الموضوع: يا ريت مشاكة كل ملاك جين 2

المشاركة الأصلية كتبت بواسطة emadmohiy

شكرا على زوقك، المنتدى منور بالناس اللى المحترمة اللى فيه،
أما المشاكل اللى بسمع عنها على سبيل المثال رأى أحد الأشخاص و اللى هو كاتبه فى موقع شهير جدا للسيارات المستعملة و الجديدة (و مش عايز أذكر إسم الموقع إحترام لموقع نايل موتوزر)
و ده كان فى صفحة جين 2 منوال و كاتب الآتى :
عن تجربة

السيارة ممتازة فى
1- بتجرى كويس أوى
2- ثابتة جدا جدا
3- قوية و فيها اوبشن مش موجود فى أى عربية تانية بنفس السعر
العيوب:::::::
1- التوكيل سيئ جدا جدا جدا -- لأ هو سيء بس.
2-تم تغير الأشياء التالبة فى خلال سنة مع ظان السيارة موديل 2011
ثرموستات الحرارة بعد أسبوعيين من شرائها -- بتحصل ساعات بس مش قاعدة, أنا غيرته أول أسبوع ومغيرتوش تاني.
علبة الدركسيون -- ليها تعديل بيتعمل.
التكييف تم شحنه بعد 3 شهور -- التكييف زي الفل الحمد لله من ساعة ما جبت العربية.
السنتر تم تصليحة بعد شهريين -- ساعات بيعلق فعلا وبيتحل بسهولة برده.
كلوك أسبرنج تم تغيره بعد ستة أشهر من شراء السيارة -- أنا غيرته برده بدون داعي اعتقادا مني إنه كان بايظ, لكن الطبيعي إنه مابيبوظش, غير إن بروتون كانت عاملة recall للموديلات القديمة لتغير الكلوك سبرينج احتياطي.
بلية الشداد بعد تسعة أشهر -- غيرتها مرة فعلا بس ده لأني كنت غسلت الموتور وده سبب إنها تبوظ.
طبعا بخلاف تيل الفرامل بعد 15000ك هههههههه -- ده يتوقف على الاستعمال, أنا لسة هاغيره أول مرة بعد 37 ألف.
ااكنبة بتزياء من أول يوم -- حلها بسيط قوي في التوكيل.

لأ بس العربية جامدة بس عمو عز العرب يهتم بيها شوية لأن بجد العربية كويسة و تستاهل الأهتمام
و أخيرا تم بيع السيارة نظرا لأنى تعبيت من كتر ما بروح التوكيل اصلحها

إيه مدى صحة الكلام ده، الله أعلم.

أنا رديت على النقط اللي فوق بمنتهى الصراحة, اللي شايف إن العربية كده كارثة بانصحوا من دلوقتي ميجبش بروتون خالص.

أنا في رأيي العربية زي الفل, يعيبها فقط التقفيل والخامات.

المشاركة الأصلية كتبت بواسطة shaddadfalcon1

يعني الحاجات دي بسيطه وبتتحل في التوكيل ولا ايه النظام؟

دي اكتر حاجات دلوقتي خنقاني في المستعمل انا عايز اجيب جديد عشان ميبقاش فيها غير غيار الزيت ومفضلش كل شويه اروح علي التوكيل عشان احل مشكله

امال جديد ازاي يعني

مممم, مش عارف أقول لحضرتك ايه بصراحة.

ممكن تجيب جين و مايقبلكش أي مشكلة, وممكن تجيب واحدة يقابلك فيها كذا عيب...وارد.

أنا بالنسبالي عربيتي رحت بيها التوكيل 3 مرات قبل صيانة ال 1000 بس بسبب موضوع الترموستات وإن الإشارات كانت فصلت. بس رغم كده أنا مستمتع بالعربية جدا وشايف إنها مفيهاش عيوب جامدة تمنع حد إنه يشتريها.

وانا دايما أقول إن الجين 2 مش عربية أي حد, لازم تبقى شاريها عن اقتناع من جواك, يا إما من أول عيب بسيط هتقول أنا ايه اللي خلاني أجيب العربية ديه ما كنت جبت كوري و ريحت دماغي.

نصيحتي ليك اعمل test drive في التوكيل, ده هيفرق جامد فإختيارك.

المشاركة الأصلية كتبت بواسطة shaddadfalcon1

انا زميلتي في الشغل معاها العربيه من السنه اللي فاتت وتقريبا عامله حوالي 26 الف وبتقولي مفيش مشاكل خالص والمفروض اني هجربها بكره او اي يوم خلال الأسبوع

انا مقتنع بشكلها وبالكلام الحلو اللي عليها بس برده مقلق من حكاية التقفيل دي

اهم حاجه المشاكل دي لما بتحصل بتوقف العربيه ولا ممكن تمشي عادي بس تتعمل في اي وقت في التوكيل؟

لا يا فندم مفيش عطل بيوقف العربية, وإن شاء الله ميبقاش فيه اعطال خالص.

يعني مثلا بلية الشداد ديه بتخلي الموتور يصفر صفارة خفيفة على بداية كل نقلة, مش مؤثر عالأداء بس صوت رخم لو حضرتك من النوع اللي بيركز في الأصوات زيي.

لو حضرتك حابب تقابلني اديك فكرة عن الأصوات اللي ممكن تسمعها من العربية ما عنديش مانع, ويا عالم ممكن تلاقي الواقع عكس ماكنت متخيل تماما. :)

تجربتي مع عربيتين جين 2

مفيش مشاكل قابلتني في العربيتين - و العربيتين كانوا ممتازين (ده اللي أقدر أقوله بأختصار ) لأن الأخوة ما شاء الله أضافوا الكثير.
الجين 2 عربية مزاج ...... اللي بيشتريها يكون غاويها .