الموضوع: خليـــــك شجاع ! سمكر و رش سيارتك بنفسك !! - انا عملت كدة ! اياكم ! :)

السلام عليكم و صباح الخير علي الناس الحلوة !

بقالي كام شهر بزن علي كل واحد اشوفه .. عايز ارش - عايز اصلح - عايز - عايز ..

المشكلة ان كان عندي خبطة صغيرة في وش العربية عوجت حتة في بوز الكبوت

و حتة في الاكصدام " دمرت تماما "



بعد العلاج السريع :

عملتها بسرعة علي البارد كدة و من ساعتها وانا كاره العربية لدرجة اني بطلت انضفها او حتى احط معطر فيها .. وبقت مزبلة !

حتى موضوع الWaxing يتاع معاذ لما رحت كارفور اجربه ... اتكسفت ايدهم العربية من منظرها ... طبعا كل سيارات مصر فيها خدوش و بتاع بس لما تكون في وش العربية بتضايق اكتر .

المهم ... طلعت يوم الخميس رايح اغسل العربية .... كنت لسة واخد مكافاة من الشغل الحمد الله ..

فضربت في بالي الساعة 1:30 منا اروح للسمكري لو فاضي حخيلصها علي 12 باليل او بكرة علي الصلاة ! ( الخميس و الجمعة الي فاتو )

طلعت علي الاسطة رياض - راجل اتعرفت عليه قريب - زي العسل و الله و راجل سني و ملتزم جدا و اخلاق فعلا صعب تلاقيها في صنايعي حاليا .

المهم لقيته شغال في ورشتة ( معندوش مساعدين - هو بس ) الي في العاشر
كان بيمعجن هوندا بريلود Prelude حمراء .

المهم وقفت اتفرج و فكيت انا الشبكة بتاعتي و قعدت اشوف ايه عايز ايه ..

المهم معرفش ايه جه في بالي مسكت الشكوش و قعدت ادقدق علي حتت عالية في الكبوت .. لفيت الراجل بصلي .. قالي طب و هنا و هنا و قعدنا نشوف كدة ..

و خدت البتاع ده المكنة الي عملة زي الصنفرة دي بس علشان تشيل الدهان الموجود و ظبطت بيها اللاكصدام كله !

جيت بقى يا معلم للمعجون . وراني ازاي بيتخلط ببتاع احمر كدة زي معجون السنان
خدته يا ريس و دعكت بيه كل الحتت الي في الكبوت الي فيها واطي و الاكصدان نفس الشيء ..



و بعدين يااسيدانا لمدة ساعتين كاملين بالصنفراء و الماء و الصابون علشان نشيل المعجون الزيادة و يفضل بس الي مكان الخبطات او الاماكن المنخفضة في السيارة .

و العملية دي اتكررت مرتين ( وشين ) .

لحد ماوصلت للنتيجة دي :




طبعا لفيت حاجات في اعلي الكبوت عايزت تتعمل - شكرا للناس و الكلاب و الشجر فابالمرة اتعملت .

جينا بقى للمرحلة قبل النهائية . و هي الفلر (Filler) و دي فكرتني بايام الكلية لما كنا بنلون المشاريع بالِAirbrush .

المهم رحنا اشترينا علبتين علبة فللر رصاصي كدة و عبلة تانية زي زيت كدة بيتضاف عليها - تمنهم تقريبا 30 جنيه .

شغلنا الكومبروسور و مزجنا الفلتر بالزيت ده ( نيست اسمه والله ) و حطينها في مكنة الرش .

و اخدتها انا منه بقى !! و اوعى وشك !!

و دي كانت النتجية بعد الفلر :



اليوم بقى كان اتاخر و كان الخميس و الساعة 7 .. و انا لازم اخرج يوم الخميس .. رحت اخدت المدام ( بالمنظر ده - :arghh: ) و طلعنا روحنا Cinema فيلم Ironman ( بعد اقناع فوق الساعة - و طلع لذيذ يعني )

و اتعشيت و روحت البيت نمت - صحيت صليت الجمعة و استعديت للمعركة النهائية ز

رجعت تاني للأسطة رياض ... قالي امسك الصنفرة و ادعك في العربية لحد متعيط !
قعدت ادعك لما ايدي ورمت .. لمدة ساعة تقريبا .

و جه وقت اللون !

خد الكود بتاع العربية من الباب و طلعنا علي ورشة جنبنا كدة .. قعده يظبكوا حاجات علي الكومبيوتر لحد مداله كام رقم كدة .. راح شاريهم .. خلطهم ,, واشترينا ورنيش ميتاليك و جه وقت التجربة .

بصراحة مرضتش اتدخل اوي في موضوع ظبط اللون ده اكتفيت بالتعليق علشان كنت خايف اطلع لون تاني خالص !!

المهم ظبطنا اللون و في مكنتين في الكابينة ( فيكنا الفوانيس و غطينا السيارة تقريبا كلها بورق الجرائد و السكوتش ) .
و دخلنا علي الكابينة بقى بتاخد من 30 الى 40 جنيه علي العربي

و الراجل دخل علي الكبوت ( قلت صاج برده :) ) وانا مسكت الاكصدام !

ساعة زمن العربية خلصت يا جدعان و وفضل ورنيش المياتليك عملته كله !

وقعدنا بعدها نلمع وبتاع !

و وصلنا لكدة :





طبعا اللون مفيهوش غلطة بس في شوية حاجات انا السبب فيها طبعا
يعني اول مرة ارش و كدة .. بس بصراحة متشوفهاش الا لما تدقق يعني !!

و الموضوع كله اتكلف 70 جنيه بدل من 300 علي الاقل و استفدت و اتعلمت و استمتعت بوقتي جدا جدا :)

ارجوا اني اكون افدتكم

معرفش اخد صور جو الكابينة علشان بناء علي كلام واحد صنايعي مفتي ان الموبايل ممكن يبوظ جوا . !!