الموضوع: شوية استفسارات بخصوص لانسر 1600 اوتوماتيك

2012 زيرو.
هل الفتيس التيبيرونيك كويس ؟ وهل حرق البنزين فيها عالى ؟
وبردو عايز أعرف ان كان ليها عيوب أو مشاكل معينة..

بص باشا انا بسمع انو صيني بس مش متاكد بس محدش اشتكي من الفتيس خالص ولسه انتشارها بيزيد بس هما غيرو حاجات كتير في العربية للاحسن

السلام عليكم ورحمة الله وبركاته
اللانسر عربية فعلا محترمة جدا جدا واقتصادية جدا انا كان معايا واحده موديل 2006 اوتوماتيك سبورت كنت شاريها فى مارس 2006 وكانت عاملة 8800كم وبعتها فى 9-2011 وكانت ماشيه 113000كم والحمد لله كانت فابريقة بالكامل وبحالة نضيفة جدا جدا بلا مبالغة بدون خدش خارجى ربنا يبارك للى اشتراها يارب
العربية طول الفترة من 2006 الى 2011 الحمد لله مش احتاجت حاجة غير قطع الغيارالمستهلكة زى الزيت والفلتر وتيل الفرامل وعملتها صيانتين واحده عند 50000كم والتانية عند 95000كم طبعا الصح كان كل 40000 كم بس بسبب ظروف عملى كنت مش بأعرف اروح فى المواعيد المضبوطه
بالنسبة لقطع الغيار انا كنت باجيبها من التوكيل وخصوصا تيل الفرامل لأن انا باشوف ان سلامتى وحياتى فيه مش ينفع اجازف بيهم ابدا وبرده 400 جنيه كل سنة مش كتير فى حاجة مضمونه غير كده الزيت والفلتر كنت بغيرهم من بره ومره واحده الكنترول بتاع المروحة باظ غيرته من التوكيل ب 350جنية ...صيانة ال 50000كم اللى هى ال 40000 كلفتنى 1800 جنيه بتيل الفرامل
بالنسبة للثبات ... ده على حسب انت راكب ايه ؟ يعنى لو كنت راكب عربية اقل ... طبعا هيكون ثبات العربية بالنسبة لحضرتك كويس جدا والعكس صحيح .. بالنسبة ليا انا كنت شارى قبلها اوكتافيا A5 طبعا حسيت ان الانسر ريشة بس لما كنت بأركب عربية اختى اللانوس وارجع للانسر تانى كنت بأحس انى راكب عربية لازقة فى الأرض وهكذا ... على العموم هى ثباتها فوق المتوسط وهتجيب بيها السرعات اللى حضرتك عاوزها انا وصلت بيها 200 كم/س بس المشكلة فى مطبات الهوا فوق ال 140كم/س لكن الدريكسيون انت متحكم فيه ومافيش اى مشاكل فيه لحد ال 200 طالما العربية زوايها وضغط الكاوتش مضبوطين
نظام العزل فيها عادى جدا زى اى عربية ...وصوت الموتور بيكون مزعج الى حد ما لما ال rpm بيعدى 4000ل/د .... على فكرة 4000 ل/د دى يعنى فوق ال 150كم/س ... بس يعوض ده نظام صوتى جيد جدا ..انا باتكلم على الكاسيت الأصلى والسماعات الأصلية اللى كانت فى السبورت لاين وخصوصا ان كان فيها cd changer
استهلاك البنزين معقول جدا جدا فى السفر 250-280 كم/ص انا كنت بافول التانك فى الزقازيق وباسافر العريش وارجع الزقازيق تانى من غير أحط بنزين فى الطريق حوالى 550 كم مع العلم انا كنت بأعدى كوبرى السلام وامشى على 160كم/س لحد العريش .... وفى وسط المدينة من 160-200كم/ص على حسب الإشارات والحى اللى انت بتمشى فيه ونمط السواقه يعنى لو انت بتستخدم العربية فى وسط القاهرة غير لما تستخدمها فى مدينة نصر او الزهراء مثلا طبعا الإستهلاك هيختلف تماما عموما الإستهلاك وسط المدينة مش مقياس ابدا
وانا تحت أمرك فى اى استفسار اقدر افيدك بيه

المشاركة الأصلية كتبت بواسطة ZALABANY

ربنا يكرمك أنت طمنتني جدا وشكرا على ردك واهتمامك

لاشكر على واجب اخى الكريم وانا فى خدمتك فى اى وقت
انا نسيت اقول لحضرتك على حاجة بالنسبة للفتيس ال cvt هو اختراع غريب جدا بس عاوز تعود يعنى مش تتخض من اول مرة تركب العربية علشان العربية مش بتنقل او تحس انها تقيله ..مشوارين بس وهتعرف تتعامل معاه كويس جدا وهتعرف ازاى تسحب بيها و امتى تستخدم الكيك داون وامتى مش تحتاجه وهكذا ....
بالنسبة لسؤال حضرتك عن الزيت انا كنت باستخدم زيت موبيل 1 وكنت باغيره كل 8000كم والفلتر كمان كان فيه واحد بيجيبلى الأصلى من بره ... بس على العموم انا مره غيرته فى التوكيل مش فرق كتير فى السعر ( انا اسف انا مش فاكر الأسعار بالارقام علشان ده كان من فترة طبعا )
وعربيتى الجديده حطيت فيها موبيل 1 برضه بس ان شاء الله المرة اللى جاية ناوى احط كاسترول او ليكوى مولى بناء على تجربة الأعضاء الكرام

المشاركة الأصلية كتبت بواسطة zalabany

طيب معلش في استفسار تاني المفترض ان العربيه 1600 اوتوماتيك توكيل مصريةاللي هي الكلاسيك بس العربيه فيها ايرباج للسواق هل الموديل ده كده وهل فيه abs ولا لا

علشان تعرف العربية فيها abs ولا لأ لما تفتح الكونتاكت بتلاقى لمبه على شمال عداد المسافات مكتوب عليها abs وبعدين بيكون ليه جهاز واضح لما تفتح الكابوت تحت الزجاج الأمامى على الناحية اليمين ( اعذرنى انا مش عندى صوره للموتور من عربيتى القديمة )
بالنسبة للإمبوليزر انا عربيتى ماكنش فيها بس انا قريت فى الجورنال فى مواصفات العربية ابتداء من 2007 الموديلات المصرى فيها امبوليزر
بالنسبة للمفتاح عربيتى كانت معاها 2 مفتاح ريموت مشفرين لأنى لما غيرت بطارية الريموت لقيت قطعة سوداء بتاع المفاتيح قاللى دى الشفرة ومره عملت نسخة عادية قلت احطها فى المحفظه علشان لو مرة نسيت وقفلت العربية والمفتاح جوه الشنطه ( حصلت معايا ) لما جيت ادور العربية بيه العربية دارت وبعدين بطلت تانى ونفس الموضوع ده حصل مع واحد صاحبى فى عربية 1300 موديل 2004 مفتاح عادى من غير ريموت ...