استطلاع رأي لخبراء النوبيرا

**star1991** · 28-01-2012 10:01 PM

المشاركة الأصلية كتبت بواسطة azahra

انا عرفت مجدي ده و فعلا كذا واحد شكر فيه و هو في شارع احمد سعيد امام سنترال العباسية. روح له و احكيلنا تجربتك معاه و ان شاء الله تكون خير و الفتيس يرجع جديد و يعيش.

ان شاء الله اروح له الاسبوع ده
اشوف يوم يناسب وقت فراغي واروح له علشان خلاص المارشيدين مضايقني جدا اكتر من الرابع
وادعولي
وهاحكيلكم لما اخلص

**ahmed.zahra** · 29-01-2012 04:34 PM

ربنا معاك إن شاء الله، انا كمان نفسي آخد الخطوة دي بس ربنا ييسر الحال في الأموال إن شاء الله و لن أتردد. في انتظار حكايتك عن التجربة بالخير ان شاء الله

**star1991** · 30-01-2012 06:12 PM

المشاركة الأصلية كتبت بواسطة mwsh2008

عن تجربه يا زملاء النوبيرا انا صلحت الفتيس عن واحد متخصص و الحمد الله زى الفل الاستراد زى البطيخه المحل اسمه مجدى رجب فى شارع احمد سعيد الناس هناك بتفهم كويس جدا بياخد 2 يوم تصليح و شغال يوم الأحد عشان اجازته الجمعة

ياريت لو سمحت تقولنا حضرتك صرفت كام او اتكلف تصليحه اد ايه
وياريت كمان تقولنا الكلام ده من مده اد ايه

**star1991** · 31-01-2012 08:26 PM

بسم الله
وديت العربيه لمجدي يوم الاثنين
قاللي طقم اصلاح كامل
وسلك كيك داون جديد
و8لتر زيت
قلتله ماشي اشتغل
التكلفه
1200 طقم اصلاح
200 خراطه
100 واير كيك داون
400 مصنعيه
240 زيت
واستلمت العربيه يوم التلاثاء على الساعه 12 الضهر كده
وكله تمام
بس قالي الزيت اللي فيها امشي بيه 1000 كيلو وغيره
وبعد كده غير على 7000 كيلو

فانا عاوز اعرف رايكم في الكلام اللي قاله بخصوص غيار الزيت
وعاوز برده اعرف من اللي صلح الفتيس قبل كده التكلفه دي كويسه ولا عاليه

**MMamdouh** · 31-01-2012 09:48 PM

هو الفتيس الاستيراد بكام؟

MMamdouh

**star1991** · 01-02-2012 11:19 AM

المشاركة الأصلية كتبت بواسطة 3ateef

ب 1200 محلول و 1600 لو هيتحل من المكنة قدام الزبون
والمصنعية 250 جنية...
وزيت تنضيف 100
وزيت فتيس 180 موبيل وان

يعني تقريبا نفس تكلفه التصليح لو فتيس محلول من على مكنه

**ahmed.zahra** · 01-02-2012 11:38 AM

الفيصل الأن هو حالة الفتيس بعد الإصلاح. و ليس التكلفة. الفلوس خلاص اتدفعت المهم تكون راحت في المكان الصح. ربنا يوفقك

**star1991** · 02-02-2012 02:44 PM

المشاركة الأصلية كتبت بواسطة azahra

الفيصل الأن هو حالة الفتيس بعد الإصلاح. و ليس التكلفة. الفلوس خلاص اتدفعت المهم تكون راحت في المكان الصح. ربنا يوفقك

الحمد لله حاسس بفرق في السياره من ناحيه السحب وصوتها اللي هدي خالص كان فيها نحره موجوده من الطلعه حتى سرعه 50 ك وراحت تماما الحمد لله

**aazmy** · 04-02-2012 02:51 PM

انا حكي لكم تجربتي التي لم تكتمل بعد.......
انا بعد ما بعت اللانوس المانيوال عشان اجيب اتوماتيك ....جبت و الحمد لله نوبيرا 2001 اتو
الفتيس مشكلتة ان احيانا مش دائما لما تنقل علي الدي العربية كانها ممورة اروح جايب الأول تمشي عادي و بعدين اجيب الدي تكمل عادي ...انا جبتها من شهر 10 -2011 و عملتها معاي تقريبا 5 مرات بس...
المهم واحد زميلي قالي تعالي نروح لواحد في احمد سعيد يكشف عليها .. قولتلة ماشي.

روحنا للراجل انا مش فاكر اسمو بس الكارت بتاعو معايا في العربية بص علي زيت الفتيس و شمو وبعدين قالي دور العربية و بص تاني علي زيت الفتيس و بعدين بصلي بنظرة خبير اجنبي و قالي يا بية العربية دي فيها اسطوانات محروقة ......... قولتلة يعني ...... قالي يعني عايزة طقم اصلاح ب 1200 و مصنعيتي 400 و خراطة 180 و زيت فتيس 180 و 3 ايام شغل.

قولتلو ما انا اجيب استيراد احسن ؟
قالي انت حر انا بديلك ضمان 5000 كيلو والستيراد بيديلك اسبوع.

انا بيني و بينكم الموضوع مش مضايقني قوي لانو محصلش كتر وغير التعليقة دي مفيش مشاكل فقولت اظبط الحاجات التانية لان العربية غالبا محتاجة رشاشات عشان بتغيب في الدوارة

فقولت اخليني مع الفتيس لما يجيب اخرة و بعدين اغيرو بواحد استيراد غالبا