السلام عليكم

اولا تحياتى لجميع اعضاء المنتدى لان اول مشاركه ليه من 4 سنين تقريبا كانت فى المنتدى ده

قصة حبى للانسر من زمااان من ايام الكريستاله وكان حلمى ان يكون عندى العربيه دى فى يوم من الايام ، ولما جيت اجيب عربيه المبلغ اللى توفر معايا للاسف مكملش تمنها 1600 اوتو فتوكلت على الله وجبت اوبترا اوتوماتيك

الحمد لله اختيارى كان فى محله ، العربية ممتازة جدا موديل 2008 عمرها ما زعلتنى ، سافرت بيها كتير فى الصحراوى الغربى والشرقى ،، فاضية او مليانه ناس وشنط وعمرها ما قصرت ،، ملفات على 170 فى الطرق الصحراوية ماتهزتش منى ،، شنطتها بتشيل كتير جدا ودى حاجه انا مجتاجها،، عزلها لما كانت جديده ممتاز رغم انه بدا يقل دلوقتى يمكن فراملها مش اد كده بس كويسه برضه


رغم ده كله لا يزال عشقى للانسر مستمر ،، مش قادر انساها ونفسى يبقى عندى لانسر


بفكر ابيع الاوبترا ،، رغم انى خايف من كده وخايف احسن اندم على القرار ده وتكون عربيتى القادمه لانسر ان شاء الله بس انا خايف احسن ملقاش الحاجات اللى فى الاوبترا (اللى انا شايفها مميزات) فى اللانسر

طبعا انا بصيت للاسعار، هى اسعارها مبالغ فيها جدا،، كانت عاجبانى الشارك بس مشكلتها معايا صغر حجم الشنطه اللى انا حاسه تقريبا 75% من حجم شنطة الاوبترا ده بجانب ان مافيهاش كماليات عاليه (بلوتوث،مرايات ضم،بارك سنسور)

الكماليات ممكن اغض النظر عنها لكن موضوع الشنطه بالنسباللى هو اللى اهم لانى بسافر كتير وبيبقى معايا حاجات كتير


فبقت الخيارات اللى قدامى:

1-لانسر بومه هاف سبورت - رغم ان مش هعلى اوى عن العربية اللى معايا + سعرها مبالغ فيه

2-سيراتو هاى لاين - بس طبعا السيراتو سمعتها سابقاها فى موضوع سرقتها وثباتها وعيوبها الفنيه

3- كروز - مش هتفرق كتير عن الاوبترا هو بس شكل وكام اوبشن زياده

الحقيقه انا محتار جدا ومش عارف اعمل ايه وزى ما قلتلكم انا خايف جدا اندم بسبب التخلى عن الاوبترا

ياريت اهل الخبرة يساعدونى فى الاختيار

شكرا