السلام عليكم ورحمة الله وبركاته

حبيت فى الموضوع ده اننا نتجمع فى بيتنا نتكلم ندردش نتعرف على بعض ونخرج بره جو العربيات شوية ...
انا بقالى فى المنتدى حوالى سنتين خلاص بقى بيتى التانى فعلا واليوم اللى مش بخش فيه المنتدى
بحس ان فى حاجه غلط بكون تعبان ومرهق من الشغل بس لاازم اخش اشوف ايه الجديد
 فى خلال الوقت ده اتعرفت على ناس تفرح فعلا شباب وكبار كلهم يجتمع فيهم صفات ممتازة كان فى
اعضاء كتير فى القسم وظروف الحياة بعدتهم ولكن الذكرى الحلوة موجوده ودايما بيكون فى تواصل بنا.
وماشاء الله قسم كيا كل يوم فى اعضاء جدد ناس بشوف مواضعهم ومشاركتهم بس نفسى اعرفهم.

 علشان كده فى الموضوع ده هتعرفنا بنفسك الاول اسمك وسنك وبتاكل كام مرة فى اليوم عندك مشكلة
قول متتكسفش ...هنتكلم فى كل حاجه وياريت كمان اللى عنده صورة يحطها علشان تكون المعرفة كاملة
وهتقلنا دخلت المنتدى ازاى وايه اللى شجعك تستمر فيه وايه اللى بيعجبك فى قسم كيا
وايه اللى نفسك يكون فى القسم
فى ناس انا عارف انهم بيقرو بس مش بيشاركو ...
ياريت تشاركو معانا عرفنا بنفسك يمكن من كل الموجودين دول هتلقيه جارك ويمكن
كمان ساكن فى نفس عمارتك .
خدو راحتكو خالص انتو فى بيتكم وسط اخواتكم .......
على بركة الله نبدا


 انا اسمى وائل محمد فوزى ( ابوليلى )
بقالى 37 سنة عايش عندى مكتب للدعاية والاعلان فى بدايته
ومتزوج وعندى بنتين اه والله وساكن فى فيصل والنعمة الشريفة
والبنت التالتة سوسو الشهيرة بالسيراتو اللى لسه مش معترفه انى ابوها
دخلت المنتدى لما كنت بدور على عربية لفيت فى مواقع كتير ملقتش اللى
انا عايزه غيرهنا ناس بتخدم من غير مقابل همها الاول انها توصلك
المعلومة لحد عندك ومعلومة عن تجربة مش مجرد انه سمع وبس