تجربتي مع بروتون واجا لمدت سنتين و3 شهور
انا هقول رأي وياريت الناس تتقبل الرأي ده لانه عن تجربة
ويمكن العيوب اللي شوفتها في العربية تكون حالة فردية من وجهة نظر الناس بس كل مااروح التوكيل اسمع عيوب غريبة اول مرة اسمع عنها
العربية دلوقتي عاملة 35600 كم واجا اوتوماتيك موديل 2009
تجربتي مع الزيوت كانت .. توتال5000 .. توتال 5000 .. بعد كدة فيسكو10000 .. فالفولين 5000.. ليكومولي 5000
احسنهم كان بصراحة هو التوتال
المميزات .. الثبات المعروف عن البروتون طبعا وقوة الموتور على السرعات العالية .. العربية مريحة في السفر والكراسي مريحة .. واسعة من ورا وقدام .. شنطة واسعة .. تصميم شيك وجميل من جوا
العيوب .. هاتو ورقة وقلم واكتبو ورايا :))
1- التوكيل .. وكلنا عارفين التوكيل بيعمل ايه (عدم الخبرة الكافية في التعامل مع المشاكل )
2- ارتفاع استهلاك البنزين بطريقة غريبة بتوصل ل 120 كيلو في الصفيحة وعلى الطريق السريع على سرعة 100 ثابتة بتستهلك حوالي 200 كيلو في الصفيحة (مع عدم خبرة التوكيل في التعامل مع المشكلة )
3- الخامات الزبالة والتقفيل الازبل .. والاصوات اللي من كل مكان
4- الارتفاع المبالغ فيه للعربية الواجا بدون اي سبب منطقي وكمان تغير مقاس الجنوط من 16 الى 15
5-عيوب صناعة منتشرة في العربية ( تغيير علبة الدريكسيون 3 مرات واخيرا تم عمل التعديل واختفاء الاصوات نهائي .. تغيير مكن الزجاج الامامي مرتين يمين ومرتين شمال .. تغيير بلي العجل الامامي .. ظهور عيب في طرمبة الباور .. استهلاك البنزين .. اصوات العفشة والمساعدين .. تغيير المقص اليمين امامي .. تغيير موتور رشاشات مية المساحات .. رعشة في العربية وهيا واقفة بدون سبب علمي وعدم دراية التوكيل عن كيفية حل المشكلة .. العفشة ناشفة جدا جدا مقارنة بالجين2 وعربية واجا تانية )
6- سوء خامات الطنابير والتيل (الفرامل دايما بتصفر معايا حتى مع التيل الاصلي اللي كان مع العربية )
ودي العيوب اللي عندي في العربية بما يرضي الله ومش مألف حاجة من عندي وكله بالورق والمستندات وللاسف مش عارف اخد حقي ومنصحش حد يشتري العربية دي ولا يشتري بروتون اصلا الا هيكره نفسه زيي بالظبط واعتقد انها مش عيوب فردية لاني شوفت العيوب دي كتير في التوكيل ومحدش يقولي اني بهين العربية وانا السبب في اللي فيها .. بس يعلم ربنا اني بمشي بهدوء شديد خصوصا في الطرق المتكسرة ومبخدش بلاعات والكلام ده ومع ذلك ظهر رفة في ال4 جنوط واعتقد السبب في العفشة الزفت
وحسبي الله ونعم الوكيل