الموضوع: كوردوبا 94 و لا فيكترا 94

حضرتك بتقارن عربيتين مش هقول قريبين من بعض لكن الأتنين حلوين

بس انا اعتقد الأوبل هتبقي افضل

لعدة اسباب مش من فراغ

اولا اوسع
ثانيا بجد اقوي بكتير
ثالثا هتخلص من قطع الغيار الغالية بزيادة وهتركب عربية مش هتحس بمصاريفها لو حالتها نظيفة
رابعا هتركب شئ مختلف تحبه
خامسا ودة المهم والأهم قسم اوبل زاخر بأعضاءه من الباشا لأجدد عضو هتلاقي روح تانية خالص غير قسمنا هنا من دعم فني علي اعلي مستوي لحب لود لمشاركة

هحكيلك موقف حصل معايا في قسم اوبل : مردة دخلت عملت موضوع هناك تاني يوم بفتح لقيته مش موجود روحت عامل موضوع تاني بسأل فيه علي موضوعي الأولاني وانكم ازاي تمسحوه مع اني ماقولتش الفاظ خارجة او غلطت فحد دة انا كل ماهونالك كنت بسأل علي حاجة
اتفاجأ ان موضوعي موجود بس في الصفحة 3
انا فاكره زي عندنا ممكن تعمل موضوع وتغيب عنه شهر تلاقيه بقي ترتيبه 5 او 6 بالكتير هناك لو عملت موضوع وبعدها ب5 دقايق عملت refresh للصفحة ممكن تلاقيه نزل بقي نهاية الصفحة

الأوبل عربيات جميلة فعلا ومكنتش عارف كدة لحد لما اخويا اشتري اوبل وركبتها
اللهم صلي علي النبي علي الأوبل
ثبات
قوة
سرعة
وسع
قطع غيار باسعار خيالية
دعم فني من قسم اوبل

لدرجة اني فكرت جديا اغير عربيتي واشتري اوبل بردو 94 او 95

بس هو كل الموضوع تشتري حالة نظيفة وزي عندنا اوعي تشتريها من شحات (كلمتك دي) ولو سمعت فيها 40 الف ثق تماما انها تستاهل طبعا بغض النظر عن المغالاة الفارغة

انا ارشحلك ال2000 هتحس احساس عمرك ماحسيته وياسلام لو اوتوماتيك وهي غالبا هتبقي اوتوماتيك لأن ال2000 المانيوال نادرة جدا فيها وبتبقي مواصفات رياضية

هي بس عيبها في بعض الحساسات فيها غالية بشكل لا تستطيع تحمله زي حساس اسمه الماف تخيل ثمنه كام - والله ما هتصدق - ثمنه بيعدي ال2400 جنيه ومن بق ركيب اوبل a
ايوة موديل 94 اسمها اوبل a

كمان الأكصدامات هتلاقيها اغلي من عندنا والصاج عاما اغلي
المواتير والفتيس اغلي من عندنا لو استيراد

بقيت قطع غيارها بيركب عليها قطع غيار الدايو لانوس
طبعا مش عيب في الأوبل ولا ميزة في اللانوس بس لأنهم هما الأتنين GM فبالتالي نص الموتور الفوقاني من عند وش السلندر متشابه جدا من اول جوان التاكيهات لحد البساتم والعفشة والدريكسيون وانت لو دققت وقارنتها بالدايو ريسير والسيليو هتلاقيهم واحد لدرجة الأبواب والشراعة الخلفية والسقف والفتيس وعصاية الفتيس واحد وكمان الموتور وقطع الغيار

ال1600 بتاعها قوي بردو وموفر جدا في البنزين بس عيبه انه مانيوال بس دة بجد الي هتلاقيه لانوس

توكل علي الله في الأوبل ومش هتندم واقعدلك يومين ثلاثة علي قسم اوبل وانت تعرف كلامي

التكييف بتاعها لو مظبوط علي الشعرة هتلاقيه تلاجة موز لكن لو مهييس هتلاقيه مروحة سقف
نفس الشئ الردياتير وشجرة المياة لازم يتظبطوا تمام عشان ماتشتكيش من الحرارة وهي عموما الطبيعي بتاعها تمشي 92 ومعاك لحد 98 دة عادي جدا فيها غير عندنا

عيوبها مش كتير
هو بس الحاجات الي قولتلك عليها
ولو متبهدلة ولا نص نص هتتعب معاها اوي اوي اوي

انا اصلي اتفرجت علي كام واحدة ومادخلوش دماغي بصراحة وصرفت نظر وصرفت علي عربيتي

هتلاقي منها المتبهدل اوي ودة طبعا تبعد عنه
وهتلاقي منها النظيف اوي بس دة نادر شوية

بالنسبة للكوردوبا ال94 مش بتختلف كتير عن الأبيزا بتاعتنا ومش هتبقي عملت حاجة
نفس الشكل ونفس الصالون ونفس الطابلوه والطارة وكل حاجة

هو بس في شنطة وياريتها واسعة زي الأوبل

والموتور 1400 او 1600 علي اقصي تقدير
وبصراحة دمها تقيل

لو نفسك في الفولكس والأبيزا اركب التوليدو
باشا
بجد باشا وتختلف كليا وجزئيا عن الكوردوبا والأبيزا

واسعة جدا جدا جدا
شنطتها كبيرة جدا جدا جدا
موتور 1600 16 صباب

عربية بجد وسعرها مش غالي بتعمل سكة 37 او 36 في الحدود دي وقطع غيارها مالية الدنيا من صاج لموتور وعفشة جديد ومستعمل

انا صدعتك

استخير ربنا وادخل علي قسم اوبل
واسمع كلام الناس هناك

هتلاقي عندك الباشا اسمه طناني باشا دة معلم اوبل وخبرة ومحترم جدا ومش بخيل في المعلومة اسأله اي سؤال يجي علي بالك في الأوبل وهو انشاء الله هيرد عليك اجابة شافية ووافية

والله المستعان
،
،