الموضوع: سؤال محير : تكفي اسرتك ؟ ولا تكفي اهلك ؟ .....

المشاركة الأصلية كتبت بواسطة syd

والله هما بيقولوا
ابنك بعد الجواز ابنك
وبنتك بعد الجواز مش بتبقي بنتك

بمعني ان الراجل لما بيتجوز بردو بتفضل علاقته بأهله وملزمين منه

لكن البنت لما بتتجوز بتبقي خلاص تبع زوجها ونوعا ما مش تبع اهلها الا لو جوزها كرم اخلاق منه خلاها تباشر اهلها لو احتاجوها

بالنسبة للموضوع الحالي

فبردو الرسول عليه الصلاة والسلام قال "انت ومالك لأبيك"
يقال في تفسير الحديث ان كلمة "مالك" يقصد بيها فلوسك او يقصد بيها ما لديك
وفي الحالتين المعني واحد في النهاية

واعتقد ان الواحد فعلا يحاول علي قد ما يقدر يساعد اهله حتي لو هيستغني عن بعض الحاجات في بيته
لأن لو بصلها بالمثل هيلاقي ان ممكن ابوه او امه يبيعوا لحمهم عشانه

وصديقك بما انه لسة حديث الزواج فماحسش بالأحساس دة

انا شخصيا النهاردة بعد ماجربت احساس الأبوة بكل فخر اشيل ..... ابويا علي راسي وامشي فخور بيها ولو طلبوا عينيا الأتنين اديهالهم عن طيب خاطر
لأني جربت قد ايه الضني غالي ولو طلب عيني هديهاله
فبالمثل لو انا الي كنت في الموقف دة كان ابويا هيقف جمبي لأخر قطرة في دمه

بس في نفس الوقت ماقصرش في بيتي يعني لو اقدر اقطتع من مصروف بيتي بالقدر الي بردو يعيشني اكيد هديلوا الباقي

وفي قصة كلنا عارفينها بتاعة الثلاثة الي دخلوا كهف والصخرة قفلت عليهم الباب وكل واحد ذكر حسناته لحد الأخير الي قال انه كان بيقف باللبن جمب امه وابوه ومش بيصحيهم لحد لما هما يصحوا بنفسهم ويشربهم لحد لما يشبعوا وسايب اولاده جعانين وبيعيطوا
وساعتها الصخرة اتفتحت وانفرجت ازمتهم

والواحد لو عاش عمره كله تحت رجل ابوه وامه مش هيوفيهم حقهم عليه

وفي حديث قدسي ما معناه
ان لما الواحد امه بتموت "بعد الشر عن ام كل واحد فينا"
بينادي منادي من تحت عرش الرحمن "ماتت من كنا نكرمك من اجلها، اعمل صالحا نكرمك من اجله"

وطبعا الحديث الشهير
اي الناس احق بحسن صحبتي يا رسول الله
أمك ثم امك ثم امك ثم ابوك

اكيد لو فضلت اتكلم عن فضل الأباء والأمهات مش هخلص وكلنا عارفين الكلام دة

بس الي عايز اقوله
ان ابويا وامي يدخلوني الجنة ولازم اهل بيتي يتحملوني شوية ولازم يتحملوني بل يشجعوني

وكحل لو يقدر يعيش مع ابوه وامه في نفس البيت كنوع من توفير المصاريف وتوحيد المصاريف الثابتة "علي غرار التكاليف الثابتة بلغة المحاسبين" يكون افضل وحل وسط واهو ياكل من الي بياكلوه ويلبس من الي بيلبسوه ويعيش معاهم واللقمة يقسموها سوا

بجد الموضوع ممتاز

تقبل مروري

واعتقد ان الواحد الي يساعد ابوه وامه لايمكن ربنا يخذله ابدا بل وهيكرمه بأذن الله ويوسع رزقه بس يخلص النية لله

والله المستعان
،
،

حضرتك قلت اللي كنت عاوز اقوله بالظبط