الموضوع: قسوة دي ... ولا عقل ؟

السلام عليكم

من دقايق دخل عليا اتنين ستات معاهم روشتت ولادة
الست الي ماسكة الروشتة .. كان عليها فلوس بقالها فترة
وطلعت عين إلي جابوني لحد ماجابتهم
دخلت معاها الروشتة
حضرت الروشتة
80 ج
قالتلي إكتبهم على حسابي
===
==
=
أخدت الكيس من إيدها وحطيته ف البترينة
" معلش أنا مش بشكك "
معلش يادكتور .. هجيبهمك الصبح
" سمعت الكلام ده قبل كده.. والفلوس فضلت سنة "
معلش المرة دي .. ودين محمد هجيبهمك الصبح
" ياستي . الدكتور إلي هيولدها .. هتقوليله يبقالك وإكتبهم على حسابي ..وللا هتدفعيله حقه"
والله إستلفت له الفلوس بتاعت العملية
" يعني تستلفي علشان تديله حقه .. وأنا تاخدي مني الحاجة ببلاش وتقوليلي يبقالك"
الست تعيط
معلش يادكتور .. إحنا غلابة وطافحين الكوتة ..و.....و......و..........
ولاشعرة إتهزت مني والله .. يمكن علشان مش مصدقها
" مش مشكلتي ياستي .. الحاجة دي بيندفع تمنها لشركات .. ومحدش فيهم بيستنى على فلوسه"
طيب معلش إستحملنا إنت يادكتور
" ياستي الله يكرمك ويوسع عليكي .. زي ماستلفتي تمن العملية .. إستلفي تمن الدوا"
يعني أسرق علشان أديك تمنه
" تسرقي ماتسرقيش ..أنا مش هديكي حاجة من غير ماتدفعي تمنها"
تعيط وتقولي والله والله والله هجيبلك تمنه الصبح
" روحي ياستي هاتي تمنه .. وتعالى خديه ..أنا مش هقفل ..أنا فاتح للصبح "
يعني أسيب البت تموت
" تموت وللا تتحرق .. الدوا ده أنا جايبه بفلوس "
" هتدفعي تمنه .. تاخديه..مش هتدفعي .. يبقا إتفضلي "

ومشيت
وماخدتش الدوا



===
===
===
قبل ماحد يتهمني بالقسوة أو أي صفة تيجي على باله
أنا عارف ناس فقيرة أوي أوي بتسرح تبيع جلد بوتاجاز .. مابتجيش تاخد حاجة غير لما تدفع تمنها قبل ماتمسكها..عارف ناس مش لاقية تاكل..وقبل ماتاخد دوا بتدفع تمنه

ومحدش يقولي إن واحدة على وش ولادة ..وسالفين(زي مابتقول)مش اقل من 500 ج تمن العملية لو طبيعي(أو 1000) لو قيصري
ومش معاهم الــ 80 ج تمن الدوا

ناس كتير بتستعبط
وكنت أنا باكل من الكلام ده زمان
لكن الايام السودا دي.. مابقاش ينفع
ولا أنا غلطان؟