طبعا القهوة ده مزاج
ومش أي حد يستطعم القهوة
انا لازم كل يوم أضربلي واحد كوباية ( مش فنجان ) الصبح
ولازم بمواصفات معينة
يعني لازم محوجة ... ومش أي حاجة ... دارك لأ
كنت بجيب من مطحنة بن في شارع خلوصي ناحية دوران شبرا ... كان ممتاز وحتي الان
انما لقيت في البيت بتاع 5 باكتات بن جاهز ... اسمه بن ( الحموي ) منهم واحد موكا
الحقيقة طلع جامد جدا
بس أي بن بجربه بيبقي في الأول جميل وليه ريحة ونفس شديد جدا
بعد أسبوع بيقل ريحته وطعمه بيتغير شوية ... انا بحطه في برطمان بس مش محكم الغلق ... زي السكرية كدة
عايزين نتبادل الخبرات بقي
يعني بتعملوه أزاي ؟ ... وبتجيبوه جاهز ولا من مطحنة ولا بتجيب التحويجة برة وتحطها وقت عمل القهوة في كل فنجان ؟
انا بقالي كذا سنة بشرب قهوة يوميا .... بس في سنة بطلت قهوة وكل أنواع المنبهات ورجعت تاني
مش عشان القهوة وحشة بس عشان كنت بختبر نفسي :)
بعمل بقي القهوة أزاي ؟ ... عشان ده بتختلف من واحد للتاني
انا بعمل التلقيمة في الكنكة وبعدها بحط المية وبقلب كويس وأسيبه علي نار هاااااااااااااااااااادية .... لو معرفتش ممكن أحطه علي صاجة تسخين العيش وبوطي النار عالأخر
وأسيبه لغاية ما وشه يرفع شوية من الأجناب و أشيله من عالنار أسيبه يهدي شوية وبعدين أصبه
بيبقي بوش وطعمه حلو
بتعملوه أزاي ؟ :)
أه نسيت .... بشربه مظبوط :)