الموضوع: تجربتي مع الفلوانس

المشاركة الأصلية كتبت بواسطة adry_adry

اولا السلام عليكم جميعا و احب اقول اني معجب جدا بالمنتدى هنا اوي معظم الناس محترمه وتحس انها بتخدم بعض وبتقف مع بعض في اي مشكله بتواجه اي حد حتى ولو برسالة مسانده بسيطه بجد فرحان ان في حاجه بالجوده دي و الروح دي في مصر .. واتمنى ان النجاح و الروح دي تكون في كل البلد ان شاء الله .

ثانيا كنت عايز انوه عن حاجه بسيطه ان اي انسان مهما حاول عمره ما هيلاقي حاجه فيها كل حاجه في الدنيا يعني مثلا متروحش تدور على عروسه و عايزها حلوه جدا و متدينه و ذكيه و بنت ناس و غنيه و فرفوشه و سريعه و هاديه و مش نكديه و شقيه و دلوعه و جدعه تسد لو انت مش موجود و ذوقها عالي و تفهمك و تكون فيها من امك او شبه نسخه منها وفوق كده حاجات كتير لأنك ببساطه مش هتلاقيها و هتشوف خمسين عروسه ومش هيعجبوك علشان انت حطيت حاجات متناقضه مع بعض و الذكي هو اللي يعرف ايه الحاجات اللي ليها اولويات عنده و يركز عليها و ايه ممكن يستغنى عنه و يحاول يقلل متطلباته الثانويه نفس الموضوع ينطبق على كل حاجه بتشتري عربيه و بيت و بتقارن بين كذا وظيفه .

نرجع بئى لمرجوعنا زي ما بيقولو انا عموما انا وانا بشتري عربيتي عملت غلطات كتير احب اقولها علشان لو حد بيشتري عربيه جديده ياخد باله اولا انا كان معايا عربيه لانسر 98 و في يوم وليله قررت ابيع و حطيت في بالي مبلغ لو جابته هبيع و مكنتش مقرر هجيب ايه ودي اول غلطه لازم قبل ما تبيع تكون مقرر بحيث تنزل من عربيه تركب عربيه انا بعت عربيتي 29 -7 و جبت الفلوانس في 13-10 فعلا الفتره بين الشراء دي كانت رخمه جدا و تاني حاجه تكون محدد الشريحه السعريه اللي هتشتري فيها انا بدأت من 75000 وجبت عربيتي ب 137000 يعني تقريبا الضعف و اخيرا تكون محدد انت عايز عربيه لايه شبابيه و صغيره محندقه ولا عربيه لاسره ولا الاتنين مع بعض .
عموما انا بعد ما بعت اللانسر الله يمسيها بالخير بدأت رحلة المعاناه في التدوير والتعب النفسي و الفتي من الناس الاول قلت ازود مبلغ بسيط و اجيب عربيه صغيره كده هاتش باك وبدأت ادور في النطاق ده لحد لما لقيت واحد عندي في الشركه عمل فكره صايعه بدل ما يقسط للبنك كمل المبلغ من والده و قسط ليه من غير فوايد عجبتني جدا الفكره خصوصا اني كل ما افكر في موضوع القسط الاقي نفسي هدفع مش اقل من 25000 فوق تمن العربيه دا غير اللي هينزل من تمنها ساعة البيع فكنت مستحرم الصراحه المهم كلمت الوالد وطلع رجل تمام الصراحه كالعاده و رحب بالفكره فنظرتي اختلفت وبدأت ادور على مستوي تاني من العربيات و ساعتها عرفت المنتدى هنا المهم بدأت احصر العربيات اللي بدور عليها لحد ما وصلت ل النيو النترا و الفلوانس و احقاقا للحق انا داخليا كنت ميال اكتر للفلونس علشان بصراحه مستحرم ادفع فوق ال 100000 جنيه في عربيه كوري مع احترامي التام لكل اللي بيركبوا الكوري هي مجرد اراء شخصيه قد تكون غلط و كنت خلاص نويت على الفلونس لولا فكري جروب منه لله لما عمل عرض الفوكس :b4_237:الصراحه قلب الموازين عندي و كمان بعد ما رحت عملت test drive للعربيه و كنت محتار بين العربيتين لحد ليلة ما روح اشتري بجد بيتهيألي كان من اصعب اختيارات حياتي اللي بيتهيألي على ما اعتقد كده ان معظمها كان مفروض عليا و مفهوش اختيارات وليلة قبل ما أروح اشتري العربيه صديق ليا كلمني و قالي انه بيشتري عربيه من معرض عربيات و عاملين عرض على العربيه ب 137000 الفئه التانيه بدل 142000 على موديل 2011 علشان 2012 نزلت حسبتها بيني و بين نفسي قلت يمكن دي مسدج من ربنا بيقولي الفلوانس و بيني وبينكو التفكير المادي برضوا ليه عامل قلت انا اولى بال 5000 جنيه الفرق و غير كده سمعت ان في المرور ضربية 2011 ارحض من 2012 المهم رحت اني يوم جبيت العربيه تاني يوم .

نيجي بئى لانطباعاتي عن العربيه و رأيي فيها
- مبدأيا بما اني كنت راكب لانسر 98 1300cc و جبت فلوانس 2011 1600cc فا انا اكيد هحس بفرق شاسع فرق تكنولوجيا 13 سنه و سعة موتور و category تاني .
- العربيه بتديك احساس بالفخامه حجما و شكلا حتى وانت قاعد جواها بتغير مودك بتحسسك بشئ مميز جديد
- العربيه مش بتاعت جري ولا شد وكده فمتحولش تحطها في الموقف ده لان النتايج مش هترضيك خصوصا لو كانت عربيه زي الفيرنا مثلا يعني لو بتاخد مطب كده وهديت وجه شاب جامبك و بصلك كده و بيحرق نصيحه تعمل هندي ولو مبتعرفش تعمل ممكن تعمل نفسك بنجلديشي او باكستاني المهم متدليوش الفرصه دي

- بردو العربيه في طلعتها تقيله حبتين اتقل من اللانسر كتير لحد سرعة 50 كم/س تقريبا فنصيحه حاول تنزل بدري عن معادك او متكنش متسربع و متنرفز وتحاول تطلع حارق لان ممكن يجيلك جلطه بعد الشر عليكم انا بهرج انا عن نفسي بقيت قبل ما انزل ادخل العربيه و ادورها وسبها تسخن لاول شرطه كده واشغل مزيكا كده لزيزه واطلع بالعربيه براحه كده واستمتع بيها الصراحه بتخيل نفسي متجوز واحده بطيئه و لو قعد اسربعها واستعجلها هتغلط و تعصبني على ايه انا اقعد اتفرج عليها و اتابع حركتها البطيئه بحب هتحب العيب ده لو الناس شيفينه عيب و هتتعود عليه بجد

-الثبات بتاع العربيه كويس جدا بس الصراحه كان اعتقادي انه هيكون احسن بس شخصيا اديله 8 من 10 مستريح

- العفشه بتاعة العربيه ناعمه مش ناشفه وبتدب كدا تحسها سلسه معاك انا عارف ان الناشفه رياضيه بس انا نفسيا برتاح مع العفشه الناعمه اكتر

- نيجي لبجد لاكتر حاجه لأكتر حاجه حبيتها في العربيه ودي فعلا من اهم الحاجات عندي التحكم بتاع العربيه متعه فوق الوصف اول ما تشوف العربيه تحسها مركب يخت ايه ده هسوقها ازاي دي مستحيل , فعلا العربيه تعتبر اطول وممكن اعرض عربيه في الفئه بتاعتها بس التحكم فيه اسهل بشكل غبي على رأي واحد صحبي بجد ناعمه جدا في السواقه و خصوصا و انت ماشي بالراحه و مع السرعه لما الباور بيتقل كمان بجد بتديك احساس ان السواقه دي حاجه ممتعه مش قاعد متنشن و الكراسي مريحه بجد مبكونش زهقان ابدا او عاوز المشورا يخلص وانا سايق وحتى في الركن سلسه كده و مبتعمليش اي ازمه

- ال sound system بتعها جامد جدا بجد يعني لو حد بيحب يسمع مزيكا وهو سايق بجد من احد وسائل المتعه فيها

- استهلاك البنزين ممتاز يعني من ساعة ما جبتها حطيت فيها 116 لتر بنزين و مشيت 1200 كيلو تقريبا او ازيد شويه ولسه في تحت نص التنك بشويه صغيرين

- صوت العزل بتاع العربيه الصراحه مش راضي عنه 100% وناوي اكلمهم في صيانة ال 5000 كلم ممكن تكون الابواب محتاجه تتريح شويه

- مساحة التخزين هايله ممكن تقلب الشنطه دولاب متنقل لو مراتك طردتك من البيت و تفرش وتنام فيها كمان

- نيجي بئى لشوية حاجات غيظاني بجد اولا مفيش وحدة رفع في الازاز هتشليني انا معجب جدا بموضوع السمارت كارد و start/ stop و اول لما ابعد العربيه تعمل lock بس لازم الحلو ميكملش فيها ايه لو كانو عملو وحدة رفع تخيل انت مشيت وسبت الازاز مفتوح

- الغطا بتاع الموتور مش عارف شايلينه ليه و هيفرق ايه معاهم يعني انا شفت مواقع هنديه العربيه بتنزل هناك بيه
- رأيي الشخصي انهم لو كانو شالو ال light sensor و ال rain sensor و حاطو مكانه park sensor كان هيكون عملي اكتر
- الجانشة بتاعت القطر لو حابب تقطر عربيه عباره عن مسمار بسيط وفي اخره حلقه حاجه بسيطه وبتيجي مع معظم العربيات مش عارف مبتجيش هنا ليه مع انها مفروض تكون ليها حسابات و مصممه قوة الشد و ان طول القلووز يكون ماشي مع طول سن المسمار و هيعمله كام اخره 100 جنيه
- العربيه كانت محتاجه cd exchanger
الكومنتات اللي عندي على العربيه الصراحه متعيبهاش بس هي كانت غايظاني و عايز افضفض العربيه بجد هايله لو رجع بيا الزمن هجيبها تاني بحبها كل يوم اكتر مريحه ممتعه ذكيه تحس انها بتكلمك و توجهك لو عملت حركه غبيه هيا عامله معايا 1200 كيلو ولونها فضي بالمناسبه واللي اكتشفته ان العربيه الالوان الفاتحه فيها بتديها وسع اكتر و بتظهر تفاصيل العربيه بجد كان اختيار موفق وبدعي ربنا يحفظها ويحفظ كل العربيات و اسف اذا كنت رغاي وطولت عليكم

اولا ربنة يباركلك فى السيارة و يديك خيرها و يكفيك شرها :)
ثانيا : بجد اية الابداع دة اسلوب كتابة عالى جدا انا و انا بقرا حسيت انى بتفرج على فيلم قصير محبوك جدا انت حولت ببساطة فكرة ان العربية طلعتها بطيئة الى ان دية من مواطن الجمال فيها صباح الابداع بجد انا احييك :)