المنتدى ده يحير بجد

**Goodle** · 27-05-2008 04:53 PM

المشاركة الأصلية كتبت بواسطة fahd_628

ممكن لو عاوز عربية صغيرة تجيب بيكانتو ضمان 5 سنين و عربية ممتازة

الراجل بيقولك مش عاوز هاتشباك يا فهد :)

**MMamdouh** · 27-05-2008 04:54 PM

دة طبيعى جدا لانك بتسال الاسئلة الخطاء... متسالش اجيب ايه... اسال دى عيوبها ايه و ميزاتها ايه

اولا الشعب المصرى ودنى :bigear: يعنى بيحب يسمع و يردد و خلاص... و انا متاكد نص الناس اللى قالوا على اى عربية وحشة ميعرفوش هى وحشة ليه... هما سمعوا كدة و خلاص

انت اللى تقرر تجيب ايه.. اكتب فى ورقة اللى انت عايزة من العربية و ايه اللى مهم بالنسبالك و ضرورى تكون العربية اللى حتشتريها بتوفرة ليك

ابحث فى كل قسم من اقسام العربيات اللى انت لقيت انها بتحقق الحاجات اللى انت عايزها و اعرف عيوبها و مميزاتها... و بشدد اللى راكبين العربية مش اى حد تانى... ما حك ظهرك مثل ظفرك

اكتب العيوب و المميزات و قارن بين العربيات و بعضها فى ضوء احتياجاتك و ردود الناس و انت اللى تقرر مش حد تانى

مثال على كدة لما انا كنت بدور على عربية كنت عايز حاجة:

1- مش غالية
2- قطع غيارها رخيصة و متوفرة
3- صيانتها سهلة و مش معقدة
4- اعادة البيع سهلة
5- تكون سيدان
6- تكون 4 باب
7- فيها تكييف
8- عربية اثبتت نفسها فى السوق مش حجرب فيها و تجرب فيا

دى اساسيات مينفعش التانزل عنها

الكماليات ممكن يبقى فيها اخد و عطا... يعنى لو موحود كويس... مش موجود يبقى مجر اخاك لا بطل

1- باور
2- سنتر لوك
3- موتور اكبر من 1300
4- تعليق مستقل للاربع عجلات
5- جر خلفى
6- RPM

بعد فحص و تمحيص لقيت ان المتاح فى الميزانية بتاعتى + المتطلبات بتاعتى هى اما BMW E30 او لانسر 98 او لانوس و لما نزلت السوق لقيت الBMW اللى فى حدود الميزانية موديلات نصف الى اخر التمانينات و غالبا بتبقى كنبة و بالتالى حتاثر على بند الصيانة و اعادة البيع لان العربية اللى ماشية 20 سنة اكيد كل حاجة فيها اتهلكت و طلع عينها

لما بصيت على اللانسرات لقيت ناس بتتكلم فى اسعار عالية و كماليات مفيش... يعنى فى نفس السعر اللى تجيب بية لانسر تكييف بس تلاقى ممكن تجيب لانوس تكييف و باور... لو اللانسر فيها باور و زجاج كهرباء تلاقى السعر قريب من لانوس كاملة

زاد على كدة ان قطع غيار اللانوس ارخص و خبرتى مع عربية الوالد فا كفة الانوس رجحت عن كفة اللانسر

زى ما شفت الاختيار بيبقى تحديد المواصفات ثم جمع البيانات ثم القرار... لازم انت اللى تقرر مش الناس

فيه مثل بيقول لولا اختلاف الاذواق لبارت السلع و بالتالى مستحيل تشترى عربية بالشكل دة لان كل واحد له فكرة و ذوقة و ميولة و انت ولا واحد من دول... انت شخص ليك كيانك المستقل و ذوقك الخاص و بالتالى انت اللى تقول "انا عايز ايه" مش الناس اللى تقولك "اركب دى و متركبش دى"

MMamdouh

**Goodle** · 27-05-2008 04:58 PM

شوف يا أحمد باشا
دلقوتي المعرض بتاع أخبار اليوم للسيارات خلاص هايبتدي كمان 10 أيام أو أقل

روح واتفرج.. جايز تقرر ساعتها
ولما ترجع من المعرض وانت في دماغك عربية أو اتنين
افتح المنتدى على العربيتين دول (ما تنساش تدور كويس في قسم المقارنات بالإضافة للساحات المنفصلة الخاصة بالعربيات اللي وقع اختيارك عليها)

هاتقوللي برضه هلاقي ناس بتشتم في العربية وناس بتشكر فيها
هاقولك إن دي أحسن حاجة توضحلك كل جوانب العربية
وفي الآخر انت لما تعرف المزايا + العيوب تخرج بتقييم يخصك انت

فلما تختار عربية انت راضي بيها ومتقبل العيوب اللي بيها.. تصل الاستخارة وتتوكل على الله تروح تحجز أو تشتري
فإذا لقيت ربنا يسر لك موضوع الحجز/الشراء يبقى ده اللي ربنا اختاره ليه
أما إذا لقيت موضوع الحجز/الشراء معصلج، تعرف إن ربنا مقدر ليك الأحسن بإذن الله

وما تنكرش إن لولا اختلاف الأذواق لبارت السلع
وربنا يصلح حالي وحالك... قول آمين :) :)

**rawdat** · 27-05-2008 05:01 PM

ربنا يكرمك بالأفضل ليك
ادعي الله و استخير
و متهيألي يعني ممكن :
تحدد رنج الفلوس
و اه الإمكانيات إلي عايزها و حجم العربية
و كل واحد بيبقى في ماركة أو اتنين هما إلي شدينه أوي
و إن شاء الله ربنا يكرمك بعربية كويسة في وقتها

**ahmed_bq** · 27-05-2008 05:04 PM

كتر خيركو يا جماعة على الردود .. طبعا الاستخارة هتتعمل ان شاء الله

بس بجد اللي يحبط في المنتدى ان تلاقي ناس رفعت العربية السما وتقول خلاص انا هشتري دي

تلاقي تلات اربع مواضيع او ردود جابو العربية الارض ....

ولما اسئل اصحابي عن العربيات دي تلاقي كل واحد بيرد بكل ثقة وتأكد ان عربيته الاحسن والباقي الاوحش

يارب ربنا يهدينا ونبطل نعيب في كل حاجه .... ساعات بحس ان الناس شغاله في الشركات او تبع الوكيل وهياخدو فلوس من ورا الكلام ده

دانا ساعات بفطس من الضحك على الحروب الكلامية اللي بقراها

طب حد يرشحلي 3 عربيات كده استخير بينهم ومعللا الاسباب لو مش هيدايقكو

**م.محمد شافعي** · 27-05-2008 05:16 PM

عزيزي اعتقد في الفئه السعريه اللي بتتكلم عليها هقولك علي 4 اختيارات من رايي واتمني يساعدوك:
1- دايو لانوس (عربيه قطع غيارها متوفره و رخيصه و بيعها سها و صيانتها سهله ومعقوله جدا بس شكلها قديم شويه)
2- شيري a15 (عربيه واسعه و كويسه جدا وموتور قوي بس صوته عالي عفشه ناشفه بس تتحمل شوارع مصر دا اذا كنت ممن لا ينظرون الي بلد الصنع و المهم العربيه كفائتها ايه بس عيبها ان في قطع غيار كتير مش موجوده غير عند الوكيل و الوكيل جيد بشكل عام)
3- اسبرانزا 516 (بصراحه انا لم اجربها شخصيا بس ناس كتير شكرت فيها علي اساس سعرها وامكانيتها)
4- شاهين 1600 (سيارة الشعب بس بصراحه انا مش بحبها خالص و طبعا دي ازواق)
نصيحه اخيره بقي بينزل في جريدة الاهرام يوم الجمعه او الاخبار يوم السبت في ملحق السيارات اسعار العربيات شوف العربيات اللي في حدودك مقدرتك الماليه و اتفرج عليهم في المعرض اللي يوم 10 و اللي نفسك تستريح ليها استخير ربنا و اشتريها مع مراعاة مواضيع الوكيل و قطع الغيار و ما الي ذلك.

**أبو عبدالله** · 27-05-2008 05:20 PM

المشاركة الأصلية كتبت بواسطة ahmed_bq

كتر خيركو يا جماعة على الردود .. طبعا الاستخارة هتتعمل ان شاء الله

بس بجد اللي يحبط في المنتدى ان تلاقي ناس رفعت العربية السما وتقول خلاص انا هشتري دي

تلاقي تلات اربع مواضيع او ردود جابو العربية الارض ....

ولما اسئل اصحابي عن العربيات دي تلاقي كل واحد بيرد بكل ثقة وتأكد ان عربيته الاحسن والباقي الاوحش

يارب ربنا يهدينا ونبطل نعيب في كل حاجه .... ساعات بحس ان الناس شغاله في الشركات او تبع الوكيل وهياخدو فلوس من ورا الكلام ده

دانا ساعات بفطس من الضحك على الحروب الكلامية اللي بقراها

طب حد يرشحلي 3 عربيات كده استخير بينهم ومعللا الاسباب لو مش هيدايقكو

يا اخي انت محير نفسك ليه
استخير وتوكل وان شاء الله ربنا يرزقك الخير بنيتك ان شاء الله
بس انت اخلص النيه لله انه يرزقك الخير اين كان

وبعدين هات اقلهم عيوب
يعني لو كلهم فيهم عيوب هات اقلهم ذكر للعيوب