رابطة مالكى الاكسيل-الجزء الثانى

**Hossam Farouk** · 16-10-2014 02:22 PM

المشاركة الأصلية كتبت بواسطة Magoda

Hossam Farouk
ممكن تقولنا العفشة عندك اخبارها ايه
وتنصحنا بإيه لشد العفشة من قطع غيار لتخفييف الدب والرزع الكتير والمراجيح اللى بنحس بيها
وتقولنا على مكان كويس لتنجيد الكرسى الامامى (سروجى)

بص يا باشا الحمد لله العفشة عندى تمام وطرية جداً كل الموضوع ان أنا كل فترة بربط على العفشة وبكشف عليها باستمرار علشان لو فيها حاجة مش مربوطة كويس هتحس بالدب اللى بيحصل معاك بمعنى ان أنى من حوالى شهر كده مرة واحدة حسيت ان العربية كانت بتصرخ من العجلة الشمال صرخة خفيفة قوى أثناء الملفات والفرامل المطبات الصناعية وروحت كشفت لقيت مثلاً مسمار الميزان بتاع المقص سايب والكوتشة بتاعته واقعة فغيرته كمان مهم جداً الكاوتش والجنوط تكون سليمة ونوعية الكوتش تفرق كتير عن نفسى مجرب البردجستون ومبغيروش لأى نوع تانى أبداً لأنه طرى على العربية وبنفخه نيتروجين بيبقى تمام التمام بالنسبة للمساعدين فأنا جايب مساعدين أمامى يابانى kyb وخلفية kyb وبغيرهم كل لما بكشف على العربية والعفشجى يقولى تعبوا غيرهم وبالمناسبة أنا بتعامل مع عفشجى يعرف ربنا لو حد يسمع عنه اسمه مدحت الباشا فى منطقة اسمها منيل شيحة بعد المنيب بشوية وطبعاً الجلب والكاوتش بتاع العفشة كله بكشف عليه سواء الخراطيم بتاعة السوست والبطاحات وكاوتش علبة الدركسيون وحتى دايما أنا بفحص بنفسى كوتش الكبالن جوه وبره يعنى من الأخر أنا دايما متابع كل حاجة فى العربية لأنها بصراحة إيدى ورجلى مبقدرش أستغنى عنها أبداً فعلى طول أول ما بسمع أو أحس بحاجة فيها بعملها على طول ومبسكتش لحد لما الدنيا تبوظ
بالنسبة للسروجى أنا شادد صالون كامل أرضية مشمع لونه رمادى وكراسى جلد كامل لونين أسود ورمادى وكمان البتاعة القماش الموجودة فى فرش البيبان كاسيها جلد وفكيت السقف ونظفته عنده بالمياة والصابون والتابلوه اللى ورا والشنطة أرضية جلد مع المحافظة على الحاجة بتاعة العربية الأصلية وكمان صيانة الكراسى عند واحد فى منطقة اسمها أم المصريين فى الجيزة أسمه لطفى ولد محترم جداً وإيده تتلف فى حرير وعنده أى تفصيلة انت عايزها للكراس
وتحت أمرك فى أى استفسار بس ياريت حد يقولى ازاى أرفع صور عشان كل مأرفع صور على المنتدى يدينى رسالة يقولى بيعملوا صيانة للموقع أنا بس عايز أورى الأعضاء الكرام الشغل اللى معمول فى العربية مش أكتر فى ناس عايزة تشوف الفوجات وناس عايزة تشوف شغل السروجى ومش عارف أرفع الصور

**Hossam Farouk** · 16-10-2014 02:24 PM

المشاركة الأصلية كتبت بواسطة dramyd

:y_hi_3[1]: حســـــــــــــــــام باشا ... حمدلله على السلامــــــــة :y_hi_3[1]:
وحشتنا يا راجل ... الحمد لله انك خلصت شغلك على غير ويارب تكون بافضل حال .

ازيك يا رامى باشا والله أنت كمان واحشنى كتير ربنا يباركلك واسمع عنك دايما سمع خير يارب

**Hossam Farouk** · 16-10-2014 02:29 PM

المشاركة الأصلية كتبت بواسطة magoda

هو تغيير فلتر الهواء كل قد ايه انا بقالى فترة كبيرة مغيرتوش ولا نضفته

فلتر الهواء من الحاجات المهمة جداً فى العربية وبيخنق العربية جداً ويخلى سحبها مش حلو وكمان لو فيه تراب كتير ومش نظيف التراب ده بيدخل على الكربيراتير ويسد البيكات ويوسخ الكربيراتير وتغيير أو نظافته مهم جداً أنا شخصيا مع كل تغييرة زيت بنظفة بالهواء عند بتاع الزيت تقريباً الكلام ده ممكن يكون كل شهر ونصف أو شهرين وبغيره مع تغيير طقم السيور والفلاتر بتاعة العربية يعنى تقدر تقول كل 20000 كم

**mado83** · 16-10-2014 02:39 PM

المشاركة الأصلية كتبت بواسطة magoda

هو تغيير فلتر الهواء كل قد ايه انا بقالى فترة كبيرة مغيرتوش ولا نضفته

لا شيله وارميه ولما تبقى تجيب جديد ركبه

**hamisa08** · 16-10-2014 04:30 PM

النهاردة الصبح عملت اختبار البيضة لمدعو ثرموثتات الكوعة اللى انا خالعة من عندى

بصراحة ساعات بحس انى محتاجها وساعات بقوول مش طلبة سخونية ومش كل لما اجى ابطل العربية الاقى المروحة شغالة

غليت مياه فى البراد بتاع الشاى حتى درجة الغليان وجبت المدعو ثرموتات الكوعة وفضيتها علية فى حلة صغيرة

وقعدت اتفرج عليها كان نفسى اصورها بس كنت خايف اتاخر فتحت مظبط حوالى 3 الى 5 دقايق وفاتحة مش كبيرة اووى وقفلت تانى برغم من سخونية المياه

لما قفلت افتكرت ان مياه خلاص بردت وحطيت ايدى علشان امسكة

ويارتنى مافكرت امسكة المياه كانت لسة سخنة موحوحة

المهم ايدى اتسلقت ,, والمدعو قفل لية والمياه لسة موح وحة

بفكر اجيب واحد تانى فحد يعرف سعرة و فى منة درجات حرارة زى ثرموثتات الريداتير 80 و 90 و 70

ولا هو واحد بس

نقرة : كلمة " المدعو" كناية لشتيمة قبيحة بس لابد من تمسك بالاخلاق وقواعد المنتدى

**ahmedyousryk** · 16-10-2014 04:43 PM

المشاركة الأصلية كتبت بواسطة hossam farouk

التيل اللى فى العجلة اللى ورا بيشتغل مع فرامل اليد أو مع الفرامل المفاجأة ولازم يكون سليم ديه حياتك

اصل لسة مغيرنية من كام يوم وشايف ان فية لسة كتير ودة اول مرة يفتح الفرامل الى ورا من ساعة ما العربية جت فاستغربت يعنى ازاى تيل يقعد دة كلة

**dotsalah** · 17-10-2014 04:32 AM

ممكن حد يصور لنا الشداد اللى بيقولوا علية علشان اتا مش من القاهرة و عاوز اعمله

**Hossam Farouk** · 18-10-2014 06:41 PM

المشاركة الأصلية كتبت بواسطة ahmedyousryk

اصل لسة مغيرنية من كام يوم وشايف ان فية لسة كتير ودة اول مرة يفتح الفرامل الى ورا من ساعة ما العربية جت فاستغربت يعنى ازاى تيل يقعد دة كلة

التيل اللى ورا بيعيش أكتر من التيل اللى قدام عمره أطول لأنه مش عليه تحميل كتير زى التيل اللى قدام عشان كده هيقعد معاك كتير ويا باشا مش مشكلة أديك برضوا اطمنت عليه

**شريف ناصر** · 18-10-2014 10:51 PM

أسعار الشراء كاوتش ميشلان أسعار شراء اليوم الفردة 450 الخمس فرد 2000 من مدينه نصر عند النادى الأهلى و نصيحه منى أفعلوا مثلى شراء خمس فرد يكون عليهم ديسكاون ( تخفيض ) أكثر و فى حال تلف فردة تماماً بدل المشى بأستبن ذو نقشه و شكل مختلف تحول التالفه لأستبن و تنزل الأستبن لفردة عاديه و هذة الأسعار بالترصيص متبقى فقط ضبط الزوايا .
تحياتى

**hamisa08** · 20-10-2014 08:08 PM

عايز اجيب زيت شل الاصفر اجيبة منين ؟؟؟ وبصراحة انا بقلق من ورش تغيير الزيت

وشركة توتال اشتريت شركة شل ,, بمعنى فى اى بنزينة مش هتلاقى زيوت شل خلاص ,, اجيبة منين بقى ولا اية البديل ؟؟؟