الموضوع: اسألكم الدعاء, ابني يحيى في الرعاية المركزة وتنبيه

ابني يحيى عمره 40 يوم


مرة واحدة اخته الكبيرة جنا سنتين ونص جالها برد عادي

البرد مرة واحدة اتنقل له

في اقل من 24 ساعة قلب لالتهاب في الشعيبات الهوائية Bronchiolitis

وظهر في الاشعة على هيئة صورة مشابهة للالتهاب الرئوي


جاله صعوبة في التنفس ومش عارف يرضع عشان مناخيره مسدودة ونفسه مش قادر ياخده


قعدت الف انا الدكتور على حضانات البلد كلها


النيل بدراوي قافلين الباب عشان الساقعة

السلام الدولي مفيش ولا سرير

النخيل بالمعادي مفيش ولا سرير ولا حضانة

مستشفى Kids بالمهندسين مفيش

مستشفى عبد القادر فهمي مفيش

لاحظوا اني بتكلم على مستشفيات اليوم الواحد في الحضانة على اكسجين مش اقل من 500- 600 جنيه

وانا بلف تذكرت لو كان واحد غلبان ومش معاه فلوس الحضانة اصلا يعمل ايه
دا بيدور على ابو بلاش في بلد الحضانة ام 1000 جنيه في اليوم مش موجودة
!!!!!!!!!!!!!!!!!!!!!!!!!!

ربنا يكون في عون الناس بجد

قعدت الف على مستشفيات مصر وابني في العربية معايا في عز السقعة من 10 مساء الى 6 صباحا

آخر حاجه بالصدفة كلمت مستشفى الجنزوري وطلبت مكان, رد عليا دكتور وقالي تقدر تتفضل بيه

وبالصدفة ايضا بسأله في التليفون على اسمه طلع صاحبي ممن زمان !!

هو دخل من 3 ايام واخذ اكسجين

بكلم زمايلي الاطفال لقيت ان معظم البلد عندها دور ماشي دلوقتي

غالبا فيروس

كل الناس عندها برد وبيعدي عادي


المشكلة في الرضع والاطفال عشان الشعب الهوائية عندهم ضيقة جدا

فبالتالي اي نقطة بلغم بتسدها وتعمل لهم صعوبة في التنفس

[sor2]http://img16.imageshack.us/img16/9973/yahia.jpg[/sor2]

نصيحة لكل اخواتنا في المنتدى:

فيه زيادة محسوسة طبيا وليس احصائيا في عدد حالات عدوى الجهاز التنفسي
معظم الناس بيجيلهم
الكبار بيعدى عليهم بمنتهى السهولة وكذلك الاطفال فوق السنة

المشكلة في الرضع وتحت سن السنة :


1. مفيش خروج من البيت بعد 6 مساء لا زيارات ولا فسح
2. مفيش لعب على السلالم ولا الجيران
3. مفيش الدفايات اللي شغالة في الايام دي وسبب كل البلاوي اللي قابلتها
4. اخذ تطعيمات الالتهاب الرئوي والانفلوانزا من المصل واللقاح هما غاليين شوية بحوالي 400 جنيه بس انا دافع اضعاف اضعاف المبلغ ده لحاد دلوقتي


وإن شاء الله كل أولادنا و اطفال مصر حيبقوا بخير وسلامة

لا حول ولا قوة الا بالله العليٍٍٍ العظيم
ربنا يطمنك عليه ويشفيه ويعافيه في القريب العاجل
الاطفال حديثي الولادة دول لما بيمرضو بيقطعو قلب اللي حولهم
ان شاء الله يبقى كويس ويخف سريعا
...
...
بالنسبة لموضوع الحضانات علشان اذا حد سأل او اذا كان حد قدامكم في حاجة لحضانة بالشكل ده ... انا ساكن امام المستشفى الايطالي بالعباسية والحضانات متوفرة لديهم سواء حضانات ضوئية او حضانات اوكسوجين .... وقسم الاطفال عندهم محترم جدا
...
...
ربنا يطمنك عليه يا د. احمد ويتم شفاه في القريب العاجل