و ده شئ يسعدنا يا باشا :embarrassed2:
الحمد لله
اخرج بقى كده يا راجل
ربنا يسهل وييسر لنا الامور ونعمل موضوع الاطعام ده بمشاركة الزملاء يوم الجمعة القادمة بعد غد ان شاء الله ...الموضوع زي ما قولتلكم ممكن انتو تعملوة باي كمية واي طعام ... مش لازم لحمة ....وكل واحد علي قد مجهوده ومقدرته المالية
نيجي لموضوع تاني :
برضه ممكن اللي عاوز يعمل خير لوجه الله ....
ممكن تشتري أكفان وتضعها في مسجد صدقه لوجه الله .... والموضوع سهل جدا ...
تروح عند واحد اسمه عوف في شارع الازهر .... وانت متجه من الحسين الي اتجاة العتبة ... بعد كوبري المشاة اللي بالعرض بحوالي 70 متر عند مطلع كوبري الازهر تقريبا علي ايدك اليمين ح تسأل عن عوف بتاع الفوط ... محله في حارة علي اليمين بعد بتوع النحاس والعطور ... وفيه محلين اسمهم عوف ....واحد علي الشارع الرئيسي وواحد داخل بمدخل في حارة صغيرة ....الأحسن اللي في الحارة الصغيرة
هو بيبيع الأكفان لكن اتأكد انها مقصوصة جاهزة وبيبقي حاطط معاها صابون وعطور وكافة ما يلزم ... الكفن الرجالي يبيقي في حدود 80 جنية والحريمي اغلي شوية وطبعا فيه اسعار متفاوته حسب نوع القماش ....وطبعا حاول تختار مسجد يكون القائمين عليه ناس أهل للثقه ... لو مش لاقي ممكن تعطيهم للجمعية الشرعية لتعاون العاملين بالكتاب والسنة المحمدية ... منتشرة في مساجد كتير جدا في جميع الاماكن
انتم طبعا لا يخفي عليكم الاجر والثواب عن هذا العمل ...تخيل واحد في موقف صعب وعنده حالة وفاه وعاوز كفن ومافيش وقت والدنيا مدربكة فوق دماغة ... يروح يلاقي كفن جاهز في المسجد ....بيبقي كأنه غريق ولقي طوق نجاه ..
ده مثال تاني لعمل من اعمال الخير اللي سهل عملها ومش بيتكلف كتير وله أجره عند الله
بارك الله فيك وجزاك الله كل خير
الحمد لله رب العالمين ... بفضل الله اولا وأخيرا تمت المهمة الخيرية بنجاح
بمشاركة بعض الزملاء مشاركة مادية وبمشاركة جميع الزملاء مشاركة معنوية ...وبدعاء الجميع
والتفاصيل هي :
الكمية 10 كيلو لحمة بلدي كندوز
7 كيلو رز فاخر
59 رغيف عيش سوبر + 3 رغيف صغير ( كمالة )
وباقي اللوازم الجانبية ( بصل + توابل + شنط بلاستك ..)
وتم التوزيع اليوم بعد صلاة المغرب
انا رجعت من صلاة الجمعة علي المكتب شوفت المنتدي اخبراه ايه وروحت لقيت المدام قربت تنتهي من تسوية اللحمة وكان الرز لسة علي النار
http://www.x66x.com/download/477148499eea4dffd.jpg
طبعا الحلة الكبيرة بتاخد عينين بوتوجاز مش عين واحدة
http://www.x66x.com/download/154548499eeb139a6.jpg
ودة العيش ... وصيت عليه وانا راجع ... وده محمود ابني الكبير
http://www.x66x.com/download/14448499eeb4d686.jpg
وطبعا لازم ابراهيم هو كمان يتصور زي أخوه في نفس المكان ...والا ممكن تبقي الحرب العالمية الثالثة
http://www.x66x.com/download/293248499eeb7a9a9.jpg
وبنفتح ارغفة العيش بالشكل ده .. ممكن من غير ما نقطع منها عشان عدم التهدير
http://www.x66x.com/download/34648499eebb3f65.jpg
ونحط كبشة رز كبيرة في كل رغيف .... كدة
http://www.x66x.com/download/340948499eec8e8e5.jpg
وبعدين حتتين لحمة كبار
http://www.x66x.com/download/160448499eed4ae22.jpg
ودة منظر الاكل قبل الحشو
http://www.x66x.com/download/267248499eed7980c.jpg
ونلف كل رغيف في شنطة نايلون
http://www.x66x.com/download/38274849a1f492eb9.jpg
وده المنظر بعد انتهاء وضع اللحمة والرز في الأرغفة
http://www.x66x.com/download/14764849a18a01406.jpg
ونحط الاكياس كلها في شنط بلاستك كبيييرة
http://www.x66x.com/download/11774849a1f55a3b2.jpg
وننزلهم العربية و نلف نوزعهم .... بالهنا والشفا
ربنا يتقبل منا جميعا
انا صورت الصور دي عشان الموضوع تكون واضح لأي حد عاوز يعمل كدة ... الموضوع بسيط ولذيذ والمجهود اللي بيبذل فيه بيتلاشي عندما تري نظرة فرح في عين واحد مسكين..
التوزيع تم في منطقة العباسية وميدان الجيش ومقابر الغفير و الاوتوستراد ( منشية ناصر ) ومناطق من مدينة نصر
يمكن انا مش ح اقدر اقوم بالموضوع ده باستمرار ... لأني باعمل التوزيع ده بشكل متكرر لي ولبعض اقاربي ايضا ... فالمجهود ح يكون زيادة شوية علي زوجتي وخاصة ان ابراهيم ابني من النوع اللي عاوز 3 امهات لوحده :)
اعتقد كدة كيفية عمل الموضوع بقت واضحة للجميع ... وطبعا طريقة الطبخ والكميات والمقادير موجودة في المشاركة الاولي في هذا الموضوع
التكلفة بلغت حوالي حوالي 410 جنيه + بعض اللوازم الموجودة عتدي من قبل كدة
الحمد لله رب العالمين
جـــــــــــــــزاك الله كل خير يا اســــــــــــــتاذ احمد
وجــــــــــــزاء المدام الف خير ســـــــــــــلامى الحار الى مدام شومخـــر والحلوين هيما ومحمود
تسلم ايديها يارب
كــان نفسى والله اجى اساعدها بس الظروف تعذرنى وان شاء الله لو اى مره احتاجت مساعده تتصل لى على طول
تحت امركم اى وقت
جزاك الله خيرا
و أعانك الله و تقبل منك باذنه سبحانه و تعالى
بعد ما شوفتم تطبيق عملي لموضوع الأكل ... وبعد موضوع الأكفان ( موضوع حزين شويتين ) ..
ممكن نعمل حاجة كمان بسيطة لكنها مفيدة ....
تعطير المسجد
طبعا كلنا لما بنصلي في اي مسجد بنلاحظ ان السجاد دايما بيبقي ريحته مكمكمة وخصوصا في الصيف ومع الحر والعرق والرائحة الشرابات ...الخ فده بيترك رائحة مش ظريفة علي السجاد ... ولما بنسجد اثناء الصلاة بنلاحظ الموضوع ده بوضوح ...
نروح لواحد من بتوع تركيب العطور ... نخليه يعملنا عطر مناسب للمسجد ... عود ... مسك ... فواكه ....ونطلب منه ان العطر يكون مركز شوية عشان يثبت فترة طويلة في الموكيت أو السجاد ... وممكن نجيب كمية كبيرة شوية بسعر معتدل ....يعني مثلا نص لتر ح يبقي في حدود 70 جنية تقريبا ... ونضع العطر في زجاجة ببخاخه ( اوتومايزر ) لأن لو اشترينا كمية كبيرة ح تكون في زجاجة بلاستك بدون بخاخة
والزجاجة برضه بتتباع عند نفس المكان ....او في زجاجة قديمة من اللي بيتفتحو .. زي fa مثلا
بعد الصلاة وانصراف المصلين تقعد مع نفسك في الجامع و ترش العطر علي الموكيت في المكان اللي بيسجد فيه الناس ....ويراعي ان تكون المراوح مطفأة عشان الرزاز ما يطيرش مع الهواء ... ويكون بعد ايدك عن الارض حوالي 20 سم او اقل ...وممكن تلبس في ايدك كيس بلاستك او جوانتي لأن العطر بيبقي مركز شوية
العطر دة لو تركيزة زيادة شوية عن الطبيعي ... بيبقي تأثيرة في الموكيت لأسابيع ( ممكن 3 - 4 اسابيع )
تصور بقي اللي بيسجد وهو بيصلي بدل ما يلاقي ريحة الموكيت وحشة ... يلاقي ريحة عطر جميل ..
الموضوع بسيط وغير مكلف وسهل التنفيذ
ربنا يتقبل
ربنا يجازيك خير يا أخ أحمد
وأنا بأدعو كل اللي عنده فكرة لفعل الخير يتفضل يكتبها هنا في الموضوع المثبت ده
ربنا يتقبل منا .. آمين
بعد الحلقات الثلاثة :
توزيع الطعام
شراء أكفان صدقة
تعطير المسجد
.......................
الحلقة الرابعة ( شنطة الخير )
موضوع بسيط ممكن تنفذه بسهولة
كلنا نعرف شنطة رمضان طبعا .... اللي مايعرفهاش ..عبارة عن شنطة تحتوي علي مواد عذائية اساسية ولوازم رمضان ... بلح ... زبيب .... فول ... رز
ومعظم الناس بيوزعوها في شهر رمضان المبارك .... لكن .......
الناس محتاجة تأكل في باقي شهور السنة ... مش رمضان بس
ممكن الشنطة دي تتعمل في الأيام العادية وتكون مكونة من ( مثلا )
رز ... سكر ... زيت ... سمن ... فول ... عدس ...شاي ....مكرونه ...صلصه ...ملح ....لبن بودره ....
ممكن تشتري الحاجات دي بالجملة من كارفور ... وتعمل شنط تحتوي علي المكونات اللي تختارها ....
ودايما خلي في شنطة سيارتك 3 او 4 شنط من دول ... وانت ماشي أكيد ح تلاقي من يستحق المساعدة .... بائعة خضار بسيطة كل الخضار اللي معاها يساوي 30 او 40 جنية ...طيب دي ح تكسب منهم كام ....
عامل نظافة حالته تقطع القلب ....
طفل بيشتغل في ورشة بتراب الفلوس .....
خادم جامع عايش علي المساعدات ....
كتير اوي الواحد بيلاقي ناس محتاجة لكن مش بيبقي معاه حاجة عينية يعطيها لهم
الغلابة كتيييير اوي
ميزة موضوع الشنطة ده انه في الغالب ح يروح لأسرة ويترجم مباشرة الي اشباع جائع ... وفي احيان كتير بيبقي اكثر تأثيرا من الفلوس ... ممكن الفلوس اللي تديها لواحد غلبان يروح يشتري بيها سجاير او ما شابهها ...لكن المواد الغذائية في الغالب ح توصل للأسر والأطفال اللي محتاجينها
ربنا يتقبل من الجميع
جزاك الله خيـــــــــــــــرا ... وادام كونك قدوة صالحة لاولادك
وجعلك ذخرا لهم وللمسلمين
الحمد لله .... رمضان على الأبواب .....
يا ترى ناوي تعمل اية في رمضان .... ده موسم الطاعات .... والخير مضاعف في رمضان .... النافلة باجر فرض .... والفرض باجر 70 فرض في غير رمضان ...
اكيد ناس كتير مننا بتعمل شنطة رمضان وتوزعها على الفقراء ....ده طبعا عمل خير وربنا يقدرنا جميعا على فعله ....
ممكن برضه تعمل حاجة تانية .....ممكن تجيب بلح ( مش ناشف ) بلح عادي من اللي بيتباع بتاع سيوة ومصانع التمور المختلفة ....وتقسم البلح الي كميات وتغسله جيدا وتضعه في اكياس ( في حدود نصف كيلو للكيس ) وتقوم مشكورا بتوصيلها للمساجد المجاورة يوميا قبل الافطار ب 15 دقيقة .... وممكن تبعت اولادك لو كان عمرهم يسمح بذلك .....لاحظ انك لو وضعت في المسجد علبة كاملة .... غالبا ح تستهلك في يوم واحد ( في فترة بعد العشاء ) ومش ح تؤدي الي المطلوب ....وهو افطار الصائمين ...لكن لو وصلت التمر يوميا الي 3 او 4 مساجد ..... تأكد انك ستكون افطرت عدد لا بأس به من الصائمين .... مش لازم بلح بس .... ممكن طعام ....وده دور اخواتنا الفاضلات ....وفرصتهم انهم يشاركو في العمل الرائع دة ...
نصيحة للجميع ....ممكن تجرب تعمل النظام دة في رمضان ....والله ح تكون مرتاح نفسيا وجسديا ...... عند سماع الآذان انزل صلي في المسجد ... وممكن تاكل تمرات قليلة في البيت قبل النزول أو تأكلهم في المسجد .... وتشرب شوية ماء ... وبعدين تصلي في المسجد ثم تذهب الي بيتك لتناول الإفطار ... ويا ريت ما يكونش تقيل ..... ممكن يبقى افطار خفيف .... وبعد العشاء والتراويح .... ممكن تبقي تأكل كما تشاء ...
ح تلاقي نفسك بتصلي التراويح وانت نشيط وخفيف ....وربنا يتقبل من الجميع
الف شكر يا استاذ احمد على الافكار دى
ده بالظبط برنامجى الرمضانى بس مفيهوش موضوع صلاه المغرب فى المسجد ولا التمر
باذن الله رمضان السنه دى هيكون فيه نفس المشروع بتاع اطعام الطعام ولو كل يوم جمعه هنزل قبل الفطار بساعه والغلابه الصايمين فى الشارع كثير
اضافه الى تحضير افطار للمساجد القريبه ولو مره بالاسبوع
وبالنسبه لشنطه رمضان يا جماعه يا ريت اللى هيعمل شنطه رمضان يوزعها فى شهر شعبان قبل رمضان لان التاس المحتاجين بيكونوا شايلين هم حاجات رمضان
لانها تكون كمان ادخال سرور على قلب مسلم
ربنا يكرمك يا دموع ويتقبل منك ومننا جميعا
هو طبعا النساء مش مفروض عليهم انهم يصلو في المسجد.....
وموضوع الشنطة .... ممكن برضة يبقي في النصف الأخير من رمضان .... لأن الناس بيكون معظمهم مركز في التوزيع في اول رمضان ......لكن لما رمضان يمر نصفه بيبقى الناس الغلابه بحاجة الي هذه المواد الغذائية ....وغالبا بيكون الحاجات اللي اتوزعت في اول رمضان استهلكت بالكامل .....
يعني انا باضم صوتي لصوتك في حسن توزيع الشنط خلال الشهر الكريم بالكامل .... بداية من اواخر شعبان وحتى نهاية الشهر الكريم ... علشان الناس تلاقي متطلباتم طوال الشهر ..... ويا ريت كمان تبقى طوال العام
جزاك الله خيرا
ويجعله فى ميزان حسناتك
ربنا يباركلك علي مجهودك و يجعلة في ميزان حسناتك
بس خد بالك انا كنت هموت من موضوع زيدة في السيدة زينب
ربنا يتقبل منك ومنا صالح الاعمال واحب ان اضيف ان جمعيه رسال للايتام تقبل اي شئ موجود وليس له اي استخدام كا الملابس القديمه والاحذيه والجرائد والكتب المدرسيه وكل شئ يمكن ان نتصل بهم ويرسلوا لك المندوبين وتاخذ بما اعطيت لهم ايصالا كذلك يوجد عندهم كفاله اليتيم لتضمن جوار رسول الله صلي الله عليه وسلم ان وكافل اليتم كا هذين بالجنه واشار باصبيعيه السبابه والوسطي
وكفاله اليتم تبدا بحد ادني عشره جنيه شهريا ربنا يتقبل
اللهم اجعل افضل اعمالنا خواتيمها وثبت قلوبنا علي الايمان اللهم امين امين
فكرة ممتاز هزت قلبي من جوه فعلا
لكن للأسف أنا مابعرفش أطبخ كويس ومابحبش وقفة المطبخ أساسا وإن شاء الله هاحاول أكلف حد يقوم بالمهمه دي لأني كده كده لازم اكلف حد يوزع على الناس المحتاجه دي لاني بصراحه مش هاقدر أوزع خصوصا وأنا لوحدي
جزاك الله كل خير لأنك تحفزنا على فعل الخير (وما أحوجنا لفعل الخير ؟)
شـكــ وبارك الله فيك ـــرا لك ... لك مني أجمل تحية
الموضوع من ناحيه الاعداد والطبخ اااااااااااااااسهل من عمل طبق سلطه والله سبحانه وتعالى بيسهل الصعب طالما النيه فى العمل ارضاء وجهه الله
وبالنسبه للتوزيع اهوه ده اسهل من الطبخ
لو ركبت عربيتك ومشيت على اليمين هتلاقى فى كل متر شخص على الرصيف محتاج مجرد ما تضربى كلاكس هو بيفهم وبيجى جمب العربيه تديلوه النصيب وخلاص
كلامك فعلا مظبوط لكن أنا محبش اجرب في الناس أختباراتي الطبيخيه الفاشلة لاني عاوزه اعملعهم أحسن حاجه طالما أنها لوجه الله
أما بالنسبة للتوزيع فصدقيني مش هاقدر لأني عارفه إللي بيحصل لما حد يقف عند مكان تجمع العمال الموجودين في الشارع ويبدأ يوزع أو حتى يتكلم مع واحد منهم
وربنا يساعدنا كلنا على فعل الخير
والله ربنا يباركلك رغم انك جوعتنى شخصيا انا هخليهم 26 رغيف
ربنا يجعله في ميزان حسناتك
طيب انت بتفضل يوم معين؟للتوزيع
والله كل الايام خير ... لكن ساعات بيبقي فيه مناسبات ...
زي مثلا ايام رمضان .....
زي مثلا يوم عرفه ... معظم الناس صائمين ...
زي مثلا العشر الاوائل من ذي الحجة .... الخير فيها مستحب و مضاعف
وربنا يتقبل من الجميع .... بالمناسبة
انا لما باعمل موضوع العيش ده .... بنأكل منه انا واسرتي .... كل واحد رغيف من وسط الارغفة اللي بتتوزع .... اجمل اكل تذوقه في حياتك .... اللي بيبقي طالع لوجه الله ... بيبقى في منتهى الجمال
بالهنا والشفا