاوتش في الضمان ؟؟؟

3 - معدل الاستهلاك في العربيه حوالي 16 لتر لكل 100 كيلو واعتقد دا مش تمام .. انا عامل 60 كيلو بس لحد دلوقتي وطبعا انا متعلم سواقه قريب فيادوب بمشي علي الاول والتانى ولما اجيب 60 كم في الساعه بحي انى طاير هل دا ها يكون هو سبب الاستهلاك العالي دا ..
انا للمعلوميه كلمت رقم خدمة العملاء و قالي دا عادي في الاول وبعدين ها يقل هل دا سليم وحصل مع حد تانى ؟؟؟

انا منتظر اجابتكم علي نار لان فرقعه الكاوتش مافيهاش معلش وانتوا عارفين

ان شاء الله ها عمل تقرير عن تجربتي و عن كيفيه شراء السياره و الاستلام و التقسيط و حوار ما قبل اللوجان

أسف للأطاله و ربنا يقدرنى علي رد جمايلكم