الموضوع: القدرة الحصانية و السرعة القصوي و أشياء أخري (شاركونا برأيكم..)

السلام عليكم..
يا جماعه انا شايف ان الوضع دلوقتي بالنسبة لأي حد بيفكر يشتري عربية جديدة..
زيرو او حتي مستعمله.. انه من اهم الحاجات اللي بيبص عليها و بيقارن بناء عليها القدرة الحصانية للموتور
و السعة اللترية و السرعة القصوي.. ومش هاكدب عليكم انا عن نفسي اكيد الحاجات دي بتبقي في بالي برضه..

و لو لاحظنا برضه في احيان كتير جدا في المقارنات واللي دايما بيبقي فيها عامل من التحيز شوية من الواحد لعربيته
بيبقي احد الاسباب ان عربيتي مثلا كام حصان.. و بتوصل من 0-100 في كام ثانية..

طيب.. ده كلام جميل قوي..
بس لما في مرة قعدت افكر كده شوية في الكلام ده.. لقيت ان الكلام ده كله انا شايف انه كلام تسويقي اكتر منه عملي في الشارع المصري..
و اكرر السوق المصري بالتحديد.. ليه .. تعالوا نفكر سوا بصوت عالي..

لما نتكلم عن السعة اللترية.. يمكن من فترة مش كبيرة قوي.. كانت الناس بتبص علي ان العربية اللي السعة اللترية لمحركها اعلي تبقي احسن و اقوي..
اكيد الكلام ده منطقي طبعا وصح.. اي نعم دلوقتي بعد موضوع البنزين الامور اختلفت شوية..
بس هنلاقي ان الموتور اللي السعة اللترية بتاعته اعلي شوية هو فعلا اقوي.. بس لفظ اقوي ده اكيد نسبي.. مش مطلق..
بمعني.. ان الموتور اللي السعة اللترية بتاعته اقل شوية.. ممكن جدا ان قوته تكون مقاربة او الي حد كبير مقاربة للموتور الاعلي في السعة..
ولو بصينا بقي لحاجة تانية مهمة قوي.. ان قوة الموتور اللي السعة بتاعته اقل ده ممكن تكون كافية جدا لاستخدامات الواحد مننا اليومية او حتي السفر بعربيته.. لما نتكلم عن القدرة الحصانية و السرعة القصوي الامور هتتضح اكتر..

تعالوا مثلا نشوف القدرة الحصانية..
تلاقي عربية نوعها اكس قدرة محركها 125 حصان.. و التانية قدرة 105 حصان.. طيب ده كلام جميل.. الموضوع مش بكتر الحصنة اكيد..
احنا مش في سبق ولا في اسطبل.. ممن جدا ان القدرة الاقل دي تكون كافية جدا لاستخدامنا..
بمعني تاني.. الموتور اللي قدرته 105 حصان مثلا.. هترقي انه بينتج اقصي قدرة دي امتي..؟ عند عدد لفات موتور كبير..
و هتلاقي ان في الواقع تقريبا مفيش خد فينا بيوصل لعدد لفات الموتور اللي بتولد عندها اقصي قدرة للموتور.. ولو وصل ليها يبقي قليل قوي..
يا اما بقي هومن النوع الي غاوي يسابق بعربيته.. و دي نسبه من الناس اللي لا تتجاوز 5% من السوق في مصر..
وعند عدد لفات موتور منخقض شوية.. اللي هو في السواقة العادية بتاعتنا اللي هو بين 3 و 4 الاف لفة.. تقريبا هتكون القدرة المتولدة تقريبا متساوية.. او الفروق بينها طفيفة..

حاجة تانية.. السرعة القصوي..
مين فينا جاب اخر سرعة في عداد عربيته..؟؟ في ناس كتير هتقولي انا قفلت العداد..
كام واحد..؟؟ و قفلت العداد كام مرة..؟؟ و كام مرة من دول كنت حاسس ان الطريق قدامك يساعدك علي كده..؟؟
عل الطرق في مصر تسمح .. وباقول الطرق مش القوانين.. ان الواحد يجيب سرعة كبيرة بعربيته..؟؟
هل الواحد فينا ممكن يأمن علي نفسه في شوارع و طرق البلد دي..؟ والموضوع مش طرق وبس.. لأ طرق و تصرفات غير محسوبة من مستخدمي الطريق..
يعني تضمن انك وانت ماشي في امان الله.. تلاقي خفرة في وسط الطريق..؟؟
تلاقي مطب صناعي مستخبي و من غير علامات ولا عواكس..؟؟
متلاقيش حجر مشرف في وسط اطريق..؟؟ شوية رمل ولا زيت ..؟؟
واحد راكن علي الشمال بيغير فردة كاوتش ولا حتي عربيته عطلت كسل يحركها للجنب التاني..؟؟
ولا واحد سايق نقل بسرعة 50 كم/س علي الشمال..؟؟
قولي ساعتها ممكن تعمل ايه..؟؟ هل هتلحق حتي انك تتشاهد.. (عافانا الله و اياكم.. ورزقنا الشهادة عند الموت..)
حتي لو العربية فيها امان ايه و فرامل ايه.. مطب او شوية زيت مفيلة انها تقلب العربية.. مش هاقولك خسائر في الارواح.. ربنا يسترها معانا جميعها..
هاتكلم في الاسهل من كده.. فلوس كتير قوي في تصليح العربية..

كمان حاجة.. التسارع من الصفر لل100 كم.. كام واحد فينا جرب الموضوع ده..؟؟ و فين ممكن تجربه..
وهل الامر يتعدي التجربة..؟؟ عشان تشوف الرقم اللي مكتوب علي النت ده ولا فغي الكتالوج صح ولا لأ..؟؟
بيتهيألي الاجابة باجماع هتكون محدش جرب اصلا.. (انا جربته مرة بس ملحقتش اوصل لل100 اصل عشان عجايب الطريق.. )

بلاش كل الكلام اللي قولت عليه.. الناس اللي بتتناقر و تتشاحن بخصوص ثبات العربية..
الناس فاكرة ان الصبات يعني وانت ماشي علي 200 و ماسك الدركسيون كويس.. وماشي في خط مستقيم..
ماهي اي عربية ممكن توصل للسرعة دي وهي كويسة و شوية هوا بس يخلوها تروح و تيجي..
لكن مين فينا اصلا كان شجاع انه يجرب يحود الدركسيون اصلا وهو علي سرعة اعلي من 120 ولا باقصي تقدير 140؟؟
هل حد جرب..؟؟ و لو جربت..؟؟ هل كنت واثق في عربيتك..؟؟ ولا مكنتش خايف و مرعوب احسن العربية تلف منك و تعمل مصيبة..؟؟
الحالة دي الواحد مش بيجربها غير مرة واحدة لا قدر الله وهي انه لو كان خلاص فيها مصيبة و كده كدهخربانة خلاص..
يعني اعملها و يا طابت يا 2 عور.. (لا قدرالله..)

اكيد طبعا ان الكلام اللي باقوله ده مش ساري علي كل العربيات .. يعني تقريبا كلنا عربياتنا مش مؤهلة او بمعني تاني
صعب اننا نعمل بيها الكلام ده.. هتبقي في خطورة علينا..
و الاخطر من كده ان الطرق في مصرنا هنا.. لا تسمح نهائي بالحاجات دي..
ولا حتي اننا نوصل لأننا نجرب اقصي امكانيات العربية من ثبات و سرعة قصوي و قدرة حصانية..
ولو سمحت اننا نجرب بنبقي حاطين ادينا علي قلبنا من المفاجأت..

اتمني اني اكون قدرت اوصل وجهة نظري للناس..
وهي كالتالي..
الفروق بين العربيات في الامكانيات اللي قولتها دي كلها بسيطة قوي بالنسبة للسوق بتاعنا هنا..
يعني.. كمبصش للنقط دي نظرة اساسية لما نفكر في عربية.. خلينا نكون واقعيين و نعرف بنشتري عربية عشان احتياجاتنا فيها ايه..
خلينا مش نكون متعصبين لعربية في مصلحة عربية عشان موتورها اقوي 10 حصان.. و نتخانق و نحتد علي بعض بسبب كده..
خلينا بلاش نجرب الحاجات دي عشان اللي يعمل كده بيبقي فعلا في خطر جامد جدا علي روحه ..
عشان للأسف طرقنا غير مؤهلة اننا نمشي فيها بعربيات اساسا.. اخرها عربيات نص نقل.. و تستحمل الطرق دي بالعافية اصلا..

انا اسف جدا علي الاطالة..
ووقانا الله و اياكم شر الحوادث و شر مفاجآت الطريق..

أنا معاك في كل اللي انت قلته ..
بس أحب أتناقش في الموضوع دة برضه ..
بالنسبة لإحتياج الشعب المصري مش هتزيد عن محرك 1300CC ليه .. ؟1
1- الإحتياج اليومي للسيارة مش هيزيد عن المشوار من الشغل او الكلية للبيت و العكس بالإضافة إلى المشاوير الليلية و الفسح و طبعاَ كلها بتبقى داخل البلد .
2- المحرك ال 1300CC يصل ببعض السيارات إلى سرعة 170 و 180 كلم / ساعة في حين إن السرعة الرسمية و المقررة للطرق السريعة في مصر 120 بما فيها الطرق الحرة و مش هتزيد عن 140 مستقبلاَ في حالة تطوير الطرق و زيادة السرعة يعني عندنا 40 كلم / ساعة سرعة قصوى زيادة عن الحاجة .
3- المحرك ال 1300CC فأقل بيؤمن عزم مناسب لنقل ال 5 أفراد الموجودين داخل السيارة بالإضافة إلى أمتعتهم .
4- بالنسبة للشباب اللي بيقول لك أنا قفلت العداد و حبت 200 و 210 كلم / ساعة و بيتباهى , طيب ال 210 دي ممكن تيجي برضه على موتور صغير ( محدش ياخد كلامي دة على إنه دعوة و تحريض على تقفيل العداد ) .
5- بالنسبة للتوكيلات في مصر هنا بتستغل إن الشعب المصري مش عارف مصلحته و بيشتري عربيات كبيرة و قوية و بتنزل فئات و موديلات كثيرة لإستنزاف جيوب المصريين , عندك مثلاَ التويوتا الكورولا الجديدة نازلة ب 1400CC 110HP & 1600CC 142HP طيب ليه تنزل المحرك ال 1600CC مادام التاني قوي و مكفي لإحتياجات أي أسرة تنزل بقى ال 1600CC ليه .. ؟!
بالنسبة لي أنا ببحث عن القوة بس القوة المعقولة يعني في حدود ال 110 حصان لأني ماشي بمبدا
YOU HAVE SOMETHING WHEN YOU DON'T NEED IT BETTER THAN YOU NEED SOMETHING WHEN YOU DON'T HAVE IT .
مع خالص تحياتي ..
:):)