السلام عليكم
ارجو من اخوانى النصيحه والمشوره والمساعده على اتخاذ القرار والمساعده فى الشراء

منذ سنتين ونحن نبحث عن سياره جديد تلبى احتياجات اسرتى تتكون من اب وام وثلاث اولاد
مفيش غيرى انا وابويا بس الللى بنعرف نسوق كان عندنا عربيه زمان وبيعناها من 3 سنوات لظروف
والحمد لله ربنا كرمنا وقدرنا نجمع مبلغ نشترى بيه سياره جديده
وفضلنا لمده سنتين من البحث واللف على احسن قيمه مقابل المال

وطبعا اخواتى بيكبرو والاتنين دلوقتى فى بدايه مرحلتهم الجامعيه بس للاسف عمرهم ما ساقو عربيات وخلفيتهم ضعيفه جدا وده اللى خلانا نلغى من تفكيرنا مثلا شراء تويوتا كرولا اللى ابويا كان نفسو يجيبها

فى البدايه قررنا نجيب سانديرو او لوجان اخواتى منها يتعلمو عليها وفى نفس الوقت انا وابويا نسوقها عادى بس لظروف سن ابويا وظروف شغلى وانا داخل على جواز وهسيب البيت كان لازم اختيار سياره تناسب العيله اكتر

المهم قولنا اللى يدفعنا 76 الف فى عربيه مانيوال ورينو وقطع غيار غاليه نقسم البلد نصين
وفكرنا فى الصنى والانسر بومه اتوماتيك منها الاعتماديه والعمليه وبردو العيال تتعلم اسرع واسهل وتبقى اريح للحاج هوة الخير والبركه بردو

وكانت المشكله
1:الانسر بومه 2012 غليت 4 الف وبقت الاتوماتيك اول فئه ب 119 من غير ابى اس ولا جنوط
2:الصنى اتوماتيك اى بى اس ب 97 وبيقولو الشكل الجديد هينزل قريب

بعدها فكرت اجيب السوبر صالون ب 104 الف وتبقى كامله بكل وسائل الامان والكماليات وفى نفس الوقت فرق كبير اوى بينها وبين الانسر فى السعر
واكيد الشكل الجديد هيقعد سنه على ما ينزل واكيد اقل واجب هيبدأ ب 115 بالمقارنه بالكورى
اذا كان اليارس 1500 ب 135 الف جنيه

واذا كان على عيوب التقفيل بسيطه والتوكيل بيحلها وصيانتها وقطع غيارها الخارجيه القابله للكسر رخيصه وعلى موضوع استهلاك العالى للبنزين نسبيا ده بيقولو موديلات من 2011 فيها سنسور للبنزين غير ان الفرق على ما تستهلك العربيه 5 سنين مش هيفرق فى تمن البنزين زياده غير بتاع 3 ولا 4 الف جنيه عن اى عربيه تانيه فمش فارقه

معلش صدعتكم ووجعت دماغكم بالرغى
بس الخلاصه انى بدور على عربيه اتوماتيك اعتماديه عمليه تستحمل الظروف اللى قولتلكم عليها
وواخواتى هيتعلمو فى مراكز سواقه شويه بشويه ويسوقو وربنا يسترها وكل سنه وانتو طيبين
اخوكم فى الله