رابطة مالكى الاكسيل-الجزء الثانى

**mado83** · 07-08-2014 10:31 AM

كلنا عندنا مشكله الكراسى وتنجيدها وماحدش لاقى حل
طب ماتيجو نحط ايدينا فى ايد بعض ونجمع مثلا عدد معين هنقول 5 عربيات محتاجه تنجد الصالون
وحد يدور على سروجى كويس ويتفق معاه ان هيجيلو 5 عربيات ويعمل خصم حلو
ايه رايكم فى الموضوع ده بس مايكونش جينز كار
احنا عاوزين حد يكون على قده فى الفلوس وفى نفس الوقت صنايعى شاطر

**dramyd** · 07-08-2014 10:48 AM

المشاركة الأصلية كتبت بواسطة Magoda

عندى نفس مشكلتك بالظبط مع العلم مغير ديسك واسطوانة وبليه وسلك دبرياج ومزود زيت !!!!!

مجودا ... صباح الجمال .
لو انت عملت دة كلو .. ولسة عندك زعقة فى غيار معين او اكتر ...
يبقا غوايش الغيار دة ودعت .... واوعاااااااا تغير وتصلح غوايش ...

نزل فتيس تانى ... على طول

**dramyd** · 07-08-2014 10:49 AM

المشاركة الأصلية كتبت بواسطة mado83

كلنا عندنا مشكله الكراسى وتنجيدها وماحدش لاقى حل
طب ماتيجو نحط ايدينا فى ايد بعض ونجمع مثلا عدد معين هنقول 5 عربيات محتاجه تنجد الصالون
وحد يدور على سروجى كويس ويتفق معاه ان هيجيلو 5 عربيات ويعمل خصم حلو
ايه رايكم فى الموضوع ده بس مايكونش جينز كار
احنا عاوزين حد يكون على قده فى الفلوس وفى نفس الوقت صنايعى شاطر

بس قولى انا بسمع كتير عن جنز كار ...
هو غاااااااااااااااااااااااا لى اوى كدة ...

**Magoda** · 07-08-2014 12:12 PM

المشاركة الأصلية كتبت بواسطة dramyd

مجودا ... صباح الجمال .
لو انت عملت دة كلو .. ولسة عندك زعقة فى غيار معين او اكتر ...
يبقا غوايش الغيار دة ودعت .... واوعاااااااا تغير وتصلح غوايش ...

نزل فتيس تانى ... على طول

فى واحد كشرى كان بيروحله فى الجيزة كان بيقول بيفك الفتيس ويظبطة وبيبقى حرير ايه رأيك
كشرى ده نيك نيم لواحد كان معانا هنا فى الرابطة اسمه محمد جلال

**Magoda** · 07-08-2014 12:14 PM

المشاركة الأصلية كتبت بواسطة dramyd

بس قولى انا بسمع كتير عن جنز كار ...
هو غاااااااااااااااااااااااا لى اوى كدة ...

بيطلع منه شغل عالى اووووى وبيجيب خامات نضيفة جدا انا شفت شغله فى عربية ومكنتش اعرف صاحب العربيه وروحت قلتله حضرتك عملت الشغل ده عند جينز كار فقالى اه انت عرفت ازاااى

**dramyd** · 07-08-2014 12:44 PM

المشاركة الأصلية كتبت بواسطة Magoda

فى واحد كشرى كان بيروحله فى الجيزة كان بيقول بيفك الفتيس ويظبطة وبيبقى حرير ايه رأيك
كشرى ده نيك نيم لواحد كان معانا هنا فى الرابطة اسمه محمد جلال

مفيش صنايعى بيفك الفتيس ويقولك اقل من 150 -200 ج ... دة لو هيغسلة وينضفة بـــــس .

لما يبقا حوار غوايش وفك وتركيب مبيكلموش فى اقل من 300 وانت طااااالع .... وبتسمع ارقام غريبة .

ـــ مرة اخويا راح بلانوس لواحد فى شبرا مصر مشهورررررررررر جدا جدا ... كان الفتيس عاوز يغير غوايش الغيار التالت ... قالو فك وتركيب وقطع اللى هنركبها 500 او 550 مش فاكر اوى الرقم بالظبط .. وكان سعتها الفتيس استيراد اصلا 450 ... قولت لخويااا اشكرررررررررلو ... وسيبة وتعالى نجيب فتيس استيراد ....

لو عاوز تجرب شوف واسال بس وقولنا الاخبار ....

**dramyd** · 07-08-2014 12:47 PM

المشاركة الأصلية كتبت بواسطة Magoda

بيطلع منه شغل عالى اووووى وبيجيب خامات نضيفة جدا انا شفت شغله فى عربية ومكنتش اعرف صاحب العربيه وروحت قلتله حضرتك عملت الشغل ده عند جينز كار فقالى اه انت عرفت ازاااى

وعــــــــد ...
اول مجيب الجوليـــــــــــــت ...
هروح واخلية يعمل احسن فرش عندة .

**hamisa08** · 07-08-2014 01:41 PM

المشاركة الأصلية كتبت بواسطة mmmm1977eg

السلام عليكم و رحمه الله و بركاته
سيارتى هيونداى اكسيل 1996 - 1500 سى سى
مشكلتى فى الغيارات
بحس ان الغيار بيجى بالعافية و ساعتها بكون دايس دبرياج على الاخر بالاخص بتظهر المشكلة جدا من الغيار الثالث الى الغيار الثانى و ساعات ميجيش الا لما اشيل رجل من على الدبرياج و احطها تانى و بيجى بالعافية بردوا .
و لما اجيب مارشدير حتى و انا دايس دبرياج على الاخر بسمع صوت خبط فى الفتيس و زعقة و بكون متاكد ان انا بكون دايس دبرياج على الاخر
مع العلم ان لسة مغير سلك الدبرياج من اسبوع و كل دا حصل زيادة و بقى واضح بعد تغير سلك الدبرياج
انا عربيتى علشان تدور لازم ادوس دبرياج الاول و حاليا بدوس نص دوسة فقط على الدبرياج و بتدور فهل هذا معناه ان سلك الدبرياج راكب كويس ؟
و العربية و هى مبطلة و غير دايرة الغيارات بتكون تمام و سهلة و ناعمة اما لما ادور العربية المشكلة بتظهر
هل المشكلة مشكلة سلك الدبرياج ؟
محتاج ديسك و اسطوانة ؟
زيت الفتيس عايز يتغير ؟

الموضوع ممكن يكون شوية ارشادات اكتر من ميكانيكا جرب الارشادات منفعتش ندخل فى التقيل الميكانيكا
المشكلة دى انا قعدت اعانى منها اكتر من 6 شهور علشان كنت جديد فى السواقة

اولا : اتاكد ان مفيش دواسة طخينة تحت الدبرايج متخليش الدبرياج يوصل لحد الاخر
ثانينا : وانتة بتنزل من تالت الى تانى خالى العربية على سرعة بطيئة تستدعى الغيار " بمعنى انته بتنقل من تانى الى تالت " على سرعة 40 كيلو ,,, مش معنى كدة اول لما توصل لسرعة 40 لازم تجيب التانى

الثالث : الدبرياج عندك عالى عايز يوطى شوية ومكانة سهل جدا افتح الكبوت هتلاقى سلك الدبرياج فية بكرة زى صامولة كدة فى ظهر الدريكسيون وتحت الموبينة لفة شوية يمين او شمال

**hamisa08** · 07-08-2014 01:54 PM

المشاركة الأصلية كتبت بواسطة Magoda

فى واحد كشرى كان بيروحله فى الجيزة كان بيقول بيفك الفتيس ويظبطة وبيبقى حرير ايه رأيك
كشرى ده نيك نيم لواحد كان معانا هنا فى الرابطة اسمه محمد جلال

ماجود انسى تماما موضوع تصليح الفتيس ,, انا عملتها والفتيس بقى لمؤخزة زى الست قليلة الادب

ولا بتبطل كلام ولا بتبطل فلووس وقعد يرشح زيت من تحت ارجعلة يقولى دة من كارتيرة روح لميكانيكى , الميكانيكى يقولى دة شرخ فى فرغة الفتيس ارجع لبتاع الفتيس وقبلها مصنعية فك وتركيب من سنتين كانت 220 بالاضافة لحاجات اللى هتغيرها هتدفع تمنها

بس الجانب المشرق انا كنت واقف على ايديهم وفهمت اووى من جوه عامل ازاى و عيوب كتير فية كنت بحلل الفلوس واقف عليهم زى العيل الصغير كل ما يفك حاجة اية دى

الخلاصة لو الغويشة بايظة وعلشان يظبط مع عربيتنا هتغير ترس قبل و ترس بعد ,, الغويشة بتاعت التانى بايظة تغيرها والسلام الكلام دة بيفشل فشل زريع ,, انتة بتغير الغويشة فرضا بتاعت التانى هتغير الترس التانى والترس التالت ويكونوا شغالين ومفكوكين قدامك علشان يشتغلوا معاك كويس