الموضوع: تجربتى مع زيت شل هيلكس الترا

المشاركة الأصلية كتبت بواسطة mmamdouh

زى ما معظمكم عارف انا بستعمل زيت فيسكو بس قلت اجرب زيت شل هيلكس الترا عشان ناس كتير شكرت فيه

انا حطيت زيت شل هيلكس الترا فى شهر مارس اللى فات... هو كان ب 250 جنية وقتها يعنى اغلى من فيسكو 5000 ب10 جنية... مش فارقة كتير

بعد ما حطيت الزيت محسيتش باى فرق بينة و بين فيسكو من ناحية الصوت... الموضوع هو هو... اللى لاحظتة بعد كدة ان معدل شغل مراوح التبريد بقى اكتر من الاول... يعنى المراوح بقت تشتغل بفواصل اقل من الاول بس طبعا حرارة المكنة متغيرتش خالص... برضة قولت مش مشكلة

المشكلة الفعلية حصلت عند حوالى 6000 كيلو من الاستخدام... فى يوم نزلت مشوار صغير لقيت صوت الكستبانات عالى اكن العربية فيها كستبان تالف... انا اتخضيت و قولت ابص على التاكيهات و الكامة و لقيتهم سلام قولت يمكن انا جريت بالعربية و هى لسة باردة فا حصل كدة (مع ان دة عمرة ما حصل مع فيسكو فى نفس الظروف) و بعد ما سيبت العربية ساعة و نص و دورت الصوت راح

الموضوع اتكرر تانى و انا ماشى بالعربية عادى و راجع من الشغل ولا كنت بحرق ولا بجرى اصلا و برضة الصوت راح لوحدة... اخر مرة حصل كان من 3 ايام و الصوت طلع بعد ما حرقت شوية على الموتور و استمر فترة طويلة حتى و انا ماشى هادى خالص... هنا قررت اغير الزيت و مستعملوش تانى

بالنسبة لمعدل البخر يعتبر كويس بالنسبة ل9 شهور شغل و حوالى 9000 كيلو سواقة فيها كتير قرص و حرق.. زية زى الفيسكو بس قصة صوت الكستبانات دى هى اللى خلتنى اقرر ارجع تانى للفيسكو

النهاردة الصبح روحت نزلت الشيل و حطيت فلش و رجعت تانى للفيسكو (بقى ب250 جنية) و قررت كمان مجربش حاجة تانى فى موضوع الزيوت طالما الزيت اللى انا شغال بية مبشتكيش منة

mmamdouh

نفس الموضوع حصل معاية فى الفيرنا حطيت الشل الترا فى صيانة ال 10000 وﻻحظت ان الموتور صوته بقى اعلى و السحب مش حلو فى ايام الحر و صوت الكستبانات كان من وثت للتانى بيظهر فنزلته من العربية على 6000 كم و نتيجة لظروف مادية حطيت زيت التعاون xpl-sm 20w-50 و بفكر استخدم بعد كدة زيت فالفوين التخليقى و ياريت يغير فكرتى عن الزيوت التخليقية بعد الى شوفته من شل.