السلام عليكم .
مبدئيا الموضوع ينفع مع أي عربية 1600 أو أكبر في الحجم و لكن علشان التجارب كلها تمت 100 % على الجين 2 أغلب الوقت فأنا عملت الموضوع هنا و كمان علشان الناس تستفيد منه و يارب يكون مفيد .
مبدئيا لازم تعرف شوية حاجات مهمة و عوامل بتأثر على أستهلاك البنزين في أي عربية

وزن السيارة .
ضغط الكاوتش .
نوعية البنزين.
طريقة القيادة .
سرعات المحرك .
سرعة السيارة.

أحنا هانفترض أن السيارة في حالة ممتازة (معندكش مشكلة في الكهرباء و لا المحرك نفسه )

وزن السيارة كل لما يخف كل لما الحمل يقل على المحرك و بالتالي أستهلاك أقل .
ضغط الكاوتش مهم جدا لأنه بيأثر على تلامس الكاوتش مع الأرض و بالتالي تقليل الأحتكاك عند الدرجة المثالية.
نوعية البنزين (لازم يكون بنزين مش مغشوش و كمان يكون متوافق مع البنزين الموصى به في كتالوج السيارة )
طريقة القيادة هامة جدا و بتتوقف عليها العاملين التاليين اللي هما سرعة المحرك و سرعة السيارة النهائية .

طيب أختصارا للكلام الكتير تعالوا نتكلم بأرقام .
وزن السيارة هو 1200 كجم بالاضافة لوزن السائق اللي هانقول متوسطه هو 1280 كجم .و لو ضفنا أي ركاب أو أحمال الوزن هايزيد طبعا . ( و ده مش مشكلة هي العربية متصممة لكدا و لكن كل لما الوزن يزيد الأستهلاك بيزيد معاه ) معلومة للتذكرة فقط .

ضغط الكاوتش في الجين 2 لازم ما يقلش عن 30 و يا حبذا بقى لو نيتروجين علشان ضغطه ثابت و أنا أنصح أنك ترفع الضغط ل 32 لو حاطط نيتروجين ( عامل مهم قوي قوي في الأستهلاك هو ضغط الكاوتش )

نيجي بقى لعامل مهم قوي قوي قوي مع العوامل الثانية لتخفيض الأستهلاك .
طريقة سواقتك
غير على 3000 لفة في الدقيقة كأقصى تقدير و لو على 2500 يبقى 100 % بس لما تكون محمل العربية أو طالع مطلع غير على 3000 لفة - دقيقة
لما تكون عارف أنك داخل على مطب ....... بتدوس بنزين ليه ؟ (أنت كدا بتستهلك بنزين ملوش لزمة - و بتستهلك الفرامل كمان و بتستهلك الطنابير - طيب ليه و أنت كدا كدا هاتقف - خليك حكيم و ملكش دعوة بالناس اللي بتزنق على بعض و اللي بتجري زي المجانين و خلاص )

عايز أستهلاك مثالي متخليش سرعتك تعلى عن 90 كم - س أو 100 كم - س عند السفر
و على الطرق الدائرية 80 بيكون ممتاز في الأستهلاك .

كل العوامل دي ممكن تخليك تعمل أرقام خيالية محدش هايصدقها .
ممكن و بكل سهولة تعمل 7 أو 6.5 لتر لكل 100 كم
يعني من الآخر 20 لتر (صفيحة تخليك تعمل فوق 270 كم كمتوسط )

و الأرقام دي تنطبق على المانوال و الأتوماتيك على حد سواء .