النجاح العظيم لفصل انتاج الخبز عن الأنتاج، ..... الله يخرب بيت ال........

**Hossam_Hassan** · 30-05-2008 11:45 AM

فوجئت من كام يوم ان السادة المسئولين عن مشروع فصل انتاج الخبز عن الأنتاج قاموا بوضع كشك شيك قوى من اكشاك بيع العيش المدعم ابو 5 قروش فى الشارع اللى ورانا و ابتدوا يبيعوا، جميل؟ لا مش جميل ابدا.

انا ساكن فى المقطم و المنطقة اللى ساكن فيها مستواها الأجتماعى و المادى يعتبر جيد جدا، يعنى قليل لما تلاقى شقة فيها عربية واحد و عادى جدا انك تلاقى قدام كل عمارة او فيلا عربيتين تلاتة مرسيدس او بى ام، و على سبيل المثال، العمارة اللى انا فيها ساكن فيها 2 أصحاب شركات سياحة و 2 سفراء سابقين، المهم بقى، كشك العيش بينش، ليه، لأن الناس اللى فى المنطقة بيشتروا العيش الأحسن و الأغلى علشان قادرين و فى نفس الوقت العيش مش مكون اساسى فى وجباتهم، طب ليه يحطوا الكشك هنا؟ و العيش اللى ما بيتباعش ده بيروح فين؟

**elpasha009** · 30-05-2008 12:08 PM

طيب متقولينا هو فين ده علشان نيجي نشتري العيش:)
أنا كمان زيك كنت مستغرب من الموضوع ده وليه بيعمله الأكشاك في المنطقة الراقية لقيت إن جزء من الإجابة يكمن في إن فيه بوابين مثلا في العمارات والفيلل الكتير ده.ده غير إن أكيد هتلاقي ناس بتيجي من حتت قريبة علشان تشتري من الكشك الفاضي.

**Hossam_Hassan** · 30-05-2008 12:13 PM

المشاركة الأصلية كتبت بواسطة elpasha009

طيب متقولينا هو فين ده علشان نيجي نشتري العيش:)
أنا كمان زيك كنت مستغرب من الموضوع ده وليه بيعمله الأكشاك في المنطقة الراقية لقيت إن جزء من الإجابة يكمن في إن فيه بوابين مثلا في العمارات والفيلل الكتير ده.ده غير إن أكيد هتلاقي ناس بتيجي من حتت قريبة علشان تشتري من الكشك الفاضي.

انا كمان فكرت زيك بس لو هو ده هدفهم كانوا حطوه على الشارع الرئيسى على الأقل، لأن موقعه دلوقت بعيد عن الشارع الرئيسى حوالى 300 متر و بيطل على ارض فضاء مساحتها كبيرة جدا، يعنى تقدر تقول خلاء، و الأهم فى الموضوع ان كمية العيش اللى باشوفها كتيرة جدا و أكتر من احتياجات كل أسر حراس العمارات اللى فى المنطقة و مش بتتباع كلها،

**casperinoo** · 30-05-2008 12:13 PM

واللهي كويس علشان البوابين...والصنايعيه وخلافه

**Ayman_Abdullah** · 30-05-2008 04:46 PM

يا باشا احنا فى شبرا الى هيا تعتبر حى شعبى لا يوجد شىء اسمه رغيف بشلن
خو انا حاسس ان ده له سبب سياسى جه على بالى كده و هو ان شبرا و شبرا الخيمة معظم النواب فى مجلس الشعب من جماعة الأخوان و ليهم شعبية جارفة هنا .......
عشان كده بيعملوا زى تجويع ليهم
اما الناس الغلابه اللى عندهم اكتر من عربية دول هما المستحقين للدعم

وسلملى على الوطنى

**hesham2004** · 30-05-2008 09:40 PM

قلهم يحطوا الكشك ده فى منطقة شعبية ، و اتحداك لو لقوا الكشك نفسه بعد ساعة واحدة

**Hossam_Hassan** · 07-06-2008 09:39 AM

الكشك بقاله اكتر من 10 أيام و بينش، قلت أجرب، اشتريت 5 أرغفة و عينك ماتشوف الا النور.

العيش مالوش ملامح، مفيش رغيفين اشقاء، كلهم مش شبه بعض و مفيش واحد منهم مدور اساسا، المصيبة بقى انه غير قابل للأستخدام الأدمى، يعنى لازق فى بعضه و معجن و طعمه فى ريحة جاز و بيتفتفت فى ايدك و فيه اى مكون تتخيله ماعدا القمح

بصراحة اى مسئول يفتح بقه و يقول ان الخبز ده مدعوم، يبقى نصاب رسمى، ده مايستاهلش ال 5 قروش أصلا