الموضوع: علي الناصية يوم 6/4

استكمالا لموضوع فضفضه مواطن مصري ، أقص عليكم قصة من الواقع
يوم 6/4 كلنا طبعا فاكرينه
كنت فاتح الراديو و لقيت برنامج علي الناصيه ، أسيبكوا مع الحوار علي قد مانا فاكر:

- إحنا دلوقتي أمامنا واحدة ست واضح إنها بتشتغل في شركة خاصة للنظافة، أهلا بيك
- أهلا (بطيبة واضحة).
- إنتي بتشتغلي في شركة نظافة متزوجة
-أيوه
- عندك عيال
- ثلاثة
- طب بتفكري تخلفي تاني
- لا الحمد لله بس نكفيهم
- جوزك بيشتغل إيه
- كهربائي أرزقي
- يعني إيه أرزقي
- يعني علي باب الله حد عايز يركب لمبه يصلح فيشه علي قده كده
- و بتاخدي كام في الشهر
- 200 ج
- 200 ج !!! ، تعرفي يا . . . . إن مصر كلها بتتكلم عليكي
- بتتكلم عليا أنا ليه (بلهجة كلها براءة و تعجب).
- علشان نفسهم يعرفوا إنت عايشة إزاي
- ؟؟؟؟؟
- معلش من غير متزعلي بس أنا حاسألك شوية أسئلة علشان الناس نفسها تعرف إنتي عايشة إزاي
- تحت أمرك
- أولادك في سنة كام
- واحد في ثانوي تجاري و التانيه في اعدادي و التالت في ابتدائي
- حد فيهم بيشتغل
- لأ
- جوزك بيعمل فلوس كام في الشهر . . تقريبا كده
- يعني هو ارزقي فممكن يشتغل يوم و يريح عشرة يعني حوالي 90ج
- إنتي ساكنه بكام
- حجرة بمنافعها بـ 100 ج في الشهر
- 100 ج !!! ده نص المرتب
- فطارككم بيتكلف كام
- 2 ج بنص جنيه عيش و نص جنيه فول و نص جنيه فلافل و نص جنيه مخلل
- طيب كده يبقي 160 ج و الغدا
- علي حسب الظروف يعني عادة كشري و عيش
- طب المدارس
- العيل بيتكلف حوالي 10ج في الشهر
- يبقي 190 ج
- معلش أنا مش قصدي حاجة بس بتاكلوا لحمه
- لما ربنا بيسهل باروح أجيب 0.5 كيلو لحمة من المستوردة طبعا بـ 10ج و كل واحد بياخد حتة لحمة
- كل قد إيه
- لما ربنا يسهل يعني ممكن شهر آه شهر لأ لما ربنا يسهل
- طب و في العيد بتعملي إيه
- لما ربنا يسهل باشتري 2 ك لحمه علشان عيد و لازم ناكل لحمة كل يوم
- و نعم بالله بس إزاي ربنا بيسهل
- يعني حد بيديني عيديه 10ج و لاّ حاجة أو كيس لحمة
- و العيال بيبقوا مبسوطين
- طبعا بيبقوا مبسوطين
- طب معلش سؤال كمان بتجيبي هدوم كل قد إيه
- يعني كل عيل ترنج في السنة لما ربنا يسهل ، ترنج من العاديين دول مش الغالين يعني الواحد يعمله 20ج

- بدون تعليق -

المشاركة الأصلية كتبت بواسطة ahmodium

احنا بناكل كويس
بنام نومه كويسه
عايشين عيشه محترمه
راكبين عربيه
عندك كمبيوتر ودش وتلفزيون
بتخرج مع اصحابك
بتتفسك
بتقبض مرتب مش قليل
بتشرب مياه نضيفه

ومع ذلك
كل واحد فينا
عنده مشكله
مشكله صغنتوته جدا
جدا جدا
بس تلاقيها
منغصه عليه عيشته

مع أنه لو بص للناس دي

هايعرف ان ربنا بيحبه
وفضله على ناس كتير غيرهم


يا ربنا لك الحمد كما ينبغي لجلال وجهك وعظيم سلطانك

لك الحمد على ما انعمت به علينا

كل اللي انت قولته انا حاسس بيه جدا و عشان كده الواحد مننا لازم يحمد ربه عز و جل مش مجرد بالكلام لكن بانه يمد ايده للناس اللي زي الست دي بالمساعدة و ما اكترهم
صدقني العطاء في الاسلام علاج لكل هموم الدنيا و في نفس الوقت رحمة بالناس اللي ربنا قدر عليهم في رزقهم او صحتهم
تخيل ان الام دي مرضت-لا قدر الله-ولادها حيحصلهم ايه؟ لازم يكون فيه ناس تساعدها و تعطف عليها
على الاقل دي انسانة رفضت الحرام وبتأكل ولادها بالحلال ربنا يكرمها و يبارك لها
و ربنا يغفر لنا تقصيرنا في شكر نعمه و في مساعدة غيرنا