الموضوع: ممكن تساعدونى فى الاختيار

المشاركة الأصلية كتبت بواسطة rerii

انا معايا لانسر كريستالة 99 وشكلى كده هبيعها وهزود على تمنها شوية ان شاء الله وعاوزة اجيب حاجة فى الخمسينات
فيه ناس اقترحوا عليا بروتون جين 2 موديل 2006 وبيشكروا فيها جدا وناس قالولى النترا 2004 بصراحة الجين 2 شكلها عاجبنى الالنترا مش عاجبنى شكلها اوى
فياريت تقولولى مزايا وعيوب الاتنين وايهما افضل وياترى فيه اختيارات تانية احسن مع العلم ان الميزانية حوالى 55 الف

وميرسى ليكوا اوى

أولا اختيار سليم انك نبيع كريستالة دلوقتي.. لأن الموديلات الجديدة أسعارها بتنزل وجيل اللانوس والكريستالة والفيرنا والحاجات دي كلها حاتقع وقعة وحشة.. أقلها اللانوس 2008 اللي كانت بتتباع ب60 ألف وانت حاطط رجل علي رجل من 3 شهور بالظبط دلوقتي ماحدش عاوز يدفع فيها فوق ال 54 أو 55 . المهم الخطوة اللي جاية وانا محتاس زيك كدة بالظبط.

للأسف مش حارشحلك حاجة معينة لأن انا أساسا لسة مش راسي علي حاجة.. بس علي الأقل حانصح.. ابعد عن الجين 2. توكيل مزبلة واسعار قطع غيار لو قلتلك في السما يبقي كدة باقلل منها. بجد التوكيل هناك يحسسك انك شاري باسات مش عربية ماليزي!! ياريت مايغركش الشكل الخارجي أو حتي التابلوه..

بالنسبة للالنترا بصراحة عمري ما اهتميت بيها فا ماقدرش أفيدك.. كل اللي أقدر أقوله ان منظر التابلوه من جوة أشبه بعربيات التسعينات (شبه النوبيرا والكريستالة كدة) ودا قافلني منها.

بالنسبة للي أرشحه شوفلك كورسا سيدان يا كليو 2008 الاتنين أنضف من بعض وعيوبهم مش كتير.

فى نقطتين مش فى صالح الجين 2 :

1 . أستهلاك البنزين عالى شوية.
2. قطع الغيار غالية ومش متوفرة زى العربيات الكورى .

جربى تدخلى على قسم الشكاوى فى قسم بروتون وأنتى تلاقى العجب .

المشاركة الأصلية كتبت بواسطة rerii

ميرسى ليكو بس انا مستغربة ليه كل الناس شكرتلى فيها رغم العيوب اللى ذكرتوها

عشان فيه فرق كبير بين السؤالين دول:
-العربية دي حلوة ولا لأ؟
-أشتري العربية دي ولا لأ؟
يعني مثلا لو حد سألني السيتروين c4 حلوة ولا لأ أقول له استاذة.. لو حد قاللي أشتريها ولا لأ حاقول له حمادة بالجبنة.. أشتري ازاي عربية ب 50 ألف وعلبة الدركسيون بتاعتها لوحدها ب 18 ألف!!! العربية مابتتحددش بالكفائة بس.. فترة نص العمر وقطع الغيار واعادة البيع وكفائة التوكيل ومناسبة العربية للشوارع في مصر كل دي حاجات بتحدد العربية دي حاتنفعني لما اشتريها ولا لأ؟ الجين 2 فيها كام عيب في النقط دي:
1- قطع الغيار في التوكيل مولعة بطريقة غريبة.. ومش متوافرة بالشكل الكافي في السوق برة.. حتلاقي في منتدي البروتون موضوع عن قطع الغيار اللي تتوفق ع البروتون من عربيات تانية لمجرد بس انهم يبعدو عن التعامل مع قطع الغيار الأصلية.
2- اعادة البيع: مراجعة سريعة لسعر العربية مستعمل حالة فوق الممتازة مع سعرها جديدة كفاية انه يبين ان السعر بيقع جامد.. غير ان العربية تقيلة ف البيع.
3- كفائة التوكيل: عز العرب بينافس بحمد الله علي المركز الأول بجدارة لأسوأ التوكيلات في مصر.. تخيلي -بعيدا حتي عن العربيات- الموقع بتاعه بتاع بروتون فيه تروجان في الصفحة الرئيسية!! وجربي بنفسك وشوفي الفاير وول حايديكي اييه!! فاشل حتي انه يعمل موقع!!

طبعا مش حاتكلم عن عيوب العربية لأن مافيش عربية خالية من العيوب.. بس فيه عوامل كتير متصلة بالعربية تقفل الواحد منها أساسا.

اقولك حاجة بس متستغربيش
انا كنت هاشترى عربية اسمها جاك صينى وربنا ستر والحمد لله واحد بن حلال نصحنى نصيحة وقالى ابعد عن الصينى
والحمد لله ربنا هدانى للرينو لوجان
قطع غيارها فى انتشار مستمر والعربية حكاية ومريحة وعالية وواسعة وسعر قطع غيارها قريب من الفيرنا واللانوس بس قارنى التوكيل بالتوكيل عشان تكون المقارنة عادلة
ممكن تدخلى على الغرفة الخاصة باللوجان وهاتستفيدى
ثانيا وهو الاهم طب السعر
ممكن تدفعى مقدمة 55 الف اللى معاكى والباقى تقسيط وتكونى اول مستخدمة للسيارة والقسط يكون 360 جنيه على 5 سنوات تبع البنك الاهلى فرع المعاملات الاسلامية