الموضوع: 8 مليون بني ادم بيخانقوا دبان وشهم

المشكلة يا أستاذ dehumanizer مش في مستوى الخدمات ولا الأمان ولا الشوارع ولا أي حاجة تانية.السكن في المدن الجديدة أحسن ميت مرة من القاهرة.
المشكلة بقى بجد إن الدولة بتعتمد على المركزية في الحكم.وهو ده اللي بيخلي إنك مستحيل تعيش خارج القاهرة بدون الرجوع على الأقل مرة في الإسبوع للقاهرة.
تعرف إن السودان مطبقة نظام الامركزية وده بيخلي كل ولاية من الولايات مستقلة تماما عن العاصمة وبيبقى ليها حكومة لوحدها و مجلس الشعب بتاعها ومجلس الوزراء بتاعها وكأنها دولة داخل الدولة:)ده حتى الخرطوم العاصمة ليها حكومة الولاية وحكومة الدوله:)
لو النظام ده إطبق عندنا أعتقد إن نص سكان مصر هيعيشوا خارج القاهرة وأنا واحد من الناس لو ده حصل هكون أول واحد يسكن في الوادي الجديد وأبعد عن الدزشة والزحمة والقرف بتاع القاهرة.

انا واحد مش بؤساء 6 اكتوبر ...... نقلت 6 اكتوبر دلوقتى بقالى سنه تقريبا ... بعد ما فاض بينا كلنا الكيل من القاهره وقرف القاهره والزحمه ...... لما كنت فى القاهره بجد كنت ممكن اقعد الف نص ساعه واكتر علاشان اعرف اركن .. و اكتر من مره كنت بقعد ساعه ونص علاشان اركن .. اه والله ساعه ونص ...... غير سكان العماره الغير متعاونين .. الميه الى كل شويه تقطع , الدوشه الفظيييييعه والخبط و الرزع الى فى الشارع ........ وحاجات تانيه كتير .
بس المميزات بقى :

لما كنت بروح التحرير او رمسيس ....... وسط البلد عموما .. كنت بروح مشى من غير لا عربيه ولا مواصلات فى حوالى 20 دقيقه مشى وديه ميزه ماهوله

كنت لما احب انزل مع اصحابى .. يحصل الاتى " الو باشا .. 10 دقايق وحكون تحت بيتك .. فل .. فل سلام " .


معدل استهلاكى للبنزين و العربيه كان منخفض جدا لان كل حاجه كانت قريبه ليا .

لو محتاج اى حاجه .. كنت بأجيبها من غير اى مشقه او مجهود يذكر ." بالمقارنه بدلوقتى " .

حاليا بعد الانتقال ل 6 اكتوبر :

المميزات

فرق شاسع فى موضوع الهدوه ... بركن العربيه تحت البيت من غير ما لف او اقعد ساعه ..... اترحمنا من السكان و عدم تعاونهم والميه الى كل شويه تقطع .

العيوب.................................

1- خدمات :-
صفررررررر فعلا صفر واقل من صفر...... مثلا العيش " مافيش عيش بلدى فى 6 اكتوبر ينفع ان بنى ادم ياكله .. والى ينفع يتاكل بالظبط وبدون مبالغه قد العيش الكايزر .........
مأساه علاشان نجيب خضار كويس او فاكهه .. اسعار الضعف غير انها بتبقى بايظه

كل محلات السوبر ماركت غشاشين وحراميه .... مافيش غير خير زمان بس الى بنتعامل معاه ...... يعنى لو فى حاجه عاوزها و مش موجوده حضطر اروح هايبر 1 " 22 كيلو رايح جاى " , او كارفور " 40 كيلو رايح جاى " !!!!!!!!!! .

مافيش اى نوع من المواصلات الدخليه للمدينه غير العربيات النص نقل الى مقفوله بصندوق خشب .... او التوكتوك ... او لو انتا باشا وبتحب البغدده .. بتوقف عربيه نص نقل وده هنا اسمه " المخصوص " اركب عربيه نص نقل وكده ابقى مخصوص متخيلييييين !!!!!!!!!!!!!

مافيش اى اوتوبيسات نقل عام , او مكيف " نهائى " فى 6 اكتوبر ... لو انتا من البؤساء الى معندكش عربيه حتروح القاهره بالميكروباص الى كل يوم بيغلى والى بتقرأ الفتحه على روحك قبل ماتركبه

محطات البنزين !!!!!!!!!
6 اكتوبر كلها مافهاش غير 3 محطات بنزين كالتكس , التعاون , شل ...... وكلهم خدمتهم زى الزفت" بلطجيه " وبنزينهم مضروب .. غير ان دايما التعاون وشل مش بيكون فيهم بنزين .

مافيش غير محطتين موبيل الى على اول المحور ...." انا عن نفسى عامل مقاطعه تامه مع كل المحطات ديه .. و بمون بنزين من امارات مصر الى جمب توكيل بروتون . بنزين ممتاز , وخدمه رائعه

ده بالنسبه للخدمات ..

---------------------------------
الامن :- العمال مالين 6 اكتوبر وبشكل فظيع وفى كل مكان ....... و محتلين ميدان الحصرى .. ربنا يستر على البنات الى بتمشى فى المدينه بليل ......

عربيات النقل الى جايه من الفيوم وكفر الشيخ وبنى سويف ........... ملين 6 اكتوبر وكل الى سايقين العربيات ديه ممعاهمش رخص قياده ....... معظمهم اساسا عيال صغيرين .

المشى عكس الاتجاه .. حدث ولا حرج ...... هوايه هنا ان كل سواقين النقل والتكاتك يمشو عكس

الشقه بتاعنا اتسرقت من فتره ... قبل مانسكن .. روحنا بلغنا فى القسم ... وجه واحد مش عارف ظابط ولا معاون ولا ايه ... قالنا معلش الى يجى فى الريش بقشيش !!!!!!!!!!!!!!!! ولا كأن فى حاجات اتسرقت ... ولا كأن فى باب اتكسر !!!!!!!!!

وغيره كتيييييييييييييييييييييير .

---------------------------------

التنظيم .. والنظافه :-

صفر ....... الى شاف 6 اكتوبر من 4 سنين بالظبط ... اقسم بالله لو شافها دلوقتى حيتحسر عليها ..........

التحضر والتنظيم والنظافه .....مابقاش ليهم معنى ..........زباله فى كل مكان وفى كل حته
حد ينزل ويمشى عند مجمع الامريكيه .. حيلاقى مجارى طافحه , زباله فى كل مكان , قهاوى اشبه بالغرز واسعارها غاليه ؟؟

كل يوم تلاقى الميادين بيهدو فيها ويبوظوها ويحطو فيها دعايه شكلها بايخ ولا مانكون فى الموسكى !!!!!!! مش قادر افهم ليه اخيرها دلوقتى الميدان الى قدام النادى ........ حافرينه مش عارف ليه ........ والميدان الى قبليه من ناحيه المحور ...... كان فى شكل زى الصخور " كان شكله راقى جدا ....... اتجاب على الارض تماما .......... اموت وافهم ليه ؟؟؟؟؟؟؟؟؟ ليه التخريب ده

طبعا مش حتكلم تانى عن المناظر الغير متحضره والغير ادميه ... للتكاتك الى ماشيه وعربيات النقل الى عامله زى عربيات المواشى !!! والعمال الى فى كل مكان ولا اجدعها حته عشوائيه ....... زى مانكون رجعنا لأيام الجاهليه !!!!!!!!!

--------------------------------------------------

باانسبالى
كل حاجه اتلخبتط لما سكنت هنا . علاشان انزل اشوف اصحابى .. لازم اتفق قبليها بفتره ..مش 10 دقايق واكون عندك زى زمان ...... واحط على الاقل ساعه ونص للطريق " على الاقل " , غير طريق الموت " المحور " الى كل يوم التانى ناس بتموت عليه ... و الدائرى الى دلوقتى بقى اسوأ من المحور .
خراب بيوت بالنسبه للبنزين ...... 6 اكتوبر كبيره وغير كده بعيده عن القاهره ........ يعنى من بيتى ل وسط القاهره 100 كيلو رايح جاى .


معلش انا طولت فى الكلام بس انا فعلاااااااااااااا مخنوق جدا ونفسى اسيب 6 اكتوبر وامشى
خلاص طهقت فعلا

تغور 6 اكتوبر بمميزاتها وعيوبها , ودلوقتى بقول فين ايام القاهره :)

المشاركة الأصلية كتبت بواسطة abdelaziz-waleed

يا نهار ابيض يا مهاب كل ده في 6 اكتوبر
انت اكيد بتهزر
دانا كنت بحلم اشتري حتة ارض وابنيها واعيش هناك في 6 اكتوبر
ايه البلد ديه
ياربي مافيهاش حاجة عدلة ابدا
دا بالعكس كل حاجة كويسة وجميلة بيبوظوها

اه والله .... وبدون مبالغه ..
بس 6 اكتوبر مكانتش كده ... انا اصلى كنت باجى اكتوبر من ايام الطفوله مع اسرتى يعنى بتتكلم فى سنه 94 ...... كانت فعلا مكان راقى جدا وكانت بيسموها " زمان " مدينه القصور قبل الهجوم العشوائى الى حصل فى الفتره الاخيره ..
انا فاكر اكتوبر من حوالى 6 او 7 سنين مكانش فى اختراع الميكروباصات الترامكو ولا العربيات النقل والقرف ده كلو ..... كان فى خطوط CTA من ميدان رمسيس .. وميكروباصات من رمسيس برده " وبرده مكانش فى مواصلات داخليه ............ بس كانت اكتوبر قمه فى النظافه والتحضر والرقى . ومكانش فى المناظر العشوائيه الى باشوفها ديه .وكان معظم سكانها عندهم عربيات ف مكانش فى مشكله فى المواصلات

اكتوبر حاليا فى ناس شايفاها جنه .... اعتقد ماشافوهاش زمان ايام التسعينيات .....

وبالنسبه للاسعار هنا ف منصحكش تشترى .. لان الاسعار هنا خرافيه .. والسوق واقف خالص ... كلو مترقب........بس عموما الاسعار حتزيد اكتر فى الصيف

المشاركة الأصلية كتبت بواسطة dehumanizer

يا خبر ابيض دنا كنت بفكر انقل اكتوبر او زايد يا مهاب .. كدة المخطط باظ خالص
طب نروح فين !؟

معقول للدرجة دي !؟

زايد احسن بكتير من اكتوبر .... لانها بعيد عن الجامعات و نوعا ما فيها نظام عن 6 اكتوبر ........
بس نصيحه اخويه لو انتا فعلا استقريت على زايد ...هات شقه فى كومباوند ....ماتجيبش غير مكان مقفول بأسوار .. اولا علاشان الامن.. ثانيا .. علاشان ماتبقاش قاعد فى بيتك وتلاقى واحد زبال جه وقلب الزباله قدام بيتك وعمال يقلب وياخد البلاستك ويسيب الزباله والورق فى الشارع ..........
او حبايبنا بتوع الانابيب ... الى ماشين عمالين يعملو سيمفونيه تخرم الودن

انا ارشحلك حدايق المهندسين .... مكان جميل و منظم ... هو يعيبه شويه ان الشوارع ضيقه وتحس ان المدينه متكربسه حبتين .... بس حقيقى مكان راقى وتصميم العمارات جميل .

و لو الميزانيه تسمح روح الرحاب بدون تفكير لثانيه واحده .... او مدينتى . دماغ تانيه خالص ....
فعلا فكره الكومباوند ديه فكره هايله مليار % "لو مع شركه محترمه " ..بتعزلك عن عك وقرف القاهره .. ولو حتى بنسبه 50 % ..

انا والله حتشرف بيك لو كنت جارى فى اكتوبر:) "" خصوصا بعد موضوع انا اللجنه ..علاشان تواجه معايا التكاتك و النص نقل "".. بس واجب عليا النصيحه ......

أولا أشكرك يا dehumanizer (يا ريت تكتب أسمك بالمناسبة :)) على الموضوع المهم ده و ثانيا ألف شكر لمهاب على الشرح المفصل.

أنا حاسس ان البلد دي مافيهاش أي مكان مريح يعني:
-6 أكتوبر: شوفنا المعاناه بتاعة مهاب.
-الشيخ زايد: مدينة حلوة من ناحية كمية المساحات الخضرة و الهدوء و الهواء النقي و لكن... الأسعار أبتدت تاكل فرحة الواحد (2500 للمتر في بعض الأحيان) - أسعار الأكل و الشرب و كل حاجة عامل الجشع المصري بيدخل فيها (يبعلك سندوتش الفول بجنيهة اللي هو نفسه و أحسن منة ب50 قرش في وسط البلد) - تقريبا مافيش محلات خالص (هايبر وان و خلاص)- كمان مش متخيل لو واحد العربية عطلت منه هيعمل ايه (طبعا هايدوخ على ميكانيكي و هيدفع دم قلبه لو جاب واحد)- بالليل مافيش حياه (هدوووووووووء)
-الرحاب و مدينتي : أسعار و همية ( يا جماعة دي مدينتي جزء كبير منها خارج نطاق محافظة القاهرة:)) دا أنا لما بروح الهايكستب باحس اني مهاجر!!!! و أكيد كل العيوب بتاعة الشيخ زايد هتنطبق فيما عدا موضوع المحلات.
-الشروق و العبور: نموذج أهون (ماديا) و أقل فخامة من مدينتي و الرحاب.
-حدائق الأهرام: بحس ان كل الرملة بتاعة هضبة الأهرام (عبق التاريخ :)) بتروح عليها و ده غير ان الشوارع هناك غريبة (طاعة نازلة طالعة نازلة :))
-زهراء المعادي: منطقة المفروض انها تتبع المعادي (يعني قريبة من وسط البلد و الشياكة) بس للأسف... جشع الشركات و المقاولين باين أوي هناك (بحس ان لو فيه متر مربع واحد بس فاضي هايبنوا علية عمارة ) يعني احساسي انها هاتقلب على دار السلام بس "الشيك"
-فيصل: أسعار معقولة بالنسة لكل اللي ذكرتهم و طبعا الأقرب لوسط البلد بس طبعا عيبها الأساسي هو العشوائية ثم العشوائية في كل حاجة.
-الهرم: نموذح أرحم و أشيك بكتير من فيصل بس أكيد أغلي.

أخيرا أحب أوضح أنا مش ساكن في أي منطقة من اللي فوق و كلامي اللي فوق عبارة عن رأي الشخصي لأني لفيت كتير علشان ألاقي مكان كويس أسكن فيه في المستقبل.

أرجو لو أي زميل ساكن في أي منطقة من دول يقول رأية سواء باموافقة أو المعارضة لكلامي و يشرح أكتر عن واقع تجربته العملية ... و شكرررررررررررا

يااااااااااااااه.. للدرجة دي مصر كلها مختصرة في القاهرة و ضواحيها؟.

متهيألي لو الدولة وفرت حياة كريمة لأبناء الأقاليم مش هايضطروا يهاجروا للقاهرة و ماكانش الوضع في القاهرة هايبقى بالمنظر ده.. يعني شاب اتولد و نشأ في بلدته، سواء في كفر الشيخ.. المنصورة.. الإسماعيلية.. السويس و بدأ يدرو على شغل بمرتب يعيشه و يقدر يفتح بيه بيت و عشان مش كل الشركات الكبيرة المحترمة متكومة في القاهرة فقدر انه يلاقي وظيفة تناسبه في بلده.. اشتغل و اتجوز و استقر هو و أولاده في بلده، ده حتى أبناء الإسكندرية مش بيلاقوا شغل كويس فبيضطروا برضه ييجوا القاهرة.

انما السيناريو اللي حاصل للأسف ان الشاب من دول بيتخرج و يبقى نفسه ما يسبش بلده و أهله، انما مش بيلاقي شغلانة عدلة فبينزل على القاهرة و بيلاقي في القاهرة مبتغاه.. الشركات الكبيرة كلها فيها و كل وسائل الخدمات فيها.. فطبعا مش بيفكر او كمان مش بيعرف يرجع بلده تاني.. فبيتجوز و يستقر في القاهرة.. و عياله يكبروا في القاهرة.. و يدخلوا مدارس القاهرة و يركبوا مواصلات القاهرة و يبدأوا همه كمان يدورا على شغل و سكن في القاهرة.. و الموضوع في اضطراد مرعب و الله اعلم اللي اسمها القاهرة دي هايرسي بيها الحال على ايه

اما المدن الجديدة فأنا باسميه فخ اليائسين من زحام القاهرة.. المنظر هناك حياة وردية، مافيش زحمة و لا تلوث.. و لا حاجات تانية كتير كمان مهمة.. ده غير ان لا زالت هناك مركزية زي ما ذكر elpasha009.. مدن جديدة بس برضه الشغل في وسط القاهرة.. المدارس النضيفة هناك.. الوزارات و المصالح الحكومية هناك.. فبررررررررضه هتلاقي زحام باصات المدارس و هتلاقي تكدس العربيات وقت الذروة.. ده غير مأساة المحور لكل ساكني 6 أكتوبر و بيشتغلوا براها و اللي ساكنين برة 6 أكتوبر و بيشتغلوا جواها

اللي متظبطين بأه همه اللي ساكنين في المدن الجديدة و بيشتغلوا جواها برضه.. حد مثلا ساكن في 6 أكتوبر و بيشتغل في القرية الذكية.. كده يعني

انما اللي حاصل ان الدولة عمالة توسع في رقعة القاهرة أفقيا و رأسيا و مش بتحل المشكلة من جذورها.. وفروا حياة كريمة لأبناء الأقاليم في بلدهم و همه عمرهم ما هايفكروا يهاجروا للقاهرة آآآآآآآآآبدا.