الموضوع: حكايتي المفصلة مع السيات ابيزا

تبدأ المرحلة التانية من حكايتي يوم 4 - 8 - 2011
يعني رابع يوم رمضان

راجع من الشغل قبل الفطار بربع ساعة

طالع الدائري وباخد ملف جامد جدا بصراحة ومش عارف ازاي انا خدته علي سرعتي

النتيحة -

حادثة مروعة علي الكوبري الدائري نتج عنها
1- كسر سور الكوبري
2- العربية اتفشكلت

بعد الحادثة بدقيقة واحدة
كانت الناس الجدعان نزلت من عربياتها والميكروباصات وشالوا العربية هيلة بيلة وركنوها علي جمب

بعد الحادثة بدقيقتين اتصلت علي اخويا

بعد الحادثة ب3 دقائق اتصلت بالونش واديتله العنوان

بعد الحادثة ب10 دقايق لقيت عربية شرطة نص نقل نازل منها مندوب ومعاه دفتر ولاسلكي
اخد مني الرخص (الرخصة الجديدة والقيادة)

بعد الحادثة ب20 دقيقة اخويا وصل

بعد الحادثة ب30 دقيقة الونش وصل

كان معايا واحد صاحبي (الحمد لله بخير) اتصل بحماه عشان ساكن جمب موقع الحادث

حمي زميلي وصل ومعاه اتنين كمان جيرانه

المهم

بعد الحادثة ب45 دقيقة كنت في القسم

بعد الحادثة ب2 ساعة كان معمولي محضر والعربية محجوزة

تاني يوم كنت في النيابة (يوم الجمعة الصبح لأن في رمضان مفيش نيابة مسائية)
ومش هقولكم بليل كنت فين ؟؟؟؟؟

يوم الأحد استلمت العربية وكان يوم 7 - 8 - 2011

والمفاجأة الكبيرة
اخويا ضاع منه نص المفتاح ؟؟
اصل المفتاح عندي علي حتتين حتة فيها الريموت وحتة فيها السلاح بالفحمة

رجعت بالعربية علي السمكري
والهدف
السمكري دة هو نفسه بتاع قطع الغيار الأستيراد الي بشتري منه
فكان تفكيري ان من دقنه وفتله او من قرنه وادهنله
او بمعني اصح انه لما يحتاج حاجة هيجيب من عنده والموضوع يبقي سهل ويعملي تخفيض والكلام دة علي اساس اني زبونه

التقييم والفحص المبدئي اسفر عن هذه المقايسة
1- طبعا اكصدام امامي وخلفي (ايوة الخلفي ) واربع فوانيس وشبكة
2- الكبوت بالصدر
3- طقم التبريد
4- القنطرة الأمامية
5- القنطرة الخلفية
6- علبة الدريكسيون (الأسكاترا)
7- المقصات
8- الكرتيرات
9- الفتيس
10- الرفارف
11- الجنوط (والطاسات الجديدة)

كام ياعم ؟؟؟
قالي 4800 من غير سمكرة

المهم

طبعا مش معايا المبلغ دة كله

وفي لحظتها اتصل بيا المهندس ايهاب منصور الله يكرمه دنيا واخرة ويباركله في عياله
وكان مكالمته ليا كالتالي
مش عايز اي حاجة يا باشمهندس محمد
انا اخوك ومفيش اي فرق بينا
لو احتاجت اي حاجة كلمني انا تحت امرك في اي حاجة
انصحك تجيب نص علي بعضه وتفضيه عندك (وياريتني اخدت بنصيحته)
ولو هتجيب نص هات نص بموتور 1400 سي سي وهبقي اقولك علي مواصفات تجيبها

المهم

اتفقت مع السمكري اني هقطره في الفلوس كل ماتجيلي فلوس
وكان رده
خلي عنك خالص يا باشمهندس احنا اخوات والمهم انك طلعت منها سليم ووواقف علي رجلك ومفيش فرق بينا احنا جيران قبل اي حاجة

بعدها بأسبوع اديتله 450 ج

كل دة العربية مرمية ماتعملش فيها حاجة بمليم والتراب غطاها

بعدها باسبوعين اديتله 550 جنيه عشان اقفله ال1000 ج

وقبل العيد بيومين لقيته فكك كل حاجة في العربية
فك الكبوت والصدر والرفارف
ورجع رماها

بعد العيد باسبوع اديتله 1000 ج
وبعدها بيومين لقيته حل العفشة بالكامل

وبعدها حل الموتور

بعدها باسبوع اديتله 500 ج

شد زراجين

بعدها باسبوع لقيته جاب حاجتها
شبكة tdi زيتي
2 رفرف زيتي
كبوت بالبطانة بتاعته زيتي
الصدر بالفوانيس (جداد نوفي)
اكصدامين امامي وخلفي بالشبورة زيتي
طقم التبريد الكبير ابو مروحتين علي سير

يعني من الأخر جابلي حاجتها نفس اللون ومش هحتاج ارش العربية اساسا

والله كتر الف خيره

وراح خابطني في وشي وقالي لازم تجيب 2000 جنيه حق الحاجة

قولتله منين يا حاج ؟؟؟؟؟
هو طبعا ولا حاج ولا حاجة واساسا قدي في السن

قولتله اديني اسبوع ولا اتنين وادبرلك المبلغ
لقيته بلم وقالي ماشي ... ماشي

روحت البيت وانا طاير من السعادة

المهم

بعدها باسبوع اديتله 1000 جنيه
فين حاجتي ياعم مش هتركبها ؟؟؟؟؟؟

قالي اصبر بس عليا

بعدها بأسبوع

فين حاجتي ياعم مش هتركبها

اصبر بس

ياعم العربية اتسمكرت واساسا مافيهاش سمكرة هو انت شديت زرجينتين وانتهينا فين حاجتي ياعم الحاج ؟؟؟؟؟؟؟؟؟؟؟

شهر فضل يزل فيا

وفي النهاية لقيت التالي

رفرف يمين لونه سماوي
رفرف شمال 94 (مخروم عشان الأيريال)
اكصدام خلفي زيتي (معفن)
صدر 94
الكبوت الزيتي

ببص علي الحاجة
ايه دة ؟؟؟؟؟
مفيش من حاجتي غير الكبوت

طب فين حاجتي ؟؟؟؟

لا انا بس بظبط علي الحاجات دي

طيب ياعم الحاج

وراح باعت العربية للعفشجي
ركب القنطرتين والأسكاترا والدشم والمساعدين والمقصات وكسر القطمة //

الأستاذ المبجل العفشجي كسر الكونتاكت والقطمة عشان يعرف يشتغل ويزق العربية يمين وشمال

وبعد العفشجي
بعت العربية للميكانيكي عشان يسقط الموتور

كان لحد دلوقتي فات حوالي شهرين ونص علي الحادث
ذل والله العظيم
ذل

الميكانيكي سقط الموتور وركب الفتيس الجديد وبعت العربية للكهربائي عشان يقفل الشغل ويدور العربية

طبعا الكهربائي فكلي الكنترول الي تحت الدريكسيون عند علبة الفيوزات وروحت عشان اعمله شفرة جديدة علي المفتاح الجديد بتاع القطمة الجديدة

روحت عملت المفتاح والشفرة ورجعت للكهربائي
تاني يوم دور العربية

لقيت الشكمان بينفس
رجعت علي الميكانيكي قالي روح لبتاع شكمانات

روحت ظبطت الجنوط عند حد بتاع جنوط في الملك الصالح
ركبت الجنوط

روحت لبتاع شكمانات
وكان يوم الوقفة بتااعة العيد الكبير

المهم

ظبط الجوانات بتاعة الشكمان وركبلي جوانات بتاعة تويوتا مدورة (الجوانات بتاعتي مثلثة صاج)

جيت انزل العربية من علي المطلع الحديد الي عنده لقيتها مش بترجع بظهرها وبتجيب اولاني

روحت لميكانيكي تاني ظبطلي العصاية وخلاها بترجع بظهرها بس مش بتجيب خامس

المهم

بعد العيد الكبير بكام يوم

رجعتها للسمكري
غيرلي الرفرف اليمين بواحد ازرق فاقع جدا بس 98 وسدلي الخرم بتاع الأيريال في الرفرف الشمال
وكسرلي خزنة الباور

ولما رجعت للميكانيكي قالي التكييف بايظ ومحتاجة كباس وسربنتينة

نسيت اقولكم اني قطعت معاه الحساب وصلحت الردياتير القديم ولغيت السربنتينة بتاعة التكييف عشان اوفر في التكاليف

المهم

لحمت خزنة الباور

وشغلت الباور بس تقييل اوي

المهم

العربية لحد دلوقتي ماشية بس فيها باور وتكييف بايظين
وناقصها الوش بالكامل والأكصدامين

بعدها بحوالي اسبوع او اتنين

اديتله 1600 جنيه وجابلي الوش بالكامل
صدر 98 وفوانيس واكصدام امامي من غير فوجات واكصدام خلفي

وبعدها غيرت طرمبة االباور

بعدها بيومين لقيت الزيت بتاع الباور فضي

روحت اظبط زوايا لقيت علبة الدريكسيون بتجيب زيت من ناحية كاوتشة المزيكا

روحت لعفشجي بيفهم

قالي الاسكاترا مش متقفلة كويس واللاكور بتاعها مش مربوط ولما انا غيرت الطرمبة فعزمها اشد فعشان كدة جابت زيت

ربطها وغيرلي الجلب بتاعة المقصات

المهم

ظبط الباور

وروحت اظبط الفتيس

روحت لواحد في التوكيل قالي هبعتك لواحد بتاع فتيسات

غيرلي الفيبر وظبط العصاية

لقيت الموتور متلت

بعد الكشف لقيت الموتور رايح في داهية وعايز يتغير بالكامل

وعشان كدة قولتلكم ياريتني سمعت كلام المهندس ايهاب
لأني صرفت تقريبا تمن الننص وتقريبا غيرت كل حاجة في النص من عفشة لموتور لفتيس لرفارف وكبوت وفوانيس وشبكة واكصدام

والكلام دة لحد النهاردة ولسة العربية عند الميكانيكي بتغير موتور

والأختيار وقع علي موتور 1400 بولو موتور حديد مش الومنيوم انجيكشن

النهاية
ناقصلي لسة توربيدو (لأن السمكري ضيعه)
ناقصلي كرتيرات التراب

العفشة مش مظبوطة وحاسس كأنها هتتفكك وانا بلف وكاسر العجل مش عارف دة فتيس ولا كوبلن داخلي ولا الشاسيه فاتح

والله المستعان
،
،