معلش يا جماعة انا تعبتكم معايا
بس دة عشمي فيكم
كل بصراحة الي شاركوني في الموضوع السابق http://www.nilemotors.net/Nile/267484-a.html استفدت منهم كتير وبجد هما علي دراية وخبرة الحمد لله احسن مني بكتير

أنا شوفت اني أعمل موضوع منفصل عن الموضوع الأولاني لأنه بصراحة خرج عن نطاق طرمبة البنزين واحتوي علي نقاط اخري كتير
وبالنسبة لل مش متابع معايا من الأول معلش يتعب شوية ويقرا الموضوعات التالية (فيها تفاصيل اكتر)

http://www.nilemotors.net/Nile/260326-a.html
http://www.nilemotors.net/Nile/264984-a.html
http://www.nilemotors.net/Nile/25786...post3873959549
http://www.nilemotors.net/Nile/25786...post3873970850

انا هقولكم علي شوية حاجات في دماغي و عايز أرائكم فيها

1- العربية عندي قعدت ما يزيد عن الشهرين ونص بتتصلح ما بين سمكري و كهربائي وميكانيكي (واحد طبعا غير عصام) وانا ذكرت كدة في موضوع حكايتي مع الأبيزا - مش دة المهم دلوقتي
المهم هنا ان العربية قعدت الفترة دي من غير موتور وكل الخراطيم والمواسير كانت مش متغطية ولما سقطت الموتور بتاعها (ال1000 سي سي الأستوك بتاعها) كان التانك فاضي تماما وروحت بيها عند الكهربائي وجبت بنزين في جركن 4 لتر (جركن زيت قديم وقذر وماكنش بغطا) ولما دورتها عند الكهربائي روحت عند الميكانيكي (هو نفسه الي أجهض قصدي سقط الموتور) يكمل عك قصدي تصليح وروحت جبت جركن تاني اقذر من الأولاني ورجعت حطيت 10 لتر 92 من المحطة زي البني أدمين

2- لما الموتور الأستوك (ال1000 سي سي) ودع وسقطت المكنة ال1400
المهم يعني لما كنت في مرحلة الشكوي من الفيش والحساسات والكلام دة
واحنا بنفك الرشاشات لقيت الرشاشات الي طالعة منها بدل ما يبقي لون الصمام بتاع الرشاش اصفر دهبي كان لونه بني مسود غامق والأربع اخرام بتوع الرشاش مسدودين وعليهم زي الطينة او اوساخ في شكل حبيبات
أضطريت اغيرهم برشاشات تانية كانت عندي من الأول (اصل اول لما اشتريت العربية غيرت رشاشات واحتفظت بالقدام واهو الرشاش الأبيض ينفع في اليوم الأسود)

3- البوجيهات الي راكبة حاليا بوجيهات كنت بس بدور بيهم العربية بعد مشاكل الفيش والعك بتاع الضفيرة وكان المفروض اغيرهم بس الصراحة انا عامل فيها فهمي وماغيرتهمش لحد دلوقتي والبوجيهات دي عصام جابهملي من الورشة عنده (بوجيهات خلع وكانت مرمية عنده)
المهم ان الأربع بوجيهات مشكلين 3 شمعة علي 1 شمعة NGK علي بوش علي بوسنة علي هرسك علي دنسو ياباني علي الماني علي انجليزي علي روسي (الأمم المتحدة كلها في الموتور ويمكن كمان الأتحاد الأوروبي)

المهم

انا شكوكي كلها منحصرة في التالي

أ- التنك متوسخ وعمال يرمي طينة علي الرشاشات بيسدها
لأني سامع صوت الطرمبة شغالة كويس والحمد لله
انا شاكك اما في وساخة بتسد المصفاة بتاعة الطرمبة بتخليها مش عارفة تسحب
او الوساخة بتسد الرشاشات بتخليها تتكتم ماتوصلش بنزين للبوجيهات

ب- البوجيهات نفسها تكون بتقطع لأن اكيد الي غير البوجيه ورماه عند الميكانيكي اكيد مش منتظر منه انه يشتغل واكيد من كتر الرمية مرطب وبايظ

ج- يكون في لووز Lose في اي فيشة او حساس او ماشابه (بس دة مستبعد شوية وهخليه اخر احتمال لأني المفروض اني مغير ضفيرة)
الي خلاني بقول كدة اني ماشتكتش من الطرمبة غير لما بعد ما غيرت الضفيرة


انا كدة تقريبا خلصت كلام

ارجوكم يا جماعة تساعدوني
انا مش عايز ارمي اي مليم في الأرض
انا شبعت مصاريف من شهر 8 الي فات لحد دلوقتي صارف اقسم بالله مايزيد عن ال10,000 جنيه واساسا كان تمن العربية لسة مابردش ومش عارف اركب العربية يومين علي بعض

فعلا السيات عربية اعتمادية جدا
بتعلمك الأعتماد علي النفس بعيد تماما عن استخدامك ليها

الذ حاجة في الموضوع نسيت اقولكم عليها
انها لما بتعملها معايا بسيبها 3 او 4 ساعات وباجي ادور بدور عادي ولا كأن في حاجة
عملتها معايا لحد دلوقتي 3 مرات
اول مرة يوم الخميس الي فات 12-1-2012
تاني مرة يوم الخميس بردو 19-1-2012
تالت مرة يوم الجمعة 20-1-2012

وفي ال3 مرات بسيبها شوية وادور بدور
اول مرة لما خبطت علي الطرمبة اشتغلت
تاني مرة بخبط مافتحتش قصدي ماشتغلتش وسيبتها 8 ساعات وروحت الشغل ورجعت بدور دارت
ثالث مرة (كنت اتعلمت بقي) سيبتها 4 ساعات وبدور دارت

ملحوظة:
طوول ما العربية ماشية ودايرة مش بتقطع مني
بتقطع بس لما ابطلها واجي ادور تاني

ملحوظة تانية:
مش بتعملها مني تحت البيت
لا ،بتسيبني اخرج وابعد عن البيت وتعملها (عشان احتاس واتشحطط واركب مواصلات وافضل اتصل بأخويا الكبير واتعبه معايا ويجيلي وفي الأخر تدور وأتأسفله اني تعبته علي الفاضي) في تاني مرة فضل مستنيني ساعتين ونص في الشارع في عز البرد جمب العربية مكان ما عطلت خايف عليها تتسرق ولقيته جايب معاه واحد صاحبنا معاه فورد مونديو وجايبين سلبة (حبل غليظ) وكانوا عاملين حسابهم علي انهم يقطروني

والله المستعان
،
،