كله يخلى باله من نفسه ( تحذير للأخوه المفيمين )

**BESO516** · 11-12-2011 12:05 PM

صباح الخير ياجماعه زى ماواضح من العنوان بدأت حملات كبيره من المرور وخصوصا فى القاهره والطرق السريعه والحمدلله وقعت فى واحده امبارح
فى شارع النصر بالمعادى بعد شركه تى اداتا وامام بنزينه توتال وقفنى ظابط ( مش امين او عسكرى ) وسحب الرخص وادانى مهله 10 دقايق عشان اشيل الفاميه والكربون والأستيكارات اللى على العربيه كلها والا اودع الرخص الوداع الأخير واقابلها فى المرور والفحص
وافقت طبعا انى اشيل شاورلى اقف على جنب جنب الأخوه اللى زيى وكل واحد لقيته شغال ازاله فى اى حاجه ممنوعه وكنا حوالى 4 عربيات واقفه مابين سيراتوا واسبرنزا وفورد فوكاس وشيلت كل حاجه وانا
وطبعا الظابط جه تمم علينا وادانا الرخص وقالنا من هنا ورايح فى حملات مخصوصه على الفاميه بالذات والكاربون ( حتى لو اسود بلون العربيه ) وفى الطريق الزينون والسرينه بس للأمانه قالها بأحترام وذوق

بس انا هنزل بكره بعد الشغل ان شاء الله هعمل الحاجات دى تانى و تالت وعاشر لأنى مبأذيش حد بالى بعمله ودى عربيتى وانا حر اعمل اللى انا عايزه مادام مش بمشى عكس او بسرعه عاليه او راكن صف تانى او عاشر يبقى خلاص ايه المشكله ولا ايه رأيكم

ملحوظه اخيره : فى جريده الأخبار بتاعه النهارده مكتوب عن الحملات دى فى صفحه الحوادث وبالذات على الفاميه ( يعنى مفيش هزااااااااااااااااااااار ) وربنا يستر عليكما

**fineart607** · 11-12-2011 12:13 PM

طب انا لسه مفيم امبارح :( وبعدين والله خفيف علشان احافظ على صالون السيارة وكمان الشمس مش تضايق الطفل لا حول ولا قوة الا بالله اهى قبل الثورة نفس الكمين ده بس الواد اخذ 40 جنيه وسابنى امشى ههههههههههههههه

**mohamedbook** · 11-12-2011 12:24 PM

اكتر حاجة بتجنني هي الرادار مفيش مرة متلدعش منة واتاخد مخالفة

**HOSSAM99** · 11-12-2011 12:30 PM

فعلا الداخليه عامله حملات مكثفه و جاده جدا و الوزير كان عامل مؤتمر صحفي و مشدد جدا علي المخالفات

و حضرتك متزعلش كده المفروض تفرح علشان فيه حد بيسأل العربيه دي رايحه فين و مين صاحبها و هكذا

و طالما إحنا مابنمشيش عكس و لا نتجاوز السرعه أو أي مخالفه و بنلتزم بقانون المرور يبقي نكمله للأخر و نلتزم به كله و ده اللي المفروض نعمله علشان و أحنا بنطلع الرخصه و بنرخص عربيه المفروض إننا مذاكرين القواعد دي كويس و موافقين نمشي وفقا لها

بالتوفيق

**aboharb** · 11-12-2011 12:33 PM

الحمد لله انا شفت المنظر ده فى حلوان والمعادى من شهرين رحت شايل الفاميه وطبعا ان بشكر الاخ صاحب الموضوع والوم عليه انه ناوى يفيم تانى واقله بلاش ترمى فلوسك على الارض صحيح انت حر بس طالما هناك قانون اصبحت ملزم به لانك ممكن تخش فى فحص ومصاريف تانيه لو الضابط عمل المخالفه

**eltorbeny** · 11-12-2011 01:01 PM

مبتاذيش حد تصدق بالله انا اكتر حاجة مضايقاني بعد الثورة ديه الفامية نص العربيات مفيمة فى الشارع

وانت مفيم الازاز الي ماشي وراك مبيبقاش شايف الطريق قدامك وممكن لو انت ضربت فرامل يلبس فيك
او لو فاديت حاجة هو يلبس فيها
انا بس بقولك لو انت مش عاوز تاذي حد بجد بلاش تفيم ومتاخدش ذنب الناس

**Jato.33** · 11-12-2011 01:18 PM

المشاركة الأصلية كتبت بواسطة eltorbeny

مبتاذيش حد تصدق بالله انا اكتر حاجة مضايقاني بعد الثورة ديه الفامية نص العربيات مفيمة فى الشارع

وانت مفيم الازاز الي ماشي وراك مبيبقاش شايف الطريق قدامك وممكن لو انت ضربت فرامل يلبس فيك
او لو فاديت حاجة هو يلبس فيها
انا بس بقولك لو انت مش عاوز تاذي حد بجد بلاش تفيم ومتاخدش ذنب الناس

أذى .. بتاع إيه الأذى ده ؟؟
الأذى إن الشمس تحرق في فرش العربية الجلد وتبوظ السماعات وتحرق في إبني وفيا أنا ومراتي ومش بس كده .. مش هتكلم على الناس إلي بتبحلقلك في العربية ومعندهاش ريحة الدم
العربية دية ليها خصوصية .. زي البيت بالظبط
حرام عليهم
وبعدين إذا كان الفيمية بيدايق إلي ورايا يبقى يتحرك يمين وشمال براحته عشان يشوف الشارع زي ما هوا عايز .. ولا هيا زنقت يشوف طريقه من خلال عربيتي
وبعدين أعتقد لما أفرمل مش هيبان عليا وأنا قاعد في العربية إني دوست على الدواسة .. أعتقد في فوانيس بتقوم بالمهمة دية

إحنا مش لازم نسكت على الموضوع ده

هوا الوزير ملقاش غير الفيميه .. حسبي الله ونعم الوكيل

أنا أقترح نتجمع في ميدان التحرير ونعمل مظاهرة ضد الموضوع ده .. يتعدل في القانون

عندهم السرعة .. عندهم 100 حاجة غلط بتتعمل غير الفيميه .. مش لاقيين غيره .. عليهم من الله ما يستحقونه .. ومش عايزين نقول غير كده

**amr5500** · 11-12-2011 01:43 PM

ياريت الداخليه تشد حيلها ومافيش حد المفروض فوق القانون
القانون يتطبق علي الكل الكبير قبل الصغير
لكن حاله الفوضي دي ماترضيش اي انسان عاقل

**madaxman** · 11-12-2011 01:49 PM

حيث كدا بقا انتظروا قريبا هجبلكم صوره لعربيه ظابط وهنشوف هوا ملتزم قد ايه بالفاميه والكاربون
بأذن الله اصورها بليل واجبهالكم

**gebreel** · 11-12-2011 01:50 PM

يا باشا لو حضرتك عاوز تحمي فرش العربية و السماعات و الطفل من الشمس ممكن تركب عازل حراري و بيبقى شفاف

بالنسبة للخصوصية معاك ان في ناس معندهاش ريحة الدم بس في الاول و الاخر لو بصيت للبني ادم اللي بيبحلق ده هيبص الناحية الثانية و يلم نفسه

اما موضوع ان العربيات اللي وراك يجي يمين او شمال علشان يشوف الطريق فمع احترامي الشديد لحضرتك العربية ملكية خاصة اه و ليها حرمتها زي البيت اه و متفق معاك في ده كلوا لكن الشارع ده ملكية عامة و من حق اللي وراك انو يتابع الطريق بوضوح تام

لو تاخد بالك العربيات المتفيمة فابريكة بردة بتبقى شايف الطريق اللي قدام السواق بردو لأنو بيبقى بدرجة معينة علشان تبين الدنيا و في نفس الوقت تدي خصوصية

الموضوع: كله يخلى باله من نفسه ( تحذير للأخوه المفيمين )

LinkBack

أدوات الموضوع

عرض

-

-

-

-

-

المواضيع المتشابهه

شوية أسئله للأخوه الجتزاويه

سؤال للأخوه المقيمين فى المنصوره

اللى رايح المهندسين يخلى باله

كل واحد يخلى باله من عربيتو

كله يخلى باله من كاوتش عربي

الكلمات الدلالية لهذا الموضوع

المفضلات

المفضلات

ضوابط المشاركة