الحمد لله (يا سرقة ما تمت)

**mff_629** · 04-02-2012 04:11 PM

السلام عليكم و رحمة الله و بركاته
أولا وحشتوني جدا جدا جدا

ثانيا أنا حصللي موقف حبيت أحكيه عشان الناس ممكن تستفاد
يوم الثلاثاء الماضي نزلت أركب العربية الصبح بدري لقيت في واحد حرامي -ربنا يهديه- كسر الزجاج الأمامي الأيمن في عربيتي النيسان صني 2011

و سرق وش الكاسيت و رمى كل حاجة في التابلوه على الأرض و فتح المسند اللي بين الكرسيين و فتح الجزء الأعلى من التابلوه (اللي هو فوق الكاسيت) غالباً الباشا الحرامي كان بيدور على أي حاجة غالية أو قيمة يسرقها
الحمد لله ما سرقش حاجة غير وش الكاسيت حتى الفلوس الفكة مشفهاش و ساب شاحن الموبايل اللي كنت ناسيه في فتحة الولاعة
أنا كنت راكن في حتة حيوية جدا أمام بيت والدي الله يرحمة في مدينة نصر و المكان قريب جدا جدا من القسم

الحمد لله انه مسرقش العربية كلها
المهم دخلت على المندى الجميل بتاعنا عشان أعرف سعر الزجاج بكام في التوكيل لقيته في الموضوع المثبت بـ 275 جنيه و لقيت واحد زميلنا و حبيبنا كان غيره في شارع أحمد سعيد برة التوكيل بـ 110 و قعدت في حيرة كبيرة توكيل ولا متوكيلش ... توكيل ولا متوكيلش و أخيرا استقريت على متوكيلشي و رحت رايح لواحد عندنا في مدينة نصر و ركيبته عنده بـ 130 جنية بعد الفصال و الغريب انه كان بيحاول يقنعني اني اركب زجاج مستورد من ماليزيا و انا أصريت بشدة دكتور جريش يابابا دكتور جريش يا بابا

و طبعا مش محتاج أوصفلوكوا شعوري و هو بيفك الباب (اللي كان فبريكة) و الكليبسات و هي بتطقطق في وداني و كله كوم و هو بيفك المشمع البلاستيك اللي جوه الباب كوم تاني

بس كل لما أفتكر إن العربية كلها كانت هاتروح و بفضل الله ربنا كرم و دا محصلش أقول في نفسي

اللهم لك ألف حمد و ألف شكر يا رب العلمين

المهم الراجل مشكور شال كل الزجاج المكسور بالمكنسة الكهربائية و نظف الباب من جوة
و بعد الزجاج لما ركب قلت لازم أزود الأمان في العربية .... نعمل إيه ... نعمل إيه ... مافيش غير العصاية اللي بتمسك في الدركسيوت و الفرامل الشعبية بتاعت كل اناس
رحت على سبينز لقيتها هناك بـ 35 جندي جبتها و ركبتها و تاني يوم معرفتش أفكها إلا بعد نص ساعة من الخناق و الضرب ( أنا و العصاية)

و بعد 3 أيام بالتمام و الكمال بقيت أنا و العصاية صحاب و بفكها عادي في 30 ثانية

الجزء التاني بقى الكاسيت (اللي وشه اتسرق)
أنا محتار جدا جدا في الموضوع ده
شوية أقول و ماله يعني لما تبقى عربيتي من غير كاسيت ماهو أنا قعدت بعربيتي البولونيز قبل كده أكتر من 7 سنين و الكاسيت بتاعها بايظ و مفيش مشكلة
و شوية أقول أهي فرصة أغير الكاسيت و أجيب حاجة أحدث و حركات و تبقى جت بفايدة
و أرجع أفتكر الراجل و هو بيفك الباب و قلبي في نفس الوقت و أقول معقولة هاستحمل حد يفك الكاسيت عشان يركب واحد جديد...... انا هاشتري نفس الكاسيت و نفس الموديل عشان أخد الوش و أركبه على الكاسيت اللي عندي
و سألت على الكاسيت بتاعها اللي هو Kenwood KDC -3047 لقيته جديد ب 475 جنيه و لسة مش عارف أخد القرار ... يا ريت تساعدوني في قرار الكاسيت

طولت عليكم و شكرا على القراءة
السلام عليكم و رحمة الله و بركاته

أخوكم محمد فوزي

**WalidAdel** · 04-02-2012 04:16 PM

لا حول ولا قوة الا بالله ... قدر الله و ماشاء فعل ياعم محمد
بس مش غريبه انك ماسمعتش الانذار ولا هو مافتحش الباب بتاع العربيه اصلا
الحمد لله ان ربنا ستر

**Sehsss** · 04-02-2012 04:25 PM

قدر الله وما شاء فعل، أنا حصل معايا نفس موقفك تحت بيتي الساعة 11 صباحا بس الإنذار فضحه، وبالنسبة لزيادة الأمان أنا بالإضافة للإنذار اللي على الكلاكس اللي في العربية مركب جهاز إنذار بسارينة في التوكيل ولما الحرامي كسر الهواية الإنذارين فضحوه، وبالنسبة لموضوع كلابش الدركسيون أبو 35 جنيه ده أنا شفته لقيته ضعيف شويتين حاول تشتري نوع أغلى شويه، أنا جايب واحد من التوفيقية بـ100 جنيه تقريبا مفتاحه (رباعي النقشة) ما بيتقلدش وكل نقشة مختلفة عن التانية وصلب وقوي جدا، وبالنسبة للكاسيت إسأل في التوكيل بتاع كينوود على الوش هل ممكن يوفرهولك ولا لأ، ولو لأ يبقى هات نوع تاني أفضل وأرشحلك بايونير ويا سلام لو غيرت معاه السماعات، وهاتوا وشه بيتفك وابقى دائما اعمل زيي وشيل وش الكاسيت معاك وانت طالع، والحمد لله انها جت على كده

**hossam_elwani** · 05-02-2012 12:14 AM

المشاركة الأصلية كتبت بواسطة tiger76

يا جماعة انا سمعت عن فيلم (حاجة زى فيلم الفاميه كدة) فيه منه غامق و فيه منه شفاف و دة بيتركب على زجاج النوافذ علشان ميخليهاش سهلة الكسر و انا شوفت فيديو إختبار ليه و قعدوا يضربوا فى الزجاج بحجر ما تكسرش إلا بعد أكتر من 10 خبطات و كمان لما بيتكسر بيبقى عامل زى الزجاج السيكوريت
و لما اشتر عربيتى الجديدة (إن شاء الله) ناوى اركبه
شوفو اللينك دة كدة
llumar window film smash & grab lab test - youtube

ممتاززززززززززز بس تلاقيه غالى

**tiger76** · 05-02-2012 05:57 AM

المشاركة الأصلية كتبت بواسطة hossam_elwani

ممتاززززززززززز بس تلاقيه غالى

هاحاول اعرف سعره و ابلغكم

**medododo** · 05-02-2012 06:58 PM

المشاركة الأصلية كتبت بواسطة tiger76

يا جماعة انا سمعت عن فيلم (حاجة زى فيلم الفاميه كدة) فيه منه غامق و فيه منه شفاف و دة بيتركب على زجاج النوافذ علشان ميخليهاش سهلة الكسر و انا شوفت فيديو إختبار ليه و قعدوا يضربوا فى الزجاج بحجر ما تكسرش إلا بعد أكتر من 10 خبطات و كمان لما بيتكسر بيبقى عامل زى الزجاج السيكوريت
و لما اشتر عربيتى الجديدة (إن شاء الله) ناوى اركبه
شوفو اللينك دة كدة
LLumar Window Film Smash & Grab Lab Test - YouTube

مفيش تفاصيل أكتر

**tiger76** · 06-02-2012 02:43 PM

المشاركة الأصلية كتبت بواسطة medododo

مفيش تفاصيل أكتر

لقيت اللينك دة و فيه ارقام تليفونات و فاكس تقريبا دة الوكيل فى مصر

-----------------------------

و دة على الفيس بوك

------------------------------

ممنوع وضع اي لينكات لمواقع او جروبات اخري غير المنتدي
وان كان لابد فمن الممكن ارسالها في رسائل خاصة للطرف المعني بيها
برجاء مراجعه قواعد المنتدي
مــ 7