الموضوع: السيات عربية اعتمادية جدا - الجزء التاني من موضوع طرمبة البنزين بعافية

المشاركة الأصلية كتبت بواسطة ehab_mansour

باختصار شديد عايزك تمشي معايا واحده واحده ولو حد شاركنا يبقي عمل فينا خير و ساعدنا
1- عشان تنهي موضوع الطرمبة تماما حضرتك كل ميحصل معاك المشكلة دي دور علي المشكلة فين بالضبط
أولا شيل أفيز خرطوم البنزين من عند المحرك و افتح كونتاكت للحظه و ياريت لو حد يفتحلك وانت تمسك الخرطوم عشان تشوف هل البنزين واصل ولا لأ عن المحرك لو واصل يبقي انسي الطرمبه تماما ولو مش واصل تبقي هي المشكلة

انت قصدك الخرطوم الي بيدخل بنزين للرشاشات ؟؟
كما هو واضح في الصورة



اوك دة هيبين ان كانت الطرمبة بتضخ ولا لاء
انا بتشيك عليها بشكل تاني وهو عند طريق السمع
لو سمعت صوتها يبقي شغالة
بس المشكلة اني احيانا مش بسمع صوتها (يبقي كأنها اتحرقت)
ولما بسيب العربية كام ساعة بدور بتدور (يبقي سليمة ومش محروقة ولكن مقطوع عنها الكهرباء)
وعن شرط عايز أقولك ان تاني وثالث مرة عملتها معايا كنت مشيت مسافة لا تزيد عن 2 كيلو متر يعني العربية مالحقتش تسخن السخونة الي تعطلها وكمان كنت مفول ولحد دلوقتي العربية مفولة التانك الأساسي والأضافي ومشيت عليها اجمالي 67 كيلو متر يعني لحد دلوقتي مازالت مفولة والعداد ماتحركش عن الفوول


ثانيا لو البنزين واصل حضرتك تراجع تماما علي الكهرباء بتاعت العربية (الموبينه + الأسبراتير + البوجيهات)تتأكد ان فيه كهرباء واصلة البوجيهات وانها مافيهاش مشكلة و تأكد تماما تماما ان البوجيهات مهما كانت ضايعه مستحيل تخلي العربية متدورش لأن المحرك لو طبيعي دون مشاكل ممكن يدور علي 2 بوجيه و لكن هيهرتل و لكن هيدور المهم انسي قصة البوجيهات دلوقتي اهم شيء يكون واصلها كهرباء

كهرباء
هي دي مشكلتي
انا شاكك في حاجتين
1- انا لسة مغير ضفيرة وفيش زي مانت عارف
2- غيرت الأسبراتير والشاكوش بردو قريب بعدها بيوم تقريبا يعني من اسبوعين بالظبط
http://www.nilemotors.net/nile/26032...post3874035022
ودي المشاركة الي قولت فيها اني غيرت اسبراتير وجبته من عند عصام - تفتكر يكون بيعلق ؟؟؟؟
انا ممكن اركب الأسبراتير بتاعي القديم واجرب عليه بس عيبه انه كان بيخلي العربية فيها نتشة كدة في الأر بي ام بينزله لحد 0.5 ويرجع تاني طبيعي

ثالثا لو السببين اللي فاتو مافيهمش مشكلة نهائيا يبقي هتخش في المرحلة الثالثة و هي الرشاشات و دي من اهم أسباب ان العربية هتبقي دايرة طبيعي ولما تبطلها متدورش و السبب ان الرشاش بيسقط بنزين زيادة ف غرفة الاحتراق وقت متبطل العربية و لما تحاول تدورها مش هتدور لأنها مخنوقة بس المفروض تدور بعد محاولتين او ثلاثة

دة بردو احتمال وارد
انا عندي لسة الرشاشات الي كانت راكبة بس للأسف تاهت وسط الرشاشات القديمة لأني حطيتهم كلهم في علبة واحدة مع بعض واعتقد بقي صعب تمييزهم عن الجداد وخصوصا انهم كلهم نفس الكود والبارت نمر مكتوب عليهم زي بعض

رابعا أكد علي فيش (جمع فيشة) العربية كلها و خاصة الفيوز بوكس اللي عندك فوق رجليك وانت سايق محتمل يكون فيه شيء مهزوز او فيشة مش راكبه كويس يعني تكون متركبه ولكن السوكت غير مغلق جيدا

أشك في الموضوع دة
الكهربائي الي عمل الضفيرة لا غبار عليه
بس بردو كله وارد

خامسا هناك احتمال اخير وهو ان الموبينه عندك فيها حاجه يعني بتهرب كهرباء او بتسخن ولما تسخن بزيادة من سخونة المحرك تقوم متخرجش كهرباء وده هيبان معاك من محاولا الكشف اللي قلتلك عليها في ثانيا

مش عارف ليه مستبعد كل مايخص الignition system من موبية ومارش وحاسس انهم شغالين كويس لأن العيب دة ماظهرش غير لما غيرت الضفيرة والأسبراتير


لازم تعرف يا صديقي ان المحرك يلزمه ثلاث أشياء فقط ليدور (هواء +بنزين +كهرباء = المحرك يدور) بعد كده ممكن تفكر في الحساسات و البوابة و الحركات دي كلها و اللي تأثيرها لا يمتد سوي الي ان المحرك داير ولكن مش مضبوط او سحبه ضعيف او ......................... أسباب كثير تخلينا نشك ان هناك حساس فيه مشكلة ولكن قبل كل ذلك لازم المحرك يدور أولا طالما وجدت الأسباب الثلاثة السابقة

دور جيدا في سكة هذه الأشياء و اللي اهمها البنزبن و الكهرباء لأن حتي لو البوابة مفتحتش المحرك هيدور من غير ما تفتح و ده عن تجربة مني شخصيا لأنها فيها نسبة تنفيس خفيف مش مغلقة تماما يعني الهواء كده كده موجود وحتي لو مفتحتش افتحها برجلك (دوس علي دواسة البنزين وانت بتدور)
عايزك تتعب معاها شوية مرة واحده و انت هتحل مشكلتك بنفسك دون الرجوع لأحد
واي سؤال تليفوني معاك ولو حصل اي مشكلة اي وقت و اتصلت بي انا معاك ولو أعرف أجيلك هجيلك ان شاء الله و الله الموفق و المستعان

ربنا يخليك يا باشمهندس
انت تنورنا في اي وقت طبعا
انا إن شاء الله هجرب كدة كل الأحتمالات السابقة بس مش النهاردة الصراحة لأني هقوم دلوقتي البس وانزل اروح الشغل
وهقولكم علي النتيجة اول لما اوصل لشئ

والله المستعان
،
،