الموضوع: مصنع نيسان مصر ....... ظالم أم مظلوم

فعلا اول ما تم افتتاح مصنع نيسان فى 2005 ب6 اكتوبر قريت الكلام ده تصدير واكتفاء ذاتى للسوق المحلى !!!
بس انا شايف ان مشكلة التجميع المصرى تتلخص فى الاتى:
1- اغلب خطوط الانتاج فى مصر (غبور - منصور - البافارية ... وغيرها) بتجمع الاشكال او الموديلات القديمة وبتكون مدروسة لملائمة السوق المحلى بالمقام الاول وموضوع التصدير ده له ترتيبات تانية خالص لأن فكرة تغيير خط الانتاج حتى بمواصفات تانية غير المعتادة بياخد وقت وبيحتاج تدريب عالى من العمالة ومثال على كده
*وقت انتاج الصنى ex saloon والسوبر صالون والهايلاين بيكون تتابعى يعنى بالتوالى وليس بالتوازى وبرضه اللون الخارجى
*حتى لما موديل جديد بينزل فى مرسيدس او بى ام دبليو بيتم تغطية السوق اول شهرين او اكتر بعربيات مستوردة او حجز لحين بدء التجميع واستيراد المكونات وعمل اختبارات عديدة

2- مواصفات الصنى او الاكس ترايل او غيرها فى مصر بتكون ملائمة اكتر للسوق المصرى ومعمول دراسات لتحديد السعر عشان تتباع وتنافس انما بكل بساطة مش هى دى اللى هاتتصدر لأى بلد تانى بنفس المواصفات والسعر واكيد الشكل هايكون كمان فيه اختلافات وقديم وده هايتطلب توسعة المصنع وخطوط انتاج خاصة بالتصدير واخرى للاستهلاك المحلى وتأخير فى مواعيد التسليم وطبعا هايضحى بالسوق المحلى عشان التصدير يعيش لأنه ببساطة اى اتفاقية اكيد فيها شروط جزائية

3- موضوع التصدير محتاج لصفقات واتفاقيات تبادل تجارى بين مصر ودول العالم وبيكون سوق السيارات جزء منها وهنا بيحكمها اقتصاديات السوق من عرض وطلب واحتياجات واولوليات كل بلد يعنى على سبيل المثال
*لما من 7-8 سنين تقريبا مرسيدس صدرت العيون E-CLASS للصين كان قصادها بضاعة تانية او صفقات تانية وقتها الله اعلم بيها والموضوع ده كان فى بعض موديلات BMW كمان
*اتفاقية اغادير الشهيرة بين مصر والمغرب واللى كانت سبب فى دخول الرينو لوجان لمصر بسعر معفى من الجمارك نسبيا لأنها المفروض تبقى اقل من كده وقصادها كان الاخ غبور بيصدر اتوبيسات سياحة وكان له تدخل مباشر فى تعطيل تنفيذ بنود الاتفاقية وتأخير دخول اللوجان مصر الى 2007-2008 بعد ما كانت نزلت فى المعرض 2005 وتم اعلان سعرها 60 و 65 الف ج وده كان خوفا من تأثيرها على مبيعات الفيرنا الفوريييييييييييرا وقتها وسوق العربيات اللى تحت 75 الف وغالبا ما بتكون الاتفاقيات دى كلها حاجة قصاد حاجة يعنى لو ما بعتش الاتوبيسات مفيش عربيات وقيس على كده باقى الصناعات

الخلاصة عشان انا رغيت كتييييييييييييير
الموضوع مهم طبعا عشان اسم مصر وسمعة مصر وصناعات مصر وخلافه
بس ببساطة كده نيسان نفسها هى اول واحدة هاتستفاد من فرصة زى دى خاصة ان القائمين على المصنع فى مصر يابانيين وحاطين لنفسهم جدوى اقتصادية ودراسات وتوسعات جوة وبرة مصر ولولا المعوقات اللى تقرف اى مستثمر فى مصر والسوق المضطرب والاقتصاد اللى طالع نازل بدون اى مبررات او كرد فعلى لأى حدث فى السوق يخلينا نحمد ربنا انهم لسه واقفين على رجلهم وحصتهم فى السوق بتزيد يوم بعد يوم
وكلنا طبعا امل فى بكرة للبلد كلها ونيسان بالاخص