سلام عليكم
طبعا انا مبعملش موضوع الا اذا كان مشكله رخمه و غبيه و دايما ملهاش حل
دلوقتى انا من فتره كبيره كنت بشتكى ان دواسه الفرامل تقيله لما بدوس عليها (بتزق رجلى) و الفرامل ضعيفه ..العربيه بتتحدف كده و انا مفرمل
التوكيل طبعا قالى سوق على مهلك سوق خلى الدنيا تروق
احمد سعيد الى فى مدينه نصر قالى ماستر فرامل عمومى ..بدون دخول فى تفاصيل قله ضمير كتير منه ..
غيرت الماستر ..
جرب يا حاج
هووووووب
العجله الى ورا شمال بتقفش ..تدريجى ..لحد ما تقفش خالص ..شيلنا الماستر الجديد حطينا القديم ..نفس الحوار
بعد ما عمل هو و الى عنده بعض عروض الباليه و فقره الساحر و جابو القرد بتاع شومبونجو ..تم حل المشكله "عن غير قصد منهم" قعدو يلعبو و يفكو و يركبو خلاص مبقتش تقفش
الفرامل قويه جداااااااا
لكككككككككككن و دى المشكله
العربيه و هى واقفه دواسه الفرامل خفيفه جدااااااااااا طيب شيلنا الجديد حطينا القديم برده الدواسه خفييييييييييييييييييفه
تحس ان الدواسه مش متركبه ع الماستر اصلا !!
بصابع رجلى الصغير بجيب الدواسه لاخر نقطه فيها بكل سهوله
من الاخر تحس ان الدواسه فاضيه !
مجرد ما العربيه تبدأ تتحرك
الدواسه بيرجع ليها التقل الطبيعى بتاعها ..زى اى عربيه
قالى اصل الماستر هيطبع و بتاع
فات 15 الف كم و ما زالت المشكله قائمه !
انا مش بشتكى من اى ضعف او تقصير فى اداء الفرامل
لكن و هى واقفه الدواسه خفييييييييييييييييييييييي ييييييييييييييييفه بشكل يخض !
التوكيل
تقريبا المهندس كان بيقرا كتاب لسقراط قبلها
قالى ...همممم طالما انت بتقول غيرت ماستر و حصلت المشكله دى ...
يبقى غير الماستر بواحد تانى :)
روحت لميكانيكى فتاى كده هنا ..اسطوره المحله فى الاسكودا و البى ام و المرسيدس (تطلع من عنده على التوكيل على طول ايده فيها البركه)
طبعا معرفش يحدد العيب
سمعنى مقطوعه موسيقيه من الشكر فى الاسكودا و الذم فى الاوبل (طبعا انا مش محتاج لمثل هذه المقطوعات ..انا حافظها)
روحت لواحد قريبى فى طنطا ..اسطووووووووره فى عالم السيارات ..بس عشان تصلح عربيتك عنده يشترط تكون عامله حادثه قبل كده ..كنت زبون عنده بالاوكتافيا بعد الحادثه
المهم ...معرفش المشكله و الموضوع قلب بسندوتشات فول و طعميه ..وواحشنى يا كبير و صباحك فل ..و الحاج عامل ايه ..و مستفدتش منه فى حاجه
طبعا قولت اشغل دماغى ..
فكرت كتييييييير
ولقيت ان الحل
انى اشيل البطاريه
وافك العجل
وارفع العربيه فى الجراج
واجيب لانسر بومه 1600 اوتو ايرباج و ايه بى اس