الموضوع: نظره اولى على رينوا لوجان اوتماتيك بلاك لين "السياره الحلم"

المانيوال بتاخد 3.3 لتر

اما بالنسبة لاستهلاك البنزين انا مش عارف بالظبط كام بس بناء على الكومبيوتر 11 لتر علما بان حتى المانيوال كان استهلاكها كدة تقريبا اول ما جبتها

المشاركة الأصلية كتبت بواسطة ragy

طيب حضرتك تنصحني بالاتوماتك ام المانيوال

مع العلم اني خايف من الاتوماتك في ( الاعطال الكتير - تكلفه الصيانه - استهلاك البنزين - انها لما بتعطل مبتتحركشي - قصر عمر الماتور بالنسبه للمانيوال )

ارجوج تنصحني بحياديه تامه انا عارف اني العربيتين عند حضرتك وانا واثق في رأيك
حضرتك هتكون سبب اساسي ورئيسي في اني اجبها مانيوال او اتوماتك

معلش بتعبك معايا

بص يا فندم الاوتوماتيك دلوقتي مبقاش زي زمان اعطاله كثيرة لأنه اتهرس و اتعرف اعطاله و مشاكله و حلولها + ان رينو بقاها سنين بتعمل عربيات اوتوماتيك و الحمد لله مفيش فيها مشاكل ميكانيكية لكن ممكن يبقى فيها مشكلة في السوفت وير بتاع الفتيس زي ما حصل في 2005 مع الميجان و راحو منزلين ليها سوفت وير جديد بعد اكتشاف المشكلة مباشرة

تكلفة الصيانة لما تيجي تبصلها هتلاقيها ارخص من المانيوال نسبيا بمعنى انك في المانيوال ممكن كل كام سنة تغير طقم دبرياج ب 800 جنيه مثلا في حين ان الاوتوماتيك هتغير زيت فتيس كل 40 الف مثلا او اكثر على حسب التوكيل ما هيقلك يعملو بتاع 300 جنيه

استهلاك البنزين هتلاقيه قريب خصوصا ان فتيس اللوجان addabtive بمعنى انو بيعرف طريقة سواقتك و بناء عليه بينقل على RPM مناسب لسواقتك فلو انت رجلك خفيفة على البنزين الدنيا هتبقى كويسة معاك ان شاء الله

قصة اما تعطل مبتتحركش دي مش مظبوطة تماما فرق الاوتوماتيك عن المانيوال في انو مبيترميلوش يعني لو البطارية نامت او حاجة تجيب وصلة من بطارية ثانية و الدنيا هتقوم معاك زي الفل + انك مش لازم تحط العربية على الP كل ما تقف انا دايما بوقفها على الN يعني لو نزلت فرامل اليد و زقيت هتتزق معايا بدون مشاكل
و بافتراض انها وقفت و الفتيس قفش لى الP الفتيس فيه حتة انت بتفكها (القاعدة اللي عليها الحروف PRND) و تدوس على زرار و تسحب الفتيس هيجي معاك على الN عادي جدا بدون مشاكل

قصر عمر الموتور دي انا مش عارف ازاي بصراحة لأن بكل بساطة انت مهما حرقت العربية مش هتوصل للRed Zone اللي هي خطر على الموتور لأن الفتيس حماية لنفسه و للموتور هينقل على النقلة الاعلى

العربية في المانيوال ناعمة و كويسة و في الاوتوماتيك انا مش قلقلان منها لثقتي في رينو و علشان الفتيس ده نازل برة بقالو فترة و مفيش منو مشاكل (هو نفس الفتيس بتاع السينك 2003) و نازل في اللوجان ال7 راكب و بردو مفيش منو مشاكل و البلد بقت زحمة و الواحد بيقف اكثر ما بيمشي فبالتالي الاوتوماتيك بقى من الاساسيات مش من الكماليات علما باني بستمتع بسواقة المانيوال بس في حالة ان الطريق يبقى ابن حلال مش واقف للصبح