بركولى - استلمت اللانسر اخيرا

**lolypop** · 01-06-2008 10:14 AM

بركولى اخيراو بعد 9 شهور حاجز لانسر من الجيش استلمت لانسر 1600 اوتوماتيك كحلى .
بس بتوع التوكيل قلولى ان العربية متلينة من المصنع و امشى عادى و اشغل التكيف ؟؟؟ اية رأيكم فى الكلام دة؟
و عايز استشارة فين اركب فرش جلد بس يكون شيك أوى و سعرة مناسب
وعايز اركب انذار ووحدة رفع زجاج هل لازم اركبها فى التوكيل ؟؟ و سعر وحدة الرفع كام للاربع ابواب

**hero** · 01-06-2008 10:25 AM

الف مبروك...ربنا يباركلك فيها ويكفيك شرها..
العربيات كلها الموتور بس ايلي بيكون متلين من غير حمل...لكن طبعا العربية عدادها بيكون قليل قوي...ودة معناة ان الموتور لسة ما جربش يشيل حمل العربية وركابها ....وعلشان كدة بيفضل انك في اول 1000 كم علي الاقل ما تحمل العربية احمال عالية...يعني بلاش قرص علي الموتور (اخرك 3000 Rpm )...وبلاش التكييف حاليا...ممكن والعربية واقفة ..علي اساس انك تحرك دورة التكييف...وتنشط الفريون والكمبروسور....

والف مبروك مرة تانية...

**مصراوي جدا** · 01-06-2008 10:26 AM

اولا الف مبروك العربية وربنا يديلك خيرها ويكفيك شرها

ثانيا بخصوص التليين فحسب تعليمات شركة ميتسوبيشي وعلى لسان مدير الصيانة بالتوكيل فخلال الألف كيلو متر الأولى ممكن تشغل التكييف انما السرعة لا تزيد عن 90 كيلومتر وكمان الـ RPM لا يزيد عن 3000 لفة / دقيقة

ثالثا بخصوص الصيانات الدورية فطبعا عربية حضرتك (من سيارات الجيش) ضمانها تبع الوكيل مصرية وللمحافظة على الضمان لازم تعمل الصيانات في موعدها وفي احد مراكز الخدمة الخاصة بالوكيل او المعتمدة منه والصيانات هي صيانة الألف الأولى ثم كل عشرة آلاف كيلو متر تالية يعني عند 10 آلاف والعشرين ألف والثلاثين وهكذا

رابعا بخصوص اجهزة الانذار او الكاسيت او وحدات الرفع او غيرها فلا يتم تركيبها في التوكيل لكن التوكيل ينصح بشدة بضرورة تركيب اي اضافات زي كده في مركز متخصص (علشان لو كهربائي عادي ممكن يعمل قفلة ويتلف وحدة الكمبيوتر المتحكم في كل شغل العربية وده غالي جدا) وطبعا فيه مراكز متخصصة كتير مثل أدريان وغيره وممكن الاخوة الأعضاء يدولك خبرتهم في اماكن التركيب والأسعار

**wildwest100** · 01-06-2008 10:57 AM

ربنا يباركلك فيها ويكفيك شرها

**Moh.Fahmy** · 01-06-2008 11:06 AM

المشاركة الأصلية كتبت بواسطة lolypop

الف شكر و جزاكم الله خير.
هل سبير كار كويسين فى تركيب الانذار و حدات الرفع و الكاسيت ولا اية ؟

الف مبروك ليك يا زعيم و ربنا يحرسهالك من كل سوء
سبير كار علي تجربة معظم الاخوة هنا لحد ما حد من الاخوة اللي جربوا سبير كار يردوا كويسين و كان فيه اخونا اسلام شاهين عامل كل شغل عربيته هناك و عامل صداقة قوية معاهم ربنا يرجعه بالسلامة ان شاء الله
لي سؤال عند حضرتك هي اللانسر بتنزل للجيش بكام و نظام قسطها بيكون ازاي

محمد فهمي