اللي عاوز يعمل خير لوجه الله ...ممكن يتفضل يعمل كدة
" ويطعمون الطعام على حبه مسكينا ويتيما وأسيرا . إنما نطعمكم لوجه الله لانريد منكم جزاءً ولا شكورا " كتير مننا عاوزين يعملو خير بس مش عارفين ازاي ....الفكرة دي بدايتها كانت من موضوع اسمة : علي الناصية يوم 6/4 http://www.nilemotors.net/Nile/showt...485#post287485 وكنا بنتكلم عن الناس اللي دخلها يكاد يكون منعدم وعايشين بيننا وازاي نقدر نساعدهم واختنا ام مالك اثارت فكرة ان اللي يقدر ممكن يعمل 2 او 3 كيلو لحمة وشوية رز ويتعملو في عيش ويتوزعوا علي الناس اللي ممكن تقعد طول الشهر ما تاكلش لحمة
انا ح اشرح خطوات الموضوع بالتفصيل علشان اللي اول مرة يعمله ما يكونش عندة اي مشكلة ونصيحة لوجه الله .... حاول انت تعمل الاكل بايدك مع زوجتك .... المجهود ده ثوابه عظيم ... لا يفوتك
انا حاطط المقادير علي اساس 5 كيلو لحمة ...اللي عاوز يضاعف الكمية .. ربنا يكرمه ويضاعف له أجره
اولا : الكميات والمقادير
5 كيلو لحمة بلدي مقطعة قطع كبيرة ( كل قطعة 100 جرام تقريبا )
3 كيلو رز
3 بصلة كبيرة
6 معالق ملح ( معلقة من بتوع السكر )
حبهان مطحون ( قليل بين أصابعك )
بهارات ( قليل بين اصابعك )
25 رغيف عيش من السوبر ( مش ابو 5 قروش عشان مش بيكون مناسب )
شنط نايلون بعدد الارغفة
ثانيا الطريقة :
يضرب البصل والملح والفلفل والبهارات والحبهان في الخلاط مع الماء و يوضع علي اللحمة في حله كبيرة مناسبة و يكمل باقي الحلة بالماء حتي يغطي اللحمة
ويوضع علي النار ويراعي تهدئة النار بعد ما تصل الي مرحلة الغليان
ويختبر اللحم بالشوكة حتي ينضج تماما وينصح ان تكون اللحمة مستوية جدا
وممكن نجيب ربع كيلو لية وتقطع قطع صغيرة و تسلق مع اللحم لأعطاء اللحمة مذاق جيد واعطاء دسم للشوربة والرز ( حسب زوق كل واحد في المذاق )
ينشل اللحم من الحلة و يوضع في حلة اخري و تترك الشوربه تغلي جيدا ثم يوضع بها الرز بعد غسلة وتصفيته من الماء ويقلب وتغطي الحلة لحين ان يستوي الرز
تفتح ارغفة العيش و يوضع في كل رغيف كبشة رز كبيرة و قطعتين لحمة و يلف ويوضع في شنطة بلاستك
تنزل انت واولادك ومعاك الاكياس بعربيتك و توزعها علي الاسر الفقيرة وعمال النظافة والناس اللي نايمة في الشارع والاطفال المشردين وعساكر المرور والخ ... الخ ... وحاول تتحري الناس اللي محتاجة مش لازم في منطقتك ... اللي يسأل ح يلاقي
عرف اولادك انت بتعمل كده ليه ... عشان لما يكبروا يعملو زيك
وحاول تمسك دموعك من الفرحة اللي ح تشوفها في عيون الناس الغلابة والمناظر اللي ممكن تشوفها واوضاع الناس اللي مش لاقيين ياكلو
التكلفة:
5 كيلو لحمة 175 جنية
بصل 3 جنية
3 كيلو رز 15 جنية
25 رغيف 12.5 جنية
ملح وبهارات وفلفل وحبهان واكياس 5 جنية
يعني الموضوع كله حوالي 200 جنيه .... نصف ثمن بطارية ... او قيمة غيار زيت موبيل وان
لكن ثوابه عند الله عظيم
ربنا يتقبل منا جميعا
=====
تم التعديل
مشرف القسم