صنايعية أوبل في 6 أكتوبر

**ahesmat** · 03-02-2012 06:17 PM

سلام عليكم يا رجالة......سعيد جداً بإنضمامي ليكم والله.
أنا زميلكم أحمد عصمت اسكندراني و عايش في 6 أكتوبر و معايا كورسا 2004
مشكلتي انني ما أعرفش خالص صنايعية محترمين ف 6 أكتوبر و ده موضوع بيؤرقني جداً و خصوصاً إنني بأخاف علي عربيتي من الهوا الطاير و ما أحبش أي حد يمد إيده فيها....... فلو حد منكم يعرف حد كويس في أكتوبر ( ميكانيكا-كهرباء-سمكرة-الخ الخ ) يا ريت يدلني و يا سلام لو أرقام تليفونات.

شكراً جزيلاً و سلامي و تحياتي لأجدع رجالة.

**tananybasha** · 03-02-2012 11:03 PM

منورنا و ربنا يباركلك فيها
اكتوبر معرفشى فيها غير التوكيل على الصحراوى
قليل قوى اللى بيفهم فى اكتوبر فى الأوبل او بالأصح تقدر تعتمد عليه

**tananybasha** · 04-02-2012 12:21 AM

والله و انا فى زايد هاسأل السواقين بتوع الشركه بيتعاملوا مع مين فى اكتوبر و زايد
و ان شاء الله اقدر افيدك فى حد كويس طوارئ
و يا عم لو فيه حاجة كلمنى و انا اجيبهملك متكتفين عندنا من الجيزه

**tananybasha** · 04-02-2012 12:29 AM

انا عارف
بس احنا بنتكلم على طوارئ

**SYD** · 04-02-2012 01:51 AM

اولا اهلا بحضرتك لأنضمامك في فريق اوبل نايل موتورز

بس هو حضرتك ليه متوقع انها هتعطل تحت البيت او في اكتوبر ؟؟؟؟؟ الف بعد الشر يعني وربنا يباركلك فيها

بس انا رأيي حضرتك ترابط هنا في القسم كام يوم وتقرا كتير من المواضيع الجديدة والسابقة
2- حاول تتعلم الأعطال الشائعة بيكون علاجها ايه
3- اشتري اهم القطع من طقم العدة زي مثلا مفتاح 10 وبيبة 10 ومفتاح 13 وبيبة 13 زردية مفك صليبة (فرنساوي وانجليزي) مفك عادة مفتاح فرنساوي اسبراي تنظيف مفتاح بوجيهات وتخليهم في شنطة عربيتك (كارفور عنده علبة بلاستيك شيك جدا تنفع تحط فيها عدة العربية بنظام)
4- حاول تتعلم ازاي تعمل الصيانات بنفسك (طبعا الصيانات الخفيفة مش العمرة يعني)
5- اوعي تسيب ودنك لصنايعي وخصوصا انشاء الله لما تاخد الخبرة من هنا هيبقي مش بيعجبك كلام الصنايعية وهتحس انهم فتايين وكل مهارتهم هو تقليل محاولات التجربة والخطأ (نسيت اقولك اني صاحب مبدأ ان الصنايعية كلهم شغالين بنظام Try & Error)

انا بقولك كدة لأني بصراحة اتعلمت كتير اوي هنا في القسم وعرفت منهم حاجات ومعلومات خطيرة جدا ويكفي انهم بيقوو قلبك انك تفك وتركب وتصلح بنفسك

أقولك المفيد
دور علي مواضيع طناني وفادي ومجدي الشيخ واقراهم (احسن من كتيب الصيانة بتاع اوبل)

وفي النهاية
ربنا يستر طريقك وطريقنا جميعا

والله المستعان
،
،