من 3 شهور عملت تعديلات في عربيتي من سمكره وعفشه وتسقيط ماتور لانشيا 1600
انا مش مع تسقيط ماتور اعلى من كده لان هيظهر مشاكل كتيره والعربيه مش هتبقى ماسكه نفسها فتره طويله , انا هتكلم عن بعض المشاكل اللي واجهتني :
مشكله فتح الشاسيه , قمت بمعالجه الشاسيه باضافه شاسيه على الشاسيه القديم (دوبل شاسيه ) , وقمت بعمل تقويات حوالين الحوض , وايضا قمت بعمل قاعده للماتور اضافيه من ناحيه الفتيس ودي بتبقى مش موجوده في ال 128 اصلا .وتشغيل الشداد العلوي وده مهم . كمان قمت بعمل شداد داخل الكرتيره وشدادين سفلي موازيين للقنطره وشداد علوي بين البطاحتين الاماميين لان البطاحتين بيحصل ليهم شروخ فيجب وضع مع الشداد حلقه او رينج داخل ماسكين مع مسامير المساعد والخلفي كذلك.
مشكله الفرامل , تغيير جمبين كاملين اماميين بريجاتا مع الفرامل وده هيساعد على تقويه اداء الفرامل , لان فرامل الريجاتا اكبر من ال 128 مع العلم ان الفرامل مش هتبقى قويه بردو كما قبل عمليه تسقيط الماتور , لان الماتور عزمه زاد فيجب تغيير الفرامل كما ذكرت , وتشغيل الفرامل الخلفيه لو كانت معطله عشان نحصل على افضل اداء للفرامل, والحمدلله الاداء عندي كويس ومرضي لهذه النقطه.
مشكله السخونيه , انا لاحظت ان السخونيه للماتور بتزيد وده بسبب حجم الرادتير الصغير وكمان الشكمان القديم بيكتم الماتور , فقمت بتغيير ماسوره الشكمان الى حجم اكبر تقريبا بوصه ونصف , وتغيير علبه الشكمان (المصفى) , حسيت بفرق في السخونيه ويجب ايضا صيانه الرادتير جيدا واستخدام المياه الخضراء.واستخدام نوع زيت محرك نضيف مثل ليكوي مولي :)
مشكله الكبوت !! , قصدي غطاء الكبوت مش بيقفل بسبب ارتفاع الماتور وتحديدا عمه الكربراتير كبيره , وحل المشكله انك ممكن تستخدم عمه اصغر زي عمه ال 128 ولكن انا فضلت عمل تعديل على الكبوت فقمت بفتح فتحه في منتصف الكبوت وعملت فتحه تهويه اعطت شكل جميل للعربيه .
أنا كنت بفكر اسقط ماتور عالي عن كده لكن بعد التجربه لقيت الحمدلله كان اختياري صح لان لو الماتور اعلى من كده كان هتفضل مشاكل اللي ذكرتها بالاعلى مستمره ولا حل لها او هتستمر في الصرف والذهاب للصنايعيه وكل يوم تظهر مشكله .. الخ
المفضلات