المشاركة الأصلية كتبت بواسطة ؟؟؟؟
ميزانيه 800 جنيه ولـ 7 أفراد واللى هتتريأ متدخلش
السلام عليكم ورحمة الله وبركاته
بصو بقا يا ؟؟؟؟؟
أنا هكتب لكم ميزانيتى اللى أنا ماشيه عليها بعد ما ربنا كرمنى وأتعلمت أزاى
أمشى بيتى على أد اللى جوزى يدهولى
وبفضل ونعمه من الله أنا متجوزه بقالى 14 سنه وعمرى ما أتخانقت مع جوزى على فلوس
علشان أمى ربنا يخليهالى وحماتى ربنا يغمرها برحمته
كانو دايما يقولولى علشان تعيشى سعيده في بيتك مع جوزك وعيالك عيشى
على أد ما ربنا بيرزق جوزك والحمد لله أنا بعمل كده
المهم بقا علشان أنا رغيت كتير معلش يا قمرات
وعموما الميزانيه دى للأكل بس
المنظفات والفواتير الشهريه والايجار ومصاريف العيال واللبن والسمنه على جوزى
ربنا يعينه يااااارب
والسكر والزيت والشاى بيجولى من التموين
أنا بجيب في الشهر 20 كيلو أرز سعر الكيلو 3 جنيه ونص
وبجيب 5 كيلو مكرونه متنوعه سعر الكيلو 3 جنيه
وبجيب كيلو فاصوليا بيضاء 9 جنيه
ونص كيلو لوبيا 7 جنيه
و5 جنيه ملح وتوابل
كده الحساب 106 جنيه
بجيب 4 فرخات الواحده 2 كيلو وبقطعها 8 قطع كده سعر الفراخ 100 جنيه
كيلو ونص لحمه جملى 60 جنيه ( وللعلم طعمها خرافه ) سعر الكيلو 40 جنيه
كيلو لحمه مفرومه مجمده 30 جنيه
كيلو بانيه 28 جنيه
كيلو إلا ربع كبد وقوانص 13 جنيه وبضيف عليهم الكبد والقوانص بتاعة الفراخ اللى أشترتها
و6 كيلو سمك 60 جنيه بعملهم على مرتين
و2 كيلو ممبار 50 جنيه ودى أكله مهمه كل شهر لان جوزى بيموت فيه
بس طبعا بعمل معاه أى أكل تانى مكرونه أو بطاطس محمره وسلطه
و2 كيلو كرشه 20 جنيه
كده حساب البروتينات 361
هنضيف عليهم 106 اللى فوق
يبقى الاجمالى 467 جنيه
الباقى من الـ 800 جنيه 333 جنيه
بجيب 10 كيلو بطاطس سعر الكيلو 2 جنيه يعنى 20 جنيه
وبجيب قرصين قرنبيط 8 جنيه
و3 كرومب سعر الواحده 5 جنيه يبقى 15 جنيه
وبجيب 3 كيلو بسله بـ 12 جنيه سعر الكيلو 4 جنيه
وكيلو جزر 2 جنيه
و10 كيلو بصل سعر الكيلو 2 جنيه يعنى 20 جنيه
و2 كيلو قلقاس 5 جنيه
و2 كيلو كوسه 5 جنيه
و2 كيلو سبانخ 8 جنيه
و3 كيلو باذنجان رومى 6 جنيه
وكيلو فلفل أخضر 5 جنيه
و2 كيلو باذنجان عروس للتخليل 6جنيه
10 كيلو طماطم سعر الكيلو 2 جنيه يبقى 20 جنيه
و20 جنيه برطمنات صلصه
برجر العائلى 17 جنيه
6 علب تونه سعر الواحده 3 جنيه يعنى 18 جنيه
2 كيلو جبنه قريش 20 جنيه
كيلو حلاوه طحينيه 12 جنيه
وجبنه مثلثات 15 جنيه
و30 جنيه عيش بلدى في الشهر
و2 كرتونة بيض 30 جنيه
كده الحساب 294
+ 467 اللى فوق
-------------
الاجمالى761
الباقى 39 جنيه
طلعى 9 جنيه صدقه يا ؟؟؟؟؟
و30 جنيه هتجيبى باقي أحتياجاتك من دقيق وبقسماط وشعريه ومرقة دجاج
وأهم حاجه نص كيلو ملوخيه ناشفه لانها بتنفع أوى والنص كيلو بـ 4 جنيه
وخيار وخضره
وربنا بيبارك في القليل طول ما بنقول يااااارب بقلب خاشع
ودلوقتى بتمنى من كل فتوكه تدخل تدعيلى بصلاح حالى وحال ولادى
وجوزى وسعة رزقنا
والمشاركه الجايه إن شاء الله هكتبلكم الجدول الشهرى بتاع الاكل
اللى انا ماشيه عليه
المفضلات