الموضوع: الجو ثلج والعربيه مش عايزه تسخن

بغض النظر عن خصائص المعادن و الزيوت مع درجات الحرارة لأنه موضوع كبير....
يجب علينا كمستخدمين للسيارات ان نتبع تعليمات التشغل التي اوصي بها المصنع
وتعليمات التشغيل دي بتقول انه لا يجب الضغط علي السيارة و القيادة بسرعات عالية إلا بعد وصول درجة حرارة المحرك الي درجة حرارة التشغيل الطبيعية ودي الكاتالوج عندي بيقول انها بتبدأ من حوالي 70 درجة الي 100 درجة مئوية حسب المؤشر و الظروف الطبيعية للتشغيل هي درجة 90 و لكن بيرتفع قليلا و بيقل أيضا في المدي المسموح به علي حسب الجو المحيط بالسيارة و درجة حرارته

وبعد الكلام اللي فوق ده كله مينفعش نقول انه العربية لما تمشي بدون ثرموستات و تبقي باردة هتكون أفضل ومش هتتأكل داخليا بسرعه و ........ كلام كتير ليس له أساس صحيح
لذلك لتعم الفائدة اللي معندوش ثرموستات راكب يركبه او لو درجة الحرارة بتنزل مع الجري بسرعه وفي الأماكن المفتوحة يكشف عليه احتمال يكون مسكور

المشاركة الأصلية كتبت بواسطة agaty1st

يا باشا محدش قال ان ألغائها صح كل الموضوع ان انا لما اشتريت العربيه مكانتش الترموستات دي موجوده و انا عرفت انها مش موجوده لأن العربيه مؤشر الحراره على طول على الربع صيف شتا و الموضوع ده مش عامل معايا اي مشاكل
فالسؤال بيقول : في مشكله مستقبليه ممكن تحصل لو الواحد مشي بيها كده ولا لأ ؟
و الجدل بيني و بين استاذ سيد على الوصول لسبب المشكله لكن انا اعتقد ان موضوع التأكل للمعادن ده مش صحيح لأن عربيتي اللي قبل الأبيزا كانت مازدا 323 و كان مؤشر الحراره على طول على الربع زي كل الياباني و العربيه كانت مفيهاش اي مشاكل
أينعم كل موتور و ليه تصميم لكن المعدن و الزيت خصائصهم واحده في كل العربيات

لا طبعا خامات معدن المحرك بتختلف من شركة لأخري ومش كله زي بعضة و كذلك درجة حرارة التشغيل للمحرك بتختلف من شركة لأخري حسب تصميم المحرك و تصميم المؤشر و العدادات
يعني مثلا مش لازم الربع في المؤشر في المازدا يكون هو نفسه في مؤشر الابيزا

هل ممكن تحصل مشكلة بالتأكيد ايوه لأن المحرك دائما يعمل في درجة حرارة أقل من المطلوب و كذلك الزيت
لذلك انتشار الزيت في المحرك لن يحدث بالطريقة السليمة و لن تحدث عملية التزييت بشكل سليم

و عايز أقلك بس ان الزيت اللي مكتوب عليه 5w40 ده مش معناه ان درجة حرارة التشغيل القصوي له 40 لأ ياريت تراجع مواضيع الزيت بالقسم العام او التعليمي لتعلم معني هذا المصطلح

وفي النهاية كل مقصدي انك تتبع تعليمات تشغيل المصنع أنه هو أدري بما صنع وهو يعلم الصح فين من الغلط حضرتك حابب تخالف ده براحتك ولكن لا يصح إلا الصحيح

المشاركة الأصلية كتبت بواسطة agaty1st

بالنسبه لموضوع الزيت بس احب أقول لحضرتك أني بشتغل في شركة بترول و وفي الاقسام الفنيه مش الاداريه و موضوع الزيت اللي في القسم انا اللي كاتبه بس مش موضوعنا دلوقتي لكن أؤكدلك ان موضوع الزيت ده معظم الناس عندها مفاهيم كتير غلط فيه
و بالنسبه لدرجة الحراره و علاقتها بتأكل بالمعادن هل توافق على ان بروده المحرك تسرع من تأكله ؟ و لو رأيك كده يبقى أزاي في عربيات مروحتها بتلف مع الموتور يعني بتشتغل مع الموتور و تبطل مع الموتور و في السفر الموتور بيتلج
انا متفق معاك ان الغاء حاجات من الموتور غلط بس كل الموضوع محدش قال ألغاء الكوعه ده يعمل أيه في الموتور ممكن يكون مثلا بيأثر على السحب أو على أستهلاك الوقود .....ممكن
لكن تخليه يتاكل ......صعب و الله أعلم

جميل ياريت لو لقيتني اتكلمت في موضوع بالخطأ ارجو منك تصحيح معلوماتي لأننا جميعا نتعلم من بعض وانا احب ذلك ان رأيتني مخطأ صححلي
حضرتك المعادن لها نسبة تمدد مع زيادة درجة الحرارة ده معني فيزيائي و لكن مش ده موضوعنا لأن كل شيء محسوب لذلك ولكن المشكلة هنا في كفاءة التزييت ده اللي بيعمل مشاكل للمحرك

و الدليل علي ذلك انا من خلال استخدامي لزيت 20w50 تجد المحرك فيه ارتجاج و صعوبة تحرك دون تسخين صباحا و السبب هو ان الزيت مازال لم يصل لدرجة حرارة التشغيل المناسبة للزيت للمحرك و و العكس عند استخدامي زيت 5w40 تجد المحرك طبيعي و هاديء و لا توجد به مشكلة في التحرك و لكن بهدوء حتي يصل لدرجة التشغيل العادية 90

الفرق بين النوعين ان الثاني تسطيع معه تشغيل المحرك عن درجة حرارة أقل من الأول
المعني من ده هو قدرة دورة التزييت بمشتملاتها علي القيام بعملها بشكل مناسب و الذي لا يحدث سوي عند درجة حرارة معينة للمحرك والزيت و ان لم يصل المحرك لهذه الدرجة عملية التزييت لن تتم بالشكل المناسب و هيحدث تأكل بين أجزاء المحرك و بعضها

المشاركة الأصلية كتبت بواسطة agaty1st

انما أحساسي الشخصي ان البروده دي ممكن تأثر على السحب أو على استهلاك البنزين لأنك بتدوس جامد عشان العربيه تمشي

طيب بالنسبالى مكنشى فيه تأثير على السحب اطلاقاً بالعكس العربية كانت عاوزة تجرى وتنطلق وأعتقد مفيش تأثير على استهلاك البنزين كمان والله اعلم وبما انى متابع الموضوع ده من بعيد لبعيد ... قولت اشارككم لانى كان عندى نفس التساءل وعملتله موضوع فى قسم هوندا .
http://www.nilemotors.net/Nile/266432-a.html

المشاركة الأصلية كتبت بواسطة acoal

وليه منقولشى ان المشكله مش فى الزيت ودورته قد ما المشكله هى اختلاف درجات الحراره بين الزيت والمياه والبساتم او بمعنى اصح الاسطوانات اللى البساتم بتجرى فيها والنظريه كالاتى
الاسطوانات درجه حرارتها عايزه تعلى بسرعه والزيت معندوش مشكله فى كده لكن لما الترموستات يكون مفتوح على طول ده بيخلى المياه تبرد الاتنين بشكل مستمر والمعدل الطبيعى اللى هو 90 بيوازن بين التلاته من غير ما يحصل مشاكل لاى حد فيهم اما بالنسبه لموضوع العربيات اللى المروحه راكبه على سير فهى ادائها بيقل جدا فى الشتاء عن تجربه انا كان معايا موتور الكرسيدا ال2000 سىسى وكانت بتغلبنى لحد ما تدينى الاداء المقبول
بدون مبالغه كنت بمشى بيها لحد الشغل على الدائرى فى الشتاء مسافه 10 كيلو ويادوب لما بوصل هناك بحس انها يادوب بدات تفوق كنت بنزل الاقى غطاء التاكيهات مش دافى حتى
بالنسبه للزيت فطرمبه الزيت بتقدر تغرق الموتور بالزيت فى خلال 60 ثانيه للعربيات القديمه واقل من 30 ثانيه فى العربيات الجديده اظن بعد سنه 2000 و ده من كتالوج الميجان 2006
وفى معلومه تانيه كنت بسمعها ان فى علاقه بالموضوع ده وجوان وش السلندر وانه ممكن يضرب وده من بق واحد صاحبى ثانوى صناعى قسم سيارات بس طبعا مقدرشى اسنده لسبب علمى

كلام زي الفل و عايز بس أوضح ان المحركات اللي عليها مروحة شغالة معاها باستمرار ده اختراع مصري لأني شفته من قبل في عربيات فيات كتير و لكنها نازلة من مصنعها بدورة تبريد و ثرموستات فصل و تشغيل طبيعي زي العربيات الحديثة و لكن الصنايعية بيفهمو اكتر و بيلغو كل ده و يحطلك مروحة علي صدر الموتور