السلام عليكم ورحمة الله وبركاته أخواني السياتوية

اولا احب اطمنكم علي عربيتي العزيزة انها بصحة كويسة نوعا ما
يادوب بتبطل مني مرة كل يومين بس والحمد لله بستر من ربنا بتعملها معايا علي ناصية شارعنا

المهم ، سيبكو من الميكانيكا - انا خلاص اتعودت كل يوم اروح ايدي مشحمة ومزيتة وهدومي متوسخة

خلينا في الكماليات (مش هتبقي من كله)

انا النهاردة قررت انظف شنطة العربية
لأنها طبعا من ساعة الحادثة وهي كلها فوق بعضها

فضيتها تماما وروحت مديها مسحة بفوطة نظيفة

الشنطة كانت كلها زيت (مطرح الموتور القديم لأن الأستاذ عصام لما حل الموتور كان حاطه في شنطة عربيتي فوق ورقة جرنان كتر الف خيره)
طبعا الجرنان (الأهرام) شرب الزيت وراح مبقعلي الأرضية ومغرق الفرش وبهدلي الدنيا

طلعت بقايا الموتور
وكمية مسامير تملي علبة سمن (روابي) 2 كجم

طلعت جركنين زيت (واحد شل الأحمر والتاني شل الأصفر) وروحت مفضيهم علي بعض في الجركن الأصفر ورميت الجركن الأحمر - عارف : هتقولولي لا يجب خلط الزيوت المختلفة - بس دة بق من هنا وبق من هنا مش هتفرق يعني

لميت العدة كلها مع بعض

لميت كل المنظفات سوا (اسبريهات)

رجعت تاني الأستبن والكوريك (الكوريك الأصلي) في مكانهم في بطن شنطة العربية

مسكت فرش الشنطة وروحت مديله غسلة محترمة في مدخل البيت بالخرطوم
حطيت عليه بريل وبالليفة بتاعة المواعين واديلو ادي اديلو ادي ايدلو ادي اديلو ادي ههههههههههه - زي احمد بدير في مسرحية ريا وسكينة

وسيبته يصفي مايته علي ترابزين السلم

اكتشفت بقي ان الموكيت (عالي الجودة) بتاع الفرش من كتر الزيت والمياة ببعد الغسيل انه فك من الكرتون المقوي الي ملزوق فيه

حد عنده حلول للفرش بتاع الشنطة

انا فكرت احط كرتونة تحته
وفكرت الزقه بكولة (هلزقه بس من غير ماشمه)

فكرت اروح لنجار يفصلي ابلاكاشة والزقها تحت الكرتون المقوي الي تحت الموكيت العالي الجودة

هااا

حد عنده افكار تاني ؟؟؟

ياريت تساعدوني وتتحفوني بأفكاركم النيرة

في انتظار الردود

والله المستعان
،
،