الموضوع: حملة " مش هاروح الحرفيين تانى " :)

بسم الله الرحمن الرحيم وبه نستعين والصلاة والسلام على أشرف المرسلين سيدنا محمد وعلى اله وصحبه اجمعين
وبعد ....

من الاخر ومن غير لف ولا دوران معظمنا ان لم يكن كلنا شرب من كيعانه فى الحرفيين دى
يا بهدله
يا دوران فى فلوس بالعبيط ومن غير ما تعرف ليه
يا الاتنين - ودى المرحلة اللى بتكره فيها عربيتك ونفسك واهلك والمجتمع والناس :)
انا شخصيا بعد ما شوفت كتير والحمد لله ما دورتش فى كتير يعنى :) قررت امشى بمبدأ
اللى خلقها خلق غيرها :)
يعنى ايه
يعنى ما دام الحرفيين بقت فهلوه وكل واحد بسعر والصيت ولا الغنى
ويعنى لما صنايعى (نازل من المريخ) يقوللك دبة ايده فى العربيه ولو هايفك مسمار ب 300 جنيه ( ولسه بقية المسامير )
ويعنى لما يتعمل عليك احلى شغل ويتقسم عليك من بتوع قطع الغيار والميكانيكية ( مش كلهم بصراحه ) وتعرف بالصدفه ان قصاد كده اى صنايعى بياخد قطع الغيار لعربيته ببلاش مهما كانت وان بتاع قطع الغيار بيصلح عربيته عند نفس الصنايعى ببلاش بردو مهما كان الشغل عشان المصنعيات مدفوعة مقدما منى ومنك
ويعنى لما تضيع يوم من صباحية ربنا هناك ده غير حرق البنزين فى المشوار الطويل والمقرف حتى لبعض سكان القاهره واحتمال تضيع اجازتك كلها هناك كمان على حساب بيتك واهلك

يبقى الحل فى حملة " مش هاروح الحرفيين تانى " والتى من اهم مبادئها
أولا: البحث والتنقيب عن الميكانيكية والصنايعيه ممن يعرف عنهم الامانه والخبرة ( والسعر الحنين ) ممن هم خارج الحرفيين
ثانيا: البحث والتنقيب عن محلات قطع الغيار الجديده والمستورده خارج الحرفيين ( وممكن نخلينا جوه مفيش مانع لان موضوع قطع الغيار غير موضوع الميكانيكية )
ثالثا: نضع قاعدة بيانات فى هذا الموضوع حتى تكون مرجع لكل من عانى فى الحرفيين مما سبق ذكره

هذه البنود محل اضافه وتعديل من الاخوة البيمرز بما يحقق النفع والمصلحة العامه
واذكر بالمناسبة ان زيادة الشهرة للحرفيين تسببت فى انتقال كل قطع الغيار الخاصه بالبى ام تقريبا من بورسعيد الى القاهره مع ارتفاع اسعارها للاضعاف لمجرد ان فى الحرفيين زبون يدفع بدون مناهده وبأى سعر فنجد ان كل صاحب محل فى بورسعيد فتح فرع فى الحرفيين واصبح كل البيع والشراء يتم من الحرفيين وباسعار الحرفيين

انا قولت اللى عندى وفى ضميرى ولله الامر من قبل ومن بعد
وتدعيما للبنود السابقه اسمحولى اذكر اسماء اتنين من الميكانيكية خارج الحرفيين لكن بدون ارقامهم واللى يعرف ياريت يكمل البيانات

الاول : الشيخ طارق عند الكيلو 4 ونص طريق القاهره السويس
الثانى: محمد رابسو فى التوفيقية

ولو حد من الناس اللى ستذكر مش تمام فى سعر او شغل ياريت ينبهنا

أخوكم محمد